ផលិតកម្មតន្ត្រីដ៏ធំ Warner Music Group’s ADA អាស៊ីបានចាប់ដៃគូសហការជាមួយនឹងផលិតកម្ម Baramey ដែលជាផលិតកម្មបង្កើតនិងសាងនូវតារាចម្រៀងដ៏មានសមត្ថភាពជាច្រើនរូប។ ការចុះកិច្ចសន្យាភាពជាដៃគូនេះគឺជាលើកទីមួយដែលផលិតកម្មកម្ពុជាបានសហការជាមួយនឹងផលិតកម្មចម្រៀងអន្តរជាតិដ៏ធំ។
នៅក្នុងនោះ ADA Asia នឹងធ្វើការងារយ៉ាងជិតស្និទ្ធជាមួយនឹងផលិតកម្ម បារមី ដើម្បីបង្កើនឱកាសដល់តារាចម្រៀងកម្ពុជាតាមរយៈសេវាកម្មជាច្រើនដូចជា ចែកចាយបទចម្រៀងជាលក្ខណៈសកល ការធ្វើទីផ្សារឌីជីថល ដើម្បីពង្រីកឱកាសឱ្យពិភពលោកកាន់តែស្គាល់បទចម្រៀងខ្មែរ តន្ត្រីខ្មែរ និងវប្បធម៌ជុំវិញពិភពលោក។
យោងតាមទាំងការប្រកាសពីផលិតកម្មក្នុងស្រុក Baramey និងដៃគូផលិតកម្ម ADA Asia បានធ្វើការផ្សាយតាមរយៈវែបសាយ និង ទំហំហ្វេសប៊ុករបស់ខ្លួន បានចែករំលែកឱ្យដឹងស្ដីពីកិច្ចសហប្រតិបត្តិការជាលក្ខណៈទ្វេភាគីនេះ ដោយផលិតកម្ម Baramey (បារមី) បានប្រកាសនៅលើផេកផ្លូវការរបស់ខ្លួនថា៖
«ផលិតកម្មបារមីយើង តែងតែមានភាពជឿជាក់ថា បទចម្រៀង និងតន្រ្ដីសិល្បៈខ្មែរយើង សាកសមនឹងទទួលបានការចាប់អារម្មណ៍ និងដឹងឮដោយពិភពលោក។ នេះគឺជាជំហានដ៏ធំមួយ ដែលជួយឲ្យពួកយើងសម្រេចនូវសេចក្ដីប្រាថ្នាមួយនេះ។ យើងសូមអរគុណ ទៅកាន់អ្នកគាំទ្រ ផលិតកម្មបារមី សិល្បករ និងសិល្បការិនីរបស់ពួកយើង ដោយការគាំទ្រអ្នក បាននាំអោយឲ្យពួកយើងបានមកដល់ គោលដៅមួយនេះ។ ជាមួយនឹងការគាំទ្រដោយ Warner Music Group’s ADA Asia ពួកយើងត្រៀមខ្លួនរួចជាស្រេច ក្នុងការ បើកទំព័រថ្មីនៃប្រវត្តិសាស្រ្ដរបស់វិស័យសិល្បៈនៅប្រទេសកម្ពុជាយើង។ ជាចុងក្រោយពួក យើងក៏សូមអញ្ជើញអ្នកគាំទ្រទាំងអស់គ្នា មកចូលរួមនូវជំហានថ្មីរបស់ពួកយើងទាំងអស់គ្នា!»
កិច្ចព្រមព្រៀងនេះកើតឡើងក្រោយផលិតកម្ម Baramey ជោគជ័យកាលពីដើមឆ្នាំ២០២១នេះជាមួយនឹងបទចម្រៀងល្បី Time To Rise ច្រៀងរួមជាមួយនឹងព្រឹទ្ធាចារ្យ គង់ ណៃ ដែលបទនេះមានភាពល្បីល្បាញជាលក្ខណៈអន្តរជាតិ។ បទចម្រៀងនេះដែរគឺជាបទដែលមានអ្នកទស្សនាច្រើនបំផុតរបស់ប្រទេសកម្ពុជាជាមួយនឹងចំនួនទស្សនាជិត៥០លានដង។
ផលិតកម្ម Baramey មានតារាចម្រៀងខ្មែរអាមេរិកកាំង កញ្ញា Laura Mom គឺជា CEO មានតារាចម្រៀងល្បីៗជាច្រើនប្រមូលផ្ដុំ នៅក្នុងផលិតកម្មមួយនេះដូចជា តារាចម្រៀងល្បី វណ្ណាដា ក្រុមចម្រៀងក្មេងខ្មែរ តារាចម្រៀងសំនៀង Modern Sophia Kao និងតារាចម្រៀងល្បីៗជាច្រើនរូបទៀត។
ប្រភព៖ Baramey Production, WMG
