សិល្បៈជាតិ៖ អតីតម្ចាស់ពាន Cambodia’s Got Talent រដូវកាលទីមួយ លោក យឿន ពិសី កាលពីរាត្រីថ្ងៃទី២១ ខែកុម្ភៈ ឆ្នាំ ២០២៤ បានចេញមកប្រកាសចែកផ្លូវជាមួយនឹងឧត្តមភរិយាតាមរយៈបណ្ដាញទំនាក់ទំនងសង្គមហ្វេសប៊ុក រហូតបង្កឱ្យមានការភ្ញាក់ផ្អើលយ៉ាងខ្លាំង។
រួមរស់ជាមួយគ្នារយៈពេល៣ឆ្នាំ ពិសី និងភរិយា បានចាប់ដៃគ្នារៀបអាពាហ៍ពិពាហ៍ និងសាងគ្រួសារកាលពីឆ្នាំ២០២១ ដោយមកដល់ដើមឆ្នាំ២០២៤នេះ អ្នកទាំងពីរមានកូន២ជាចំណងដៃនៃអាពាហ៍ពិពាហ៍។ គូស្វាមីភរិយាមួយគូនេះ មិនដែលឃើញមានបញ្ហាទំនាស់ ឬជម្លោះណាមួយឱ្យអ្នកផងបានដឹងនិងឮនោះឡើយ អ្វីដែលអ្នកជិតខាងដឹងគឺសុភមង្គល និងការចុះសម្រុងគ្នា រស់នៅប្រកបដោយសេចក្ដីសុខ។
យ៉ាងណាមិញគូស្នេហ៍ដែលធ្លាប់ធ្វើឱ្យអ្នកដទៃសរសើរនិងលួចច្រណែន បែរជាមានបញ្ហារហូតឈានដល់លែងលះគ្នា ដោយភាគីឪពុក យឿន ពិសី សុខចិត្តចិញ្ចឹម និងផ្ដល់អាហារកិច្ចដល់កូនៗរហូតគ្រប់អាយុ១៨ឆ្នាំ គឺពិតជារឿងមួយធ្វើឱ្យអ្នកគាំទ្រ ក៏ដូចជាសាធារណជនមានការងឿងឆ្ងល់ជាពន់ពេក។
ត្បិតថា យឿន ពិសី មិនបញ្ជាក់ពីមូលហេតុនៃបញ្ហារកាំរកូសរហូតឈានដល់លែងលះ តែលោកបានធានាអះអាងថាលោកនឹងបន្តតួនាទីជាឪពុក រហូតដល់កូនៗគ្រប់អាយុ១៨ ឆ្នាំ។ សូមអានសំណេររបស់ យឿន ពិសី ដូចតទៅ ៖ «ខ្ញុំសង្ឃឹមថាគ្រប់យ៉ាងនិងរក្សាបាននូវសន្តិភាពផ្លូវចិត្តរៀងខ្លួនដោយគ្មានការដាក់សម្ពាធឬបិទសិទ្ធិឬតាមរំខានពីភាគីណាមួយទៀតឡើយខ្លឹមសារដែលខ្ញុំបង្ហោះនៅថ្ងៃនេះខ្ញុំសុំស្ងប់ស្ងាត់ចាប់ពីពេលនេះតទៅ ចំពោះរឿងគ្រួសារជីវិតជាប្ដីប្រពន្ធមួយនេះខ្ញុំសុំមិនបកស្រាយអ្វីច្រើនទៀតទេ ខ្ញុំបាទសូមអរគុណពុកម៉ែបងប្អូនដោយក្ដីគោរព»។
ទោះជាមានការសោកស្ដាយដែលគូស្នេហ៍ធ្លាប់តែផ្អែមល្ហែម និងស្អិតល្មួតជាមួយគ្នា បែរជាដើរដល់ផ្លូវបំបែក ប៉ុន្តែអ្នកតាមដាន និងគាំទ្រ នៅតែគោរពតាមការសម្រេចចិត្តរបស់អ្នកទាំងពីរ ព្រោះមានតែបុគ្គលខ្លួនឯងប៉ុណ្ណោះទើបដឹងថាអ្វីជាអ្វី ដូច្នេះអ្នកគាំទ្រសង្ឃឹមថា យឿន ពិសី ច្បាស់ជាគិតគូរយ៉ាងល្អិតល្អន់ហើយ មុននឹងចេញសារមកប្រាប់ពីបញ្ហាជីវិតរបស់ខ្លួនជាសាធារណបែបនេះ។