«ក្ដីស្រលាញ់ដែលអ្នកផ្ដល់ឱ្យ» ភាពយន្តខ្នាតខ្លីកំពុងតែទទួលបានការនិយមគាំទ្របន្ទាប់ពី បញ្ចេញឱ្យអ្នកគាំទ្របានទស្សនាក្នុងពេលថ្មីៗនេះ។ លើសពីតួឯកប្រុស និងតួឯកស្រីដែលធ្វើឱ្យរឿងមួយនេះទទួលបានការគាំទ្រ ក្រុមការងារផលិតក៏ជាកម្លាំងស្នូលមួយដ៏សំខាន់ ប៉ុន្តែក៏មិនអាចខ្វះបានគឺ អ្នកនិពន្ធជាមេគំនិត គិតគូឆ្អឹងរឿង សាច់រឿង និងហេតុការណ៍ផ្សេងៗ ទើបធ្វើឱ្យរឿងពេញលេញនិងសំបូរបែប។
កញ្ញា ឈាង សុម៉ាលីន គឺជាអ្នកនិពន្ធមួយរូបនៅពីក្រោយសាច់ រឿងស្នេហាបែបយុវវ័យ «ក្ដីស្រលាញ់ដែលអ្នកផ្ដល់ឱ្យ» ទាំងវគ្គទីមួយនិងវគ្គទីពីរ ដែលកំពុងតែទទួលបានការពេញនិយមខ្លាំងនាខណៈនេះ។
អ្នកនិពន្ធវ័យក្មេងរូបនេះ ធ្លាប់មានស្នាដៃនិពន្ធទទួលបានការគាំទ្រច្រើនពីសំណាក់មិត្តអ្នកអានតាមរយៈស្នាដៃរឿង «ថ្ងៃអង្គារ» ប៉ុន្តែមានមនុស្សតិចតួចណាស់ដែលបានស្គាល់មុខនិងដឹងពីសមត្ថភាពរបស់ក្មេងស្រីរូបនេះ ព្រោះតែកញ្ញាជាមនុស្សមានភាពអៀនខ្មាសច្រើន។
តាមពិត ឈាង សុម៉ាលីន មានការងារស្នូលគឺជាបុគ្គលិកផ្នែក Digital Marketing ប៉ុន្តែដោយសារតែប្អូនស្រីមានទេពកោសល្យ ក្នុងការសរសេរនិងធ្លាប់មានស្នាដៃសៀវភៅទើបធ្វើឱ្យប្រធានរបស់ប្អូន ប្រគល់ការងារសហនិពន្ធបន្ថែមឱ្យប្អូនទទួលខុសត្រូវ ហើយប្អូនក៏មិនបានធ្វើឱ្យ ប្រធានខ្លួនអស់សង្ឃឹមដែរ ព្រោះស្នាដៃនេះមានការគាំទ្រយ៉ាងខ្លាំងពីសំណាក់អ្នកទស្សនាពិសេសយុវវ័យ។
ដោយសារតែមានឧបនិស្ស័យស្រលាញ់ការសរសេរតាំងពីក្មេងផង គួរផ្សំនឹងជំនាញសិក្សាទំនាក់ទំនងអន្តរជាតិដែលប្អូនសិក្សាមានវគ្គសរសេរទើបធ្វើឱ្យប្អូនយកឱកាសនោះបង្វឹកជំនាញសរសេររបស់ប្អូនឱ្យកាន់តែស្ទាត់។ កញ្ញា ឈាង សុម៉ាលីន កំពុងតែត្រៀមចេញស្នាដៃសៀវភៅថ្មីមួយទៀតមានឈ្មោះថា «កាលយើងអាយុ១៨ឆ្នាំ» ឬ «When We were eighteen» ក្នុងពេលឆាប់ៗខាងមុខនេះ។ ក្រៅពីសរសេរសៀវភៅ យុវតីរូបនេះក៏ធ្លាប់មានស្នាដៃសរសេររឿងភាគ និង ភាពយន្តខ្នាតខ្លីផងដែរ នាពេលកន្លងមក។
កញ្ញា ឈាង សុម៉ាលីន ធ្លាប់ទទួលបានពានរង្វាន់មហោស្រពអក្សរសិល្ប៍ខ្មែរចំណាត់ថ្នាក់លេខ២ កាលពីឆ្នាំ ២០១៨ ក្មេងស្រីមានដើមកំណើតមកខេត្តកំពង់ឆ្នាំងរូបនេះជានិស្សិតបញ្ចប់ការសិក្សាជំនាញទំនាក់ទំនងអន្តរជាតិពីវិទ្យាស្ថានភាសាបរទេស៕
ទស្សនាវីដេអូព័ត៌មានខាងក្រោម៖