សិល្បៈជាតិ៖ អ្នកគាំទ្រវិស័យប្រកួតសម្រស់ជាច្រើនបានដឹងហើយថា បវរកញ្ញាភេទទី៣ Miss Universe Trans Cambodia កញ្ញា ពេជ្រ គីរ៉ា បានឈ្នះ title ឬមកុដ Queen universe Trans ពីប្រទេសឥណ្ឌាកាលពេលកន្លងមក។ ក្រោយឈ្នះតំណែងនេះ ទីផ្សារការងាររបស់គីរ៉ា ហាក់មានសន្ទុះហក់ឡើងយ៉ាងខ្លាំង រហូតមានការងារសិល្បៈទាក់ទងមិនដាច់ ហើយថ្មីៗនេះដែរ គេឃើញកញ្ញា ពេជ្រ គីរ៉ា បានចែករំលែកស្នាដៃសម្ដែងដំបូងរបស់ខ្លួនឱ្យអ្នកគាំទ្របានទស្សនា។
ស្នាដៃដំបូងរបស់ ពេជ្រ គីរ៉ា នេះគឺជាប្រភេទរឿងខ្លី មានចំណងជើងថា «ខ្សែជីវិតភេទទី៣» ដែលសាច់រឿងមានបង្កប់ខ្លឹមសារអប់រំដូចការលើកឡើងរបស់តួឯកស្រីប្អូន ពេជ្រ គីរ៉ា បានរៀបរាប់នៅលើ Caption ថា៖ «ស្នេហាគ្រាន់តែជាបង្អែមសម្រាប់ជីវិត ញ៉ាំឆ្អែតហើយក៏ណាយដែរ តែក្ដីបារម្ភ ការយកចិត្តទុកដាក់ ភាពស្មោះត្រង់ និងស្រលាញ់ ពិតប្រាកដ ប្រៀបដូចខ្យល់ដង្ហើមដែលខ្វះមិនបាន ទោះឋិតក្នុងកាលៈទេសៈបែបណាក៏ដោយ ក៏ត្រូវផ្ដល់ក្ដីស្រលាញ់ឱ្យខ្លួនឯងជានិច្ច។»
រឿងខ្លី និងជាស្នាដៃដំបូងរបស់កញ្ញា ពេជ្រ គីរ៉ា នេះក៏មានការចូលរួមសម្ដែងពីប្អូន កក្កដា សោភ័ណ្ឌ ធ្វើឱ្យរឿងនេះកាន់តែទទួលបាននូវការចាប់អារម្មណ៍បន្ថែមផងដែរ។ បើតាមការលើកឡើងពី ពេជ្រ គីរ៉ា បានបញ្ជាក់ថា បើសិនជាស្នាដៃទីមួយរបស់ខ្លួនមានការគាំទ្រច្រើននោះ ប្អូននឹងបន្តចេញស្នាដៃថ្មីដើម្បីបម្រើអារម្មណ៍ទស្សនិកជនជាបន្តបន្ទាប់ទៀត៕
