ទីក្រុងព្យុងយ៉ាង៖ មេដឹកនាំកូរ៉េខាងជើងលោក គីម ជុងអ៊ុន បានបញ្ជាឱ្យបង្កើនការត្រៀមខ្លួនសម្រាប់ការធ្វើសង្គ្រាម បន្ទាប់ពីបានត្រួតពិនិត្យកងទ័ពនៅឯមូលដ្ឋានប្រតិបត្តិការយោធាដ៏សំខាន់មួយនៅភាគខាងលិចរបស់ប្រទេស។ នេះបើយោងតាមការចេញផ្សាយដោយសារព័ត៌មាន Aljazeera នាថ្ងៃព្រហស្បតិ៍ ទី៧ ខែមីនា ឆ្នាំ២០២៤
ទីភ្នាក់ងារព័ត៌មានរដ្ឋកូរ៉េខាងជើង (KCNA) មិនបានបង្ហាញពីទីតាំងនៃមូលដ្ឋានកងទ័ពនោះ នៅក្នុងរបាយការណ៍របស់ខ្លួននាថ្ងៃព្រហស្បតិ៍ នេះទេ។
យោងតាម KCNA មេដឹកនាំកូរ៉េខាងជើងបាននិយាយថា «យោធាត្រូវតែស្វាហាប់ ពង្រឹង និងបង្កើនការប្រុងជើងការកម្រិតខ្ពស់បំផុតសម្រាប់សង្រ្គាម ស្របទៅតាមតម្រូវការនៃស្ថានភាពដែលកំពុងមាន»។ លោកបានបន្ថែមថា «កងទ័ពរបស់យើងគួរតែ… បង្កើនការធ្វើសមយុទ្ធសង្រ្គាមជាក់ស្តែង សំដៅធ្វើឱ្យប្រសើរឡើងយ៉ាងឆាប់រហ័ស នូវសមត្ថភាពប្រយុទ្ធរបស់ខ្លួន សម្រាប់ការត្រៀមខ្លួនសង្រ្គាមដ៏ល្អឥតខ្ចោះ»។
ដំណើរទស្សនកិច្ចទៅត្រួតពិនិត្យកងទ័ពនៅមូលដ្ឋានប្រតិបត្តិការយោធានៅភាគខាងលិចនៃប្រទេស របស់លោកគីម បានធ្វើឡើងខណៈកងកម្លាំងមកពីសហរដ្ឋអាមេរិក និងកូរ៉េខាងត្បូង បានបន្តសមយុទ្ធយោធារួមគ្នាទ្រង់ទ្រាយធំ Freedom Shield ប្រចាំឆ្នាំកាលពីថ្ងៃទី៤ ខែមីនា ក្នុងទឹកដីរបស់កូរ៉េខាងត្បូង។ សមយុទ្ធយោធារួមគ្នានេះ ត្រូវបានគេរំពឹងថា នឹងកងទ័ពចូលរួមកើនឡើងទ្វេដង បើធៀបនឹងឆ្នាំមុន ដោយមានសមយុទ្ធស្ទាក់ចាប់កាំជ្រួច ការទម្លាក់គ្រាប់បែក ការវាយប្រហារតាមអាកាស និងការបាញ់គ្រាប់ពិត។
យ៉ាងណាម៉ិញ កូរ៉េខាងជើង បានថ្កោលទោសសមយុទ្ធយោធារួមគ្នារបស់អាមេរិក និងកូរ៉េខាងត្បូង ជាយូរយារណាស់មកហើយ ដោយអះអាងថា «ការហាត់សមរបស់ពួកគេ គឺសម្រាប់ការលុកលុយ និងបានធ្វើតេស្តអាវុធជាការឆ្លើយតបទៅនឹងសមយុទ្ធពីមុន»។
សូមជម្រាបថា កាលពីថ្ងៃចន្ទ សប្ដាហ៍នេះ សារព័ត៌មានរដ្ឋ KCNA បានដកស្រង់សម្ដីអ្នកនាំពាក្យមិនបញ្ចេញឈ្មោះម្នាក់សម្រាប់ក្រសួងការពារជាតិកូរ៉េខាងជើង ដោយជំរុញឱ្យក្រុងសេអ៊ូល និងក្រុងវ៉ាស៊ីនតោន បញ្ឈប់ការធ្វើសមយុទ្ធដោយមិនប្រុងប្រយ័ត្ន និង«ការធ្វើសមយុទ្ធសង្គ្រាមដ៏ឆ្កួតលីលា»៕