កាលពីពេលថ្មីៗនេះ ក្រុមហ៊ុនចម្រៀង AKASA MUSIC បានបញ្ចេញបទចម្រៀងថ្មី៣ បទ ៣រសជាតិ ពីស្នាដៃអ្នកនិពន្ធល្បី ៣រូប ក៏ដូចជាណែនាំ តារាចម្រៀងថ្មីដែលមិនត្រឹមតែមានទឹកដមសំឡេងពីរោះ រីឯរូបសម្រស់ទៀតសោតក៏ ស្រស់សោភា មិនចាញ់បវរកញ្ញ នៅក្នុងផលិតកម្មចម្រៀងរបស់ខ្លួនគឺកញ្ញា ពេជម្នី សេលីណា។ គ្រាន់តែចេញចម្រៀងភ្លាម ចំប៉ីសៀមរាបរូបនេះបានឆក់យកដួងចិត្តបេះដូងអ្នកស្ដាប់ឱ្យលង់ទៅនឹងទឹកដមសំឡេងរបស់កញ្ញា។ ថ្លែងនៅក្នុងវីដេអូប្រូម៉ូតខ្លីមួយ សេលីណា បានឱ្យដឹងថាកំពូលតារាចម្រៀង ឱក សុគន្ធកញ្ញា គឺជាអាយដលរបស់ខ្លួន ដោយយុវតីរូបនេះបានបង្ហាញពីក្ដីរំភើបដែលបានបកស្រាយបទចម្រៀងនិពន្ធដោយលោក សុខ ចាន់ផល ព្រោះលោកគឺជាម្ចាស់ស្នាដៃនិពន្ធបទចម្រៀងពីរោះៗនិងល្បីល្បាញជាច្រើនបទរបស់អ្នកនាង ឱក សុគន្ធកញ្ញា។
ងាកមកលោក សុខ ចាន់ផល ឯណេះវិញ ក្រោយសម្ងំបាត់មុខឈឹងពីការនិពន្ធបទចម្រៀង ទៅផ្តោតលើការសរសេរសៀវភៅ និងនិពន្ធអត្ថបទភាពយន្ត លោកបានត្រលប់មកបញ្ចេញទឹកដៃសរសេរចម្រៀងជាថ្មី នៅក្នុងក្រុមហ៊ុនចម្រៀង អាកាស ម្ញូសិក។ ឆ្លើយតបនឹងសំណូមពរអ្នកគាំទ្រដែលទន្ទឹងរងចាំ ស្នាដៃថ្មីរបស់លោក បទ «ឈប់សម្ដែង» រៀបរាប់ពីសាច់រឿងស្នេហាមួយដែលបន្សល់នូវអារម្មណ៍អួលអាក់ ព្រោះស្នេហាចប់ដូចមិនចប់ ធ្វើឱ្យអារម្មណ៍នៅមិនទាន់ដាច់ស្រេច។ យ៉ាងណាមិញក្រោយសំរាកលែងនិពន្ធបទចម្រៀងយូរ បន្ទាប់ពីត្រលប់មកចាប់ប៊ិចសរសេរប៉ារ៉ូលចម្រៀងដំបូងនេះ លោកទទួលស្គាល់ថាអារម្មណ៍ជាអ្នកនិពន្ធហាក់កំពុងដង្ហើយហៅលោក។
សូមជម្រាបជូនថាកញ្ញា ពេជម្នី សេលីណា បានចេញបទចម្រៀងថ្មី៣បទហើយ នៅក្នុងក្រុមហ៊ុនចម្រៀងអាកាសាម្ញូសិក ដែលសុទ្ធសឹងជាស្នាដៃនិពន្ធរបស់អ្នកនិពន្ធល្បីៗមានបទពិសោធន៍និងទឹកដៃឆ្នើម ដូចជាបទចម្រៀងញាក់កន្ត្រាក់អារម្មណ៍ «Yucky» ស្នាដៃលោក សោម ដូរ៉េ បទចម្រៀងស្នេហាមិនទាន់ដាច់ស្រេច «ឈប់សម្ដែង» ស្នាដៃលោកសុខចាន់ផល និងបទចម្រៀងមនោសញ្ចេតនា «ការឈឺចាប់អូន គ្មានចំណែកបង » ស្នាដៃរបស់អ្នកនិពន្ធនិងដឹកនាំ ខាំ ភូរិ៕