កីឡាករ Pocholo Arellano Bugas របស់ក្លិបបាល់ទាត់អង្គរថាយហ្គឺរ ត្រូវបានសហព័ន្ធកីឡាបាល់ទាត់របស់ប្រទេសហ្វីលីពីន កោះហៅចូលរួមហ្វឹកហាត់ក្នុងក្រុមជម្រើសជាតិហ្វីលីពីនដើម្បីត្រៀមក្នុងការប្រកួត FIFA World Cup 2026 និងAFC Asian Cup 2027។
Pocholo Bugas គឺជាកីឡាកកូតាអាស៊ាន ជនជាតិហ្វីលីពីន របស់ក្លិបបាល់ទាត់អង្គរថាយហ្គឺរ សមាជិកលីគកំពូលកម្ពុជា Cambodian Premier League រដូវកាល ២០២៣-២៤។ រូបគេគឺជាអតីតថ្នាលយុវជនរបស់ Far Eastern University និងចូលរួមឈុតធំរបស់ហ្វីលីពីនដំបូងធំនៅឆ្នាំ ២០២០ ជាមួយក្រុម United City FC។
រយ:ពេល៣ឆ្នាំ Pocholo Bugas ជួយឲ្យក្រុម United City FC ឈ្នះលីគកំពូលហ្វីលីពីនចំនួន២លើក (PHILLIPPINE CHAMPION រដូវកាល ២០១៩-២០ និង ២០២១-២២ ហើយរូបគេក៏បានជាប់ជម្រើសជាតិហ្វីលីពីន U-22 ក្នុងព្រឹត្តិការណ៍ស៊ីហ្គេម និងធ្លាប់បង្ហាញខ្លួនក្នុងពានរង្វាន់ (AFC Champions League) អស់រយៈពេល ២ឆ្នាំផងដែរ។
គួរបញ្ជាថា ក្រៅបីកីឡាករ Pocholo Bugas ក៏នៅមានកីឡាករ ២រូបទៀតដែលត្រូវបានកោះហៅទៅចូលរួមជាមួយក្រុមជម្រើសជាតិមីយ៉ាន់ម៉ា គឺកីឡាករ Soe Moe Kyaw របស់ភ្នំពេញក្រោន និងកីឡាករ Thiha Zaw របស់ព្រៃវែង។
សម្រាប់ការប្រកួតលីគកំពូលកម្ពុជា Cambodian Premier League រដូវកាលឆ្នាំ២០២៣-២៤ សប្តាហ៍ទី២៥ នឹងត្រូវសម្រាកចាប់ពីសប្ដាហ៍នេះរហូតដល់ថ្ងៃទី២៦ ខែមីនា ដោយសារចំថ្ងៃ FIFA Day ដូច្នេះ ការប្រកួតនឹងចាប់ផ្តើមដំណើរការពីថ្ងៃទី៣០ និង៣១ ខែមីនា ឆ្នាំ២០២៤៕