ប៉េកាំង៖ ប្រព័ន្ធផ្សព្វផ្សាយរដ្ឋបានរាយការណ៍ថា មនុស្សម្នាក់បានស្លាប់ និង ២២នាក់ទៀត បានរងរបួសនៅក្នុងការសង្ស័យថា មានការផ្ទុះហ្គាសនៅក្នុងខេត្ត Hebei ភាគខាងជើងប្រទេសចិន នាថ្ងៃពុធ នេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃពុធ ទី១៣ ខែមីនា ឆ្នាំ២០២៤។
ការផ្ទុះនេះបានបណ្ដាលឱ្យរថយន្តជាច្រើនគ្រឿង រងការខូចខាតយ៉ាងធ្ងន់ធ្ងរ ហើយបានបន្សល់ទុកនូវកំទេចកំទីរាយប៉ាយនៅតាមផ្លូវជុំវិញ។
ទូរទស្សន៍រដ្ឋ CCTV បានរាយការណ៍ថា ការផ្ទុះនេះត្រូវបានគេសង្ស័យថាបណ្តាលមកពីការលេចធ្លាយបំពង់ហ្គាសចំអិនអាហារ នៅហាងលក់មាន់ចៀនមួយកន្លែងក្នុងទីក្រុង Sanhe ស្ថិតនៅចម្ងាយប្រហែល ៨០គីឡូម៉ែត្រពីទីក្រុងប៉េកាំង នៅមុនម៉ោង ៨ព្រឹកនេះ (ម៉ោងក្នុងស្រុក)។
យោងតាមសេចក្តីថ្លែងការណ៍មួយបានឱ្យដឹងថា អង្គភាពពន្លត់អគ្គីភ័យ Langfang បាននិយាយថា ការផ្ទុះ និងភ្លើងបានឆាបឆេះនៅក្នុងហាងលក់ទំនិញតាមដងផ្លូវនៅជិតផ្លូវប្រសព្វនៃផ្លូវ Xueyuan និងផ្លូវ Yingbin ក្នុងភូមិ Xiaozhanggezhuang។
នាយកដ្ឋានបាននិយាយថា ភ្លាមៗនោះ អង្គភាពបានបញ្ជូនរថយន្តចំនួន ៣៦គ្រឿង និងមនុស្ស១៥៤នាក់ ទៅកាន់កន្លែងកើតហេតុ ដោយបន្ថែមថា ភ្លើងកំពុងស្ថិតក្រោមការគ្រប់គ្រង ហើយការងារជួយសង្គ្រោះកំពុងត្រូវបានអនុវត្ត។
ការផ្ទុះនេះបានកើតឡើងបន្ទាប់ពីការបិទកិច្ចប្រជុំនយោបាយថ្នាក់ខ្ពស់របស់រដ្ឋាភិបាលក្នុងទីក្រុងប៉េកាំង។
វីដេអូនៅលើប្រព័ន្ធផ្សព្វផ្សាយសង្គម Weibo បានបង្ហាញពីការហេតុការណ៍ខាងលើ ដោយបានបំផ្លិចបំផ្លាញអគារ និងរថយន្តជាច្រើនគ្រឿង ខណៈកំទេចកំទីកញ្ចក់ និងដំបូលអគារ បានធ្លាក់រាយប៉ាយជុំវិញផ្លូវ សំភារៈចំនួនបានឆេះ ហើយទិដ្ឋភាពនោះមើលទៅដូចជា ស្ថិតនៅក្នុងតំបន់សង្គ្រាម។
យ៉ាងណាម៉ិញ ការិយាល័យគ្រប់គ្រងគ្រោះអាសន្នទីក្រុង Sanhe បានបញ្ជូនក្រុមស៊ើបអង្កេតទៅកន្លែងកើតហេតុ ហើយការិយាល័យគ្រប់គ្រងគ្រាអាសន្នទីក្រុង Langfang បាននិយាយថា នាយកដ្ឋានពន្លត់អគ្គីភ័យ ក៏ស្ថិតនៅកន្លែងផ្ទុះផងដែរ នេះបើយោងតាមការបង្ហោះនៅលើបណ្តាញសង្គមរបស់ប្រទេសចិន៕
