រាជធានីភ្នំពេញ ៖ លោកជំទាវ កែ សួនសុភី ស សុខា ប្រធានកិត្តិយសក្រុមការងារយេនឌ័រក្រសួងមហាផ្ទៃ បានដឹកនាំថ្នាក់ដឹកនាំជាស្រ្តី នៃក្រសួងមហាផ្ទៃ អញ្ជើញចូលរួមកម្មវិធីព្រះពុទ្ធសាសនាផ្សាភ្ជាប់នឹង ការអប់រំបណ្តុះបណ្តាលបច្ចេកទេស និងវិជ្ជាជីវៈ នៅមណ្ឌលអប់រំកែប្រែទី២ ដោយបាននិមន្តព្រះសង្ឃបីអង្គមកពីវត្តនិគ្រោធវ័ន គល់ទទឹង ដឹកនាំដោយព្រះគ្រូមេធានុរ័ក្ខ គូ សុភាព។
កម្មវិធីដែលបានរៀបចំឡើងនៅរសៀលថ្ងៃទី១៤ ខែមីនា ឆ្នាំ២០២៤ នាមណ្ឌលអប់រំកែប្រែទី២កន្លងទៅនេះ មានការអញ្ជើញចូលរួមពី លោកជំទាវ រដ្ឋលេខាធិការ អនុរដ្ឋលេខាធិការ លោកជំទាវ សុខ វណ្ណា ភរិយាឯកឧត្តមអគ្គនាយក នៃអគ្គនាយកដ្ឋានពន្ធនាគារ លោកជំទាវអគ្គនាយករង ព្រមទាំងមន្រ្តីនៃមណ្ឌលអប់រំកែប្រែទី២ និងជនជាប់ឃុំជាស្រ្តីទាំងអស់។ ឆ្លៀតក្នុងឱកាសនោះ លោកជំទាវ កែ សួនសុភី ភរិយាឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានត្រួតពិនិត្យទីតាំងសាងសង់ភូមិកុមារសម្រាប់កុមារតាមម្តាយនៅមណ្ឌលអប់រំកែប្រែទី២ផងដែរ។ ទង្វើដ៏ថ្លៃថ្លារបស់លោកជំទាវ បានបង្ហាញឱ្យឃើញពីសមានចិត្ត យកចិត្តទុកដាក់ព្រួយបារម្ភ និង ជួយសម្រួលដល់បងប្អូនជាស្ត្រី មិនថាស្ត្រីដែលកំពុងជាប់ឃុំឃាំង ឬស្ត្រីជាម្ដាយដែលមានកូនតូចៗនៅជាមួយខ្លួននោះទេ៕
