ឆ្លង់កាត់ការប្រកួតរយ:ពេល ២ថ្ងៃ ស្នងការដ្ឋាន ន.ប រាជធានីភ្នំពេញ B បានក្លាយជាម្ចាស់ជ័យលាភីនៅមណ្ឌលព្រៃវែង ក្នុងការប្រកួតកីឡាបាល់ទះ 4×4 ទូទាំងប្រទេស Wurkz Special Volleyball Cup 2024។
មណ្ឌលព្រៃវែងនេះ គឺជាភូមិភាគទី៤ហើយ ក្នុងចំណោម ៥ភូមិភាគ ដោយការប្រកួតធ្វើឡើងកាលពីថ្ងៃសៅរ៍ ទី១៦ និងថ្ងៃអាទិត្យ ទី១៧ ខែមីនា នៅសាលបាល់ទះ ស.ស.យ.ក ព្រៃវែង ដែលមានចំនួន ១០ក្រុមចូលរួមប្រកួតប្រជែង។
សម្រាប់ចំណាត់ពីលេខ១ ដល់លេខ៣ ប្រចាំមណ្ឌលព្រៃវែង មាន៖
- ជ័យលាភីលេខ១ ស្នងការដ្ឋាន ន.ប រាជធានីភ្នំពេញ B
- ជ័យលាភីលេខ២ ស្នងការដ្ឋាន ន.ប ខេត្តកណ្ដាល
- ជ័យលាភីលេខ៣ ស្នងការដ្ឋាន ន.ប ខេត្តស្វាយរៀង
គិតមកដល់ពេលនេះការប្រកួត Wurkz Special Volleyball Cup 2024 បានបញ្ចប់ចំនួន ៤ភូមិភាគរួមហើយ ដោយភូមិភាគទី១ គឺមណ្ឌលបាត់ដំបង ម្ចាស់ជ័យលាភីបានទៅលើ ក្លិបកីឡាបាល់ទះបាត់ដំបង និងភូមិភាគទី២ គឺមណ្ឌលសៀមរាប ម្ចាស់ជ័យលាភីបានទៅលើ ក្លិបកងពលធំអន្តរាគមន៍លេខ៣ (B) និងភូមិភាគទី៣ គឺមណ្ឌលកំពង់ចាម ម្ចាស់ជ័យលាភី បានទៅលើ ក្លិបស្នងការដ្ឋាន ន.ប ខេត្តត្បូងឃ្មុំ។
សម្រាប់គោលដៅបន្ទាប់ដែលគ្រោងរៀបចំពាន WURKZ SPECIAL VOLLEYBALL CUP 4×4 2024 ចុងក្រោយគឺ ភូមិភាគទី៥ មណ្ឌលព្រះសីហនុ ដែលនឹងចាប់ធ្វើឡើងនៅថ្ងៃទី ២៣-២៤ ខែមិនា 2024 នៅក្នុងនោះមានខេត្ត កំពង់ស្ពឺ ព្រះសីហនុ កែប កំពត កោះកុងជាដើម។
ក្រោយបញ្ចប់ការប្រកួតទាំង ៥ភូមិភាគ ម្ចាស់ជ័យលាភីដែលទទួលបានលេខ១ និងលេខ២ មានឈ្មោះដោយស្វ័យប្រវត្តិសម្រាប់ធ្វើការប្រកួតនៅរាជធានីភ្នំពេញ ដែលជាវគ្គជុំផ្ដាច់ព្រ័ត្រគ្រោងនឹងរៀបចំនៅថ្ងៃទី ២២ ដល់ថ្ងៃទី ២៨ ខែមេសា ឆ្នាំ២០២៤។
គួរបញ្ជាក់ថា សម្រាប់មណ្ឌលរាជធានីភ្នំពេញ នឹងផ្ដល់ឱកាសទៅដល់បណ្ដាល ក្លិបធំៗទាំង ៦ដែលជាប់លេខរៀងពីលេខ ១ដល់លេខ ៦នៅក្នុងព្រឹត្តិការណ៍ តេជោលីគ ត្រូវឈរជើងចាំ ចំពោះបេក្ខជនដែលមកតាមបណ្ដាលខេត្ត ឬភូមិភាគទាំង៥៕
