កីឡាករ វ៉ាន វ៉ុន ជាកីឡាករតែមួយរូបរបស់កម្ពុជា ដែលគណៈកម្មាធិការជាតិប៉ារ៉ាឡាំពិកកម្ពុជាបញ្ជូនចេញទៅចូលរួមប្រកួតក្នុងព្រឹត្តិការណ៍កីឡាប៉ារ៉ាឡាំពិកឆ្នាំ២០២០ (2020 Summer Paralympics) នៅទីក្រុងតូក្យូ ប្រទេសជប៉ុន ចុងខែសីហា ឆ្នាំ២០២១ នេះ។
កីឡាកររូបនេះនឹងចូលរួមប្រកួតក្នុងប្រភេទកីឡា T54 ចម្ងាយ១០០ម៉ែត្រផ្នែកបុរស។ នេះជាលើកទី២ហើយដែលកីឡាករ វ៉ាន វ៉ុន ចូលរួមប្រកួតកីឡាប៉ារ៉ាឡាំពិក ខណៈលើកដំបូងបានបង្ហាញខ្លួនក្នុងការប្រកួតឆ្នាំ២០១៦ នៅទីក្រុងរីយូ ប្រទេសប្រេស៊ីល ដោយប្រើថិរវេលាបាន១៥.៤៤វិនាទី ហើយម្ចាស់មេដាយមាស Leo-Pekka Tähti ជនជាតិហ្វាំងឡង់ ធ្វើបាន១៣.៩០វិនាទី។
នេះជាលើកទី៦ហើយ ដែលកម្ពុជា បញ្ជូនអត្តពលិកទៅប្រកួតក្នុងព្រឹត្តិការណ៍ប៉ារ៉ាឡាំពិក ដោយក្នុងនោះមានឆ្នាំ២០០០,២០០៤,២០០៨,២០១២,២០១៦និង២០២០ នេះ។
កីឡា 2020 Summer Paralympics បើកឱ្យប្រកួតចំនួន២២កីឡា មាន៥៤០វិញ្ញាសា ដោយចាប់ផ្ដើមប្រកួតពីថ្ងៃទី២៤ សីហា ដល់៥ កញ្ញា ឆ្នាំ២០២១ នៅប្រទេសជប៉ុន ដោយរំពឹងថានឹងមានអត្តពលិកចូលរួមប្រកួតប្រមាណជាង៤ពាន់៕
