នៅរសៀលថ្ងៃទី២០ ខែសីហា ឆ្នាំ២០២១ ផេកផ្លូវការ Miss Cambodia បានចេញមកផុសចែករំលែកដំណឹងដ៏ល្អមួយសម្រាប់នារីមានរូបសម្រស់ស្អាតតែកម្ពស់ទាប។
កម្មវិធីប្រកួតសម្រស់ភាគច្រើន តែងតែកំណត់លុះត្រាតែនារីស្អាតម្នាក់នោះស្អាតហើយមានកម្ពស់ត្រូវលក្ខខណ្ឌនៃកម្មវិធីទើបអាចដាក់ពាក្យចូលរួមប្រកួតបាន ដែលធ្វើឱ្យនារីមុខមាត់ស្អាត តែកម្ពស់ខុសស្ដង់ដារមួយភាគធំត្រូវបាត់បង់ឱកាសបង្ហាញសមត្ថភាពនិងសម្រស់លើវេទិកា។
យ៉ាងណាមិញ នារីរូបស្អាត តែកម្ពស់មិនសូវបាន នឹងលែងមានកង្វល់ចំពោះរឿងនេះទៀត ព្រោះវេទិកាប្រកួត Miss Cambodia 2021 បានលុបចោលលក្ខខណ្ឌកំណត់កម្ពស់ចេញពីីលក្ខន្តិកៈនៃការដាក់ពាក្យប្រកួតហើយ។
យោងតាមការប្រកាសពីគណៈកម្មការរៀបចំកម្មវិធី Miss Cambodia 2021 បានប្រកាសសេចក្ដីជូនដំណឹងនៅលើបណ្ដាញសង្គមតាម Page ផ្លូវការ Miss Cambodia Pageant យ៉ាងដូច្នេះថា៖
« សេចក្តីជូនដំណឹង !!គណៈកម្មការរៀបចំកម្មវិធីប្រកួត Miss Cambodia 2021សូមជូនដំណឹងដល់បេក្ខនារីដែលមានចំណាប់អារម្មណ៍ដាក់ពាក្យចូលរួមប្រកួតថាគណៈកម្មការរៀបចំកម្មវិធីប្រកួត បានសម្រេចលុបចោល លក្ខខណ្ឌនៃការកំណត់កម្ពស់ របស់បេក្ខនារី (ពុំចាំបាច់បារម្ភរឿងកម្ពស់ឡើយ) ព្រោះយើងខ្ញុំប្រកាន់យកគោលការណ៍ សមភាពគ្នា ឱ្យបានទូលំទូលាយបំផុត។#MissCambodia2021#MissWorldCambodia2021#MissWorld2021»
យោងតាមការសេចក្ដីប្រកាសជូនដំណឹងខាងលើនេះ នឹងធ្វើឱ្យនារីរូបស្អាតជាច្រើននាក់ ដែលបាត់ឱកាសបង្ហាញសមត្ថភាពនិងសម្រស់ ដោយសារតែបញ្ហាកម្ពស់ មានឱកាសបានចូលរួមកាន់ច្រើនកុះករថែមទៀត៕