ថ្នាក់ដឹកនាំសហព័ន្ធខ្មែរកីឡាហែលទឹក និងគណៈកម្មការសាងសង់ នៅពីថ្ងៃទី២០ ខែសីហា ឆ្នាំ២០២១ បានចុះពិនិត្យការសាងសងមណ្ឌលហែលទឹក ខេត្តបាត់ដំបង ស្តង់ដារអន្តរជាតិ និងមានតម្លៃប្រមាណ ២លានដុល្លារអាមេរិក។ នេះបើតាមការបញ្ជាក់របស់សហព័ន្ធខ្មែរកីឡាហែលទឹក នៅលើហ្វេសប៊ុករបស់ខ្លួន។
លោក ហែម គិរី អគ្គលេខាធិការ នៃសហព័ន្ធកីឡាខ្មែរហែលទឹក បានឲ្យដឹងថា៖«មណ្ឌលហែលទឹកខេត្តបាត់ដំបង បានរួចរាល់ជាស្ថាពរហើយ ប៉ុន្តែយើងនៅបំពាក់បរិក្ខារមួយចំនួនទៀត ដើម្បីបញ្ឈប់ បើគិតពីការងារធំៗ ចប់អស់ហើយ ហើយនឹងពិនិ្យ វាយតម្លៃដងទៀត ដើម្បីធ្វើពិធីប្រគល់ តាមការណែនាំពី ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរ កីឡាហែលទឹក ដោយបង្កើតគណៈកម្មការទទួលពីក្រុមហ៊ុនមក»។
លោកអគ្គលេខាធិការ បានបន្តទៀតថា៖«អាងទឹកនេះកសាងឡើង ដោយយកគំរូប្លង់ តាមមណ្ឌលកីឡាហែលទឹក តេជោសែន ខេត្តកំពង់ចាម ដោយគំរោងប្រើប្រាស់ ថវិកាប្រមាណ ២,០០០, ០០០ ដុល្លារ (ពីរលានដុល្លារ សហរដ្ឋអាមេរិក) ដើម្បីអាចឲ្យកីឡាករ-កីឡាការនី ទាំងជាតិ និងអន្តរជាតិ ក៏ដូចជាមហាជន ទូទៅ ធ្វើការហ្វឹកហាត់ កីឡាហែលទឹក ដើម្បីសុខភាព។ អាងទឹកនេះ ក៏ជាកន្លែង ប្រកួតកម្រិតជាតិ ឬអាចប្រកួតកម្រិត តំបន់បាន។ សាងសង់ មណ្ឌលកីឡា ហែលទឹកនៅ ខេត្តបាត់ដំបងនេះ ជាផែនការមេ របស់សហព័ន្ធកីឡាខ្មែរហែលទឹក ក្នុងការអភិវឌ្ឍ និង បណ្ដុះ បណ្ដាល កីឡាករ-កីឡាការនីឈុតធំ និងថ្នាលដើម្បីត្រៀម ចូលរួមប្រកួតព្រឹត្តិការណ៍ កីឡាកីឡាថ្នាក់ខេត្ត ថ្នាក់ជាតិ និងការប្រកួតកីឡាស៊ីហ្គេម ២០២៣ ( SEA GAMES 2023 ) នាពេលខាងមុខ៕
