ក្រោយគ្រងជើងឯក នៃការប្រកួតពានរង្វាន់បាល់ទាត់ក្រសួងមហាផ្ទៃ” លើកទី១ ឆ្នាំ២០២៤ ក្រុមបាល់ទាត់អគ្គនាយកដ្ឋានអន្តោប្រវេសន៍ បានដង្ហែរពានរង្វាន់ជើងឯក មកកាន់ប៉ុស្តិ៍នគរបាលច្រកទ្វារព្រំដែនអន្តរជាតិបាវិត នៅថ្ងៃទី០២ ខែមេសា ឆ្នាំ២០២៤នេះ។
ជ័យជម្នះរបស់ក្រុមបាល់ទាត់អគ្គនាយកដ្ឋានអន្តោប្រវេសន៍ បន្ទាប់ពីយកឈ្នះ ក្រុមបាលទាត់អគ្គស្នងការដ្នាននគរបាលជាតិ ក្នុងលទ្ធផល ៣ទល់នឹង០ នៅវគ្គផ្ដាច់ព្រ័ត្រ កាលពីរសៀលថ្ងៃទី២៥ ខែមីនា ឆ្នាំ២០២៤ នៅពហុកីឡដ្ឋានជាតិអូឡាំពិក។
រំលឹកថា ការរៀបចំ ពានរង្វាន់ បាល់ទាត់ក្រសួងមហាផ្ទៃ” លើកទី១ ឆ្នាំ២០២៤ នេះមានការចូលរួមពីបណ្ដាក្លឹបអគ្គស្នងការដ្ឋាន ក្លិបអគ្គលេខាធិការដ្ឋាន ក្លិបអគ្គនាយកដ្ឋាននានាសរុបចំនួន ១៥ក្លិប បែងចែកជា ៤ពូលមាន៖ ពូល A, ពូល B, ពូល C និង ពូល D។
គួរបញ្ជាក់ថា ការប្រកួតពានរង្វាន់បាល់ទាត់ក្រសួងមហាផ្ទៃ បានចាប់ផ្ដើមប្រកួតពីថ្ងៃទី០១ ខែមីនា និងបញ្ចប់នៅថ្ងៃទី២៥ ខែមីនា ឆ្នាំ២០២៤ ដោយពិធីបើក-បិទ ធ្វើឡើងនៅពហុកីឡដ្ឋានជាតិ ក្រោមអធិបតីភាពឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ៕
