លោក យី សុភក្រ្តា ជានាយបេសសកម្ម គ្រូបង្វឹក និង ជាអ្នកសម្របសម្រួលកូវីត-១៩ ប្រចាំប្រទេសកម្ពុជានិងលោក វ៉ាន វ៉ុន ជាកីឡាករប្រណាំងរទេះ T54 លើវិញ្ញាសារ ១០០ម៉ែត្រ បានធ្វើដំណើរទៅដល់ប្រទេសជប៉ុន ហើយនៅព្រឹកថ្ងៃចន្ទ ទី២៣ ខែសីហា ឆ្នាំ២០២១ នេះដើម្បីត្រៀមប្រកួតក្នុងព្រឹត្តិការណ៍កីឡាប៉ារ៉ាឡាំពិករដូវកាលក្ដៅឆ្នាំ២០២០ (2020 Summer Paralympics) នៅទីក្រុងតូក្យូ ប្រទេសជប៉ុន។
លោក យី វាសនា បានបញ្ជាក់លើហ្វេសប៊ុករបស់ខ្លួនមុនចេញដំណើរថា លោកចាកចេញពីកម្ពុជា នៅថ្ងែទី២២ ខែសីហា វេលាម៉ោង ១៨:២៥ ហើយដល់ ជប៉ុន ថ្ងៃទី ២៣ ខែសីហា ម៉ោង ៨:០០ និងវិលត្រលប់មកវិញនៅថ្ងែទី ៧ ខែកញ្ញា វេលាម៉ោង ២២:៥៥ និងមកដល់កម្ពុជា ថ្ងៃទី ៨ ខែកញ្ញា ម៉ោង១៧:៣០។
«ខ្ញុំបាទសូមថ្លែងអំណរគុណ សម្តេចតេជោ នាយករដ្ឋមន្រី្ត នៃព្រះរាជាណាចក្រកម្ពុជា និងជាប្រធានគណៈកម្មាធិការជាតិប៉ារ៉ាឡាំពិកកម្ពុជា បានឧបត្ថម្ភទាំងស្រុង ក្នុងការចូលរួមការប្រកួតកីឡាប៉ារ៉ាឡាំពិកពិភពលោក ២០២០។ ខ្ញុំបាទសូមថ្លែងអំណរគុណ ឯកឧត្តមអគ្គលេខាធិការ នៃគណៈកម្មាធិការជាតិប៉ារ៉ាឡាំពិកកម្ពុជា និងមន្រ្តី នៃគណៈកម្មាធិការជាតិប៉ារ៉ាឡាំពិកកម្ពុជា ដែលបានយកចិត្តទុកដាក់ដល់ប្រតិភូកីឡា។ ខ្ញុំបាទសូមថ្លែងអំណរគុណដល់ក្រសួង ស្ថាបន័ពាក់ព័ន្ធ ទាំងអស់។ សូមអរគុណ បងប្អូនអ្នកសារពត៌មានកីឡាដែលបានជួយផ្សព្វផ្សាយ និងសូមចូលរួមគាំទ្រទាំងអស់គ្នា ដើម្បីជាកំលាំងចិត្តដល់ប្រតិភូកីឡា ក៏ដូចជាអត្តពលិកយើងផងដែរ»។
នេះជាលើកទី៦ហើយ ដែលកម្ពុជា បញ្ជូនអត្តពលិកទៅប្រកួតក្នុងព្រឹត្តិការណ៍ប៉ារ៉ាឡាំពិក ដោយក្នុងនោះមានឆ្នាំ២០០០,២០០៤,២០០៨,២០១២,២០១៦និង២០២០ នេះ។ កីឡា 2020 Summer Paralympics បើកឱ្យប្រកួតចំនួន២២កីឡា មាន៥៤០វិញ្ញាសា ដោយចាប់ផ្ដើមប្រកួតពីថ្ងៃទី២៤ សីហា ដល់៥ កញ្ញា ឆ្នាំ២០២១ នៅប្រទេសជប៉ុន ដោយរំពឹងថានឹងមានអត្តពលិកចូលរួមប្រកួតប្រមាណជាង៤ពាន់៕
