ពានរង្វាន់បាល់ទាត់ឆ្នេរខ្សាច់ជើងឯកពិភពលោក 2021 FIFA Beach Soccer World Cup កំពុងរៀបចំនៅទីក្រុងមូស្គូ ប្រទេសរុស្ស៊ី បានរកឃើញក្រុមឆ្លងផុតវគ្គចែកពូលបណ្តើរៗហើយ ដោយក្នុងនោះមានក្រុម ជប៉ុន,សេណេហ្គាល់ និងស្វីស តែក្រុមផ្សេងទៀតចាំអ៊ុតប្រកួតបិទពូលសិន។
ពានរង្វាន់ 2021 FIFA Beach Soccer World Cup មានក្រុមចូលរួមចំនួន១៦ក្រុមមកពី៦ទ្វីបផ្សេងគ្នា ដោយបែងចែកជា៤ពូលប្រកួតពីថ្ងៃទី១៩ ដល់ថ្ងៃទី២៩ ខែសីហា ឆ្នាំ២០២១ នៅលើទីលាន Luzhniki Beach Soccer Stadium។
ពូល A មានជប៉ុន រុស្ស៊ី អាមេរិក និងប៉ារ៉ាហ្គាយ ពូល B មានតាហ៊ីទី អេស្ប៉ាញ ម៉ូហ្ស៊ំប៊ី និងអារ៉ាប់រួម ពូល C មានស្វីស ប្រេស៊ីល បេឡារុស្ស និង អែលសាល់វាឌ័រ ពូល D មានសេណេហ្គាល់ ព័រទុយហ្គាល់ អ៊ុយរុយហ្គាយ និងអូម៉ង់។ ពូលទាំង៤នៅសល់១ប្រកួតចុងក្រោយរៀងៗខ្លួន មុនបញ្ចប់វគ្គជម្រុះតាមពូល។ ក្រុមខ្លាំងតាមពូលនីមួយៗចំនួន២ក្រុមមានឈ្មោះឡើងទៅលេងវគ្គ៨ក្រុមចុងក្រោយដើម្បីស្វែងរកឱកាសឡើងទៅដណ្តើមជើងឯក។
គិតត្រឹមពេលនេះកីឡាករ Figo របស់ប្រទេសម៉ូហ្ស៊ុំប៊ី រកបានគ្រាប់បាល់៧គ្រាប់ម្នាក់ឯង។
ប្រកួតបិទពូល A ថ្ងៃទី២៣ សីហា ២០២១៖
-អាមេរិក Vs ប៉ារ៉ាហ្គាយ
-ជប៉ុន Vs រុស្ស៊ី
ប្រកួតបិទពូល B ថ្ងៃទី២៣ សីហា ២០២១៖
-តាហៃទី Vs ម៉ូហ្ស៊ំប៊ី
-អេស្ប៉ាញ Vs អារ៉ាប់រួម
ប្រកួតបិទពូលC ថ្ងៃទី២៤ សីហា ២០២១៖
-អែលសាវ៉ាឌ័រ Vs ស្វីស
-ប្រេស៊ីល Vs បេឡារុស្ស
ប្រកួតបិទពូល D ថ្ងៃទី២៤ សីហា ២០២១៖
-អូម៉ង់ Vs សេណេហ្គាល់
-អ៊ុយរុយហ្គាយ Vs ព័រទុយហ្គាល់
ការប្រកួតនេះមានអាជ្ញាកណ្ដាលដឹកនាំចំនួន២៤រូបដោយក្នុងនោះមាន៤រូបទៅពីទ្វីបអាស៊ី ទ្វីបអាហ្វ្រិក ៣រូប ទ្វីបអាមេរិកខាងជើង៣រូប ទ្វីបអាមេរិកខាងត្បូង៥រូប ទ្វីបអូសេអានី ១រូបនិងទ្វីបអឺរ៉ុប ៨រូប៕