លោកតា ស៊ិន ស៊ីសាមុត គឺជាតារាចម្រៀងមានឈ្មោះល្បីល្បាញខ្លាំងកាលពីអំលុងទសវត្សរ៍ឆ្នាំ ៥០ ដល់ ៧០ ថ្វីត្បិតតែលោកបានស្លា.ប់បាត់បង់ជីវិតដោយសារតែក្រុមប៉ុលពត សម្លា.ប់ក្ដី ប៉ុន្តែបទចម្រៀងដ៏ពីរោះរណ្ដំរបស់លោកនៅតែបំពេរអារម្មណ៍អ្នកស្ដាប់ឱ្យលន្លង់លន្លោច និង ស្រណោះស្រណោក ស្ដាយចំពោះការបាត់បង់ធនធានដ៏មានតម្លៃមិនអាចកាត់ថ្លៃបានរបស់ជាតិរូបនេះជាពន់ពេកណាស់។
តើមានមនុស្ស ប៉ុន្មាននាក់ដឹងថាថ្ងៃទី២៣ ខែសីហា នេះគឺជាថ្ងៃកំណើតរបស់អធិរាជសំឡេងមាស ស៊ិន ស៊ីសាមុត?
យោងតាមការប្រកាសរបស់ Admin Page ដែលមានឈ្មោះថា ស៊ីន ស៊ីសាមុត – Sin Shisamuth បានធ្វើការបង្ហោះសំណេរឱ្យដឹងថាថ្ងៃនេះគឺជាថ្ងៃខួបកំណើតទី៨៨ របស់អធិរាជសំឡេងមាស ប្រសិនបើលោកនៅមានជីវិតមកដល់ឆ្នាំ២០២១ នេះ លោកតាមានអាយុគ្រប់ ៨៨ឆ្នាំហើយ ព្រោះលោកកើតនៅថ្ងៃទី២៣ ខែសីហា ឆ្នាំ១៩៣៣។
ប៉ុន្តែតារាចម្រៀងដ៏ល្បីល្បាញ និង ទទួលបានការស្រលាញ់គាំទ្រជាអមតៈរូបនេះ បានទទួលមរណភាព ក្នុងរបបប្រល័យពូជសាសន៍ ខ្មែរក្រហម នៅថ្ងៃទី១៨ ខែឧសភា ឆ្នាំ១៩៧៦ ក្នុងអាយុត្រឹមតែ៤៣ ឆ្នាំប៉ុណ្ណោះ។
គួរដឹងថាលោក ស៊ិន ស៊ីសាមុត មានស្រុកកំណើតនៅខេត្ត ស្ទឹងត្រែង លោករៀបការចំនួន២ដង ដោយលោកមាន បុត្រាបុត្រី៤នាក់។ បន្ទាប់ពីសម័យខ្មែរក្រហម មានតែកូនស្រីម្នាក់និងកូនប្រុសម្នាក់ទេដែលរួចរានមានជីវិត។ ក្នុងនោះដែរកូនប្រុសលោកតា គឺលោក ស៊ីន ចាន់ឆាយា ក៏ជាតារាចម្រៀងដូចជាឪពុកដែរ ប៉ុន្តែជាអកុសលលោកបានទទួលមរណភាពកាលពីឆ្នាំ២០១៥ ដោយរអិលជើងដួល៕
