យុវជនអាហ្គានីស្ថានបានដុតរូបភាព ក៏ដូចជាយកអាល់ប៊ុមចម្រៀងរបស់ក្រុម BTS លាក់ទុក ដោយសារតែខ្លាចក្រុមតាលីបង់សម្លា.ប់។ យុវជនម្នាក់និយាយថា ស្ថានភាពបច្ចុប្បន្នរបស់យុវជនក្នុងប្រទេសនេះគឺបង្ខំចិត្តដុតចោលឬយកអាល់ប៊ុមចម្រៀងក្រុម BTS ទៅលាក់ទុកព្រោះកន្លងមកក្រុមតាលីបង់មិនអនុញ្ញាតឱ្យមនុស្សស្ដាប់ចម្រៀងនោះឡើយ។
បន្ទាប់ពីក្រុមតាលីបង់ចូលមកគ្រប់គ្រង់និងក្ដោបក្ដាប់ ប្រទេសអាហ្គានីស្ថានធ្វើឱ្យយុវជនយុវនារីក្នុងប្រទេសនេះមានភាពភ័យខ្លាច ពិសេសបារម្ភបំផុតនោះ គឺសុខសុវត្ថិភាព និង អាយុជីវិតរបស់ពួកគេផ្ទាល់តែម្ដង។
យោងតាមការចុះផ្សាយរបស់ទូរទស្សន៍ JTBC បានផ្សាយរឿងរ៉ាវជាច្រើនរបស់នារីជនជាតិអាហ្គានីស្ថានដែលភ័យខ្លាចខ្លាំងក្រោមការត្រួតត្រារបស់ក្រុមតាលីបង់ ពួកគេបាននិយាយថា ពួកគេខ្លាច ហើយក៏ភ្ញាក់ផ្អើលខ្លាំងដែរដែលក្រុមនេះចូលមកកាន់ប្រទេសរបស់ខ្លួន ដោយសារតែកន្លងមកធ្លាប់ឮថាក្រុមតាលីបង់បានចាប់ពង្រត់ក្មេងស្រី។ ក្រោយពីក្រុមតាលីបង់ក្ដោបក្ដាប់ប្រទេសទាំងស្រុង ស្ត្រីវ័យក្មេងជាច្រើននៅតែក្នុងផ្ទះមិនហ៊ានចេញទៅក្រៅនោះទេ។
បន្ថែមលើសពីនោះពួកគេលែងហ៊ានចាក់បទចម្រៀងស្ដាប់ ចំណែកនៅតាមផ្លូវនិងទីសាធារណៈ ឮសូរតែចម្រៀងប្លែកៗរបស់ក្រុមតាលីបង់ពីព្រឹកវាស់ល្ងាច។ និស្សិតវ័យ១៨ឆ្នាំម្នាក់ក៏បានលើកយកចំណុចមួយបង្ហាញដែរថា ស្ថានភាពបច្ចុប្បន្នបង្ខំឱ្យពួកខ្លួនដុតរូបឬក៏ដួចជាលាក់រូបនិងអាល់ប៊ុមចម្រៀងក្រុម BTS ព្រោះ ក្រុមតាលីបង់មិនអនុញ្ញាតឱ្យស្ដាប់ចម្រៀងនោះទេ។ ក្មេងស្រីអាហ្គានីស្ថាន បានអំពាវនាវ សុំឱ្យពិភពលោក យកចិត្តទុកដាក់និងតាមដានស្ថានការណ៍នៅក្នុងប្រទេសខ្លួនឱ្យកាន់តែខ្លាំងថែមទៀត។
ជាការពិតណាស់ភាពភ័យខ្លាចរបស់យុវវ័យអាហ្គានីស្ថាន មិនមែនមិនមានមូលហេតុនោះឡើយ ព្រោះកាលពីថ្ងៃទី១៥ ខែសីហា ឆ្នាំ២០២១ ក្រុមតាលីបង់បានទៅចាប់អ្នកកំប្លែងល្បីឈ្មោះជនជាតិអាហ្គានីស្ថាន គឺ លោក Nazar Mohammad ដល់ក្នុងផ្ទះរួចហើយដឹកយកលោកទៅបាញ់សម្លា.ប់លោកចោល។
គួរដឹងថា មេដឹកនាំក្រុមតាលីបង់ ចូលគ្រប់គ្រងវិមានប្រធានាធិបតីអាហ្វហ្កានីស្ថាន និងគ្រប់គ្រងលើប្រទេសនេះទាំងស្រុង ក្រោយប្រធានាធិបតីលោក អាស្ត្រា ហ្គានី (Ashraf Ghani) ភៀសខ្លួនចេញពីប្រទេសទៅកាន់តាហ្ស៊ីគីស្ថាន៕
