សិល្បៈជាតិ៖ ឈានចូលដើមឆ្នាំ២០២៤ ពោលគឺកាលពីអំឡុងខែកុម្ភៈ មានលេចចេញនូវដំណឹងអកុសលថា លោក ណូយ វ៉ាន់ណេត ដែលជាកំពូលតារាចម្រៀងជើងចាស់បានទទួលមរណភាព ដោយរឿងនេះចេញដំបូងព្រោះគណនីតិកតុកមួយឈ្មោះ Bong Nha និងទំព័រហ្វេសប៊ុកមួយឈ្មោះ Peter S Meng បានបង្ហោះរូបភាពតារារូបនេះព្រមទាំងសរសេរអក្សរលើរូបនោះថា R.I.P ដែលចង់សំដៅដល់ការស្លាប់ ដោយអក្សរនេះមានន័យថាសូមទៅកាន់សុគតិភព។
ក្រោយពីផ្ទុះការចែករំលែកនិងមានការបង្ហោះសាររំលែកទុក្ខចំពោះវីរៈសិល្បករជើងចាស់រូបនេះ ក៏មានទាំងអ្នកជឿ និងមិនជឿ ព្រមស្វែងរកការពិតថាតើនោះគឺជារឿងពិតឬមិនពិត។ យ៉ាងណាមិញ ក្រោយផ្ទុះរឿងប្រមាថដល់អាយុជីវិតខ្លួនទាំងបំពានការពិតដូច្នេះ លោកណូយ វ៉ាន់ណេត បានចេញមក Live បកស្រាយ ព្រមទាំងព្រមានថានឹងចាត់វិធានការតាមផ្លូវច្បាប់ បើសិនមិនលុបចោលការបង្ហោះគ្មានមូលដ្ឋាន និងសុំទោសជាសាធារណៈទេនោះ។
ថ្លែងពីករណីនេះប្រាប់អ្នកសារព័ត៌មានត្រយង តារាចម្រៀងជើងចាស់នៅក្នុងពិភពសិល្បៈចម្រៀងរូបនេះ បានអះអាងថាសុខភាពល្អនៅតែមាំទាំល្អ មិនមានជំងឺអ្វីឡើយ ដោយលោកបានរំលឹកដល់រឿងអ្នកប្រមាថអាយុជីវិតលោក ព្រមទាំងផ្ដាំថាលោកនឹងប្រើធម៌ក្ដៅ ប្រសិនបើជនទាំងនោះនៅតែបន្តយកអាយុជីវិតលោកមកប្រមាថបែបនេះទៀត។
លោក ណូយ វ៉ាន់ណេត គឺជាវីរៈសិល្បករចម្រៀងជើងចាស់ ដែលមានបទពិសោធខ្ពស់ និង ឈ្មោះល្បីល្បាញព្រោះតែទឹកដមសំឡេងពីរោះ ជាពិសេសបទចម្រៀងរបស់លោកភាគច្រើនជាបទចម្រៀងមនោសញ្ចេតនា ដែលឆាបឆក់ដួងចិត្តអ្នកស្ដាប់ឱ្យលន្លង់លន្លោចទៅតាមបទចម្រៀង៕
