សិល្បៈជាតិ៖ អ្នកលេងបណ្ដាញសង្គម ពិសេសក្រុមអ្នកនិយមស្រលាញ់គាំទ្រសិល្បៈនិងវប្បធម៌ បានបង្ហាញអារម្មណ៍ស្ញប់ស្ញែងចំពោះរូបភាពទាំង ៥៤ សន្លឹករបស់លោកជំទាវ កែ សួនសុភី តុបតែងកាយជា «ព្រះនាងជ័យរាជទេវី» នៅប្រាសាទព្រះខ័នដើម្បីចូលរួមផ្សព្វផ្សាយនឹងលើកស្ទួយសិល្បៈដូនតាខ្មែរ។
ជាការពិតណាស់ មនុស្សទូទៅមិនសូវជាដឹងច្រើនឡើយអំពីព្រះនាង ជ័យរាជទេវី ដោយគ្រប់គ្នាភាគច្រើន ស្គាល់ច្បាស់អំពីព្រះនាង ឥន្ទ្រទេវី ប៉ុន្តែតាមរយៈការតុបតែងកាយ ដើម្បីជាស្មារតីបំផុតគំនិតចូលរួមផ្សព្វផ្សាយនឹងលើកស្ទួយវប្បធម៌សិល្បៈដូនតាខ្មែរ របស់លោក ជំទាវ កែ សួនសុភី ដោយមានការស្រាវជ្រាវនិងភ្ជាប់នូវខ្លឹមសារមានអត្ថន័យដ៏ស៊ីជម្រៅផងនោះ ធ្វើឱ្យអ្នកលេងបណ្ដាញសង្គមជាច្រើនបង្ហាញពីការស្ញប់ស្ញែងនិងពោលសរសើរមិនដាច់ពីមាត់។
តាមរយៈសំណេរដ៏មានខ្លឹមសារចាក់ដល់បេះដូងមហាជន និងស្ត្រីខ្មែរគ្រប់រូប លោកជំទាវ កែ សួនសុភី បានលើកឡើងថា ការចូលរួមតុបតែងកាយជា «អង្គវីរៈនារីខ្មែរព្រះនាងជ័យរាជទេវី» នាពេលនេះ គឺលោកជំទាវមានគោលបំណងចង់បង្ហាញពីតួអង្គស្ត្រីខ្មែរដែលលះបង់ពលីគ្រប់យ៉ាងដើម្បីស្វាមី។ លោកជំទាវ កែ សួនសុភី រៀបរាប់ជាសំណេរថា ៖ «បំណងប្រាថ្នារបស់នាងខ្ញុំគឺតែងតួអង្គវីរៈនារីខ្មែរព្រះនាងជ័យរាជទេវី ដែលជាតួអង្គសំខាន់មួយចំណោមតួអង្គខ្មែរយើងស្ត្រីដែលលះបង់គ្រប់យ៉ាងដើម្បីព្រះស្វាមី កាន់ភ្ជាប់ព្រះពុទ្ធសាសនា និងស្រលាញ់ប្រទេសជាតិ»។
ដោយឡែក លោកជំទាវ ក៏បានសរសេរខ្លឹមភ្ជាប់ជាមួយការពន្យល់បន្ថែមអំពី ការប្រណិបតិន៍របស់ព្រះនាងជ័យរាជទេវីចំពោះព្រះស្វាមីថា ព្រះនាងទ្រង់យល់ច្បាស់នូវច្បាប់ព្រះពុទ្ធសាសនា ហើយព្រះនាងមានព្រះទ័យស្មោះចំពោះព្រះស្វាមី គោរពប្រតិបត្តិតាមសង្គហធម៌ រវាងស្វាមីនិងភរិយាឥតមានខ្វះចន្លោះត្រង់ណាឡើយ។ កិច្ចវត្តរបស់ភរិយាដែលត្រូវបំពេញចំពោះស្វាមី ព្រះនាងជ័យរាជទេវីបានបំពេញឥតមានសល់ចន្លោះកន្លែងណា។ ទោះជាព្រះនាងមានឋានៈខ្ពង់ខ្ពស់យ៉ាងណាក៏ដោយ ក៏ព្រះនាងនៅតែបំរើព្រះស្វាមីឱ្យសមតាមឋានៈ។ ព្រះនាងមិនបណ្តោយឱ្យភិលៀងចាត់ចែងមុខងាររបស់ស្រ្តីថ្វាយព្រះស្វាមីទេ ដោយទ្រង់បំពេញមុខងារជាភរិយាដោយព្រះហស្ថផ្ទាល់ចំពោះព្រះស្វាមី។ ពេលក្រយាស្ងោយ ព្រះនាងតែងតែរៀបចំដោយព្រះហស្ថផ្ទាល់ថ្វាយព្រះស្វាមី។ ពេលព្រះស្វាមីប្រឈួន និងនៅពេលប្រកបរាជកិច្ចនឿយហត់ ព្រះនាងតែងតែនៅក្បែរគក់ច្របាច់ថ្វាយស្វាមី។
សូមជម្រាបថា លោកជំទាវ កែ សួនសុភី កូនស្រីពៅរបស់ឯកឧត្តម កែ គឹមយាន និងលោកជំទាឧកញ៉ា ហេមចិន្តាអគ្គមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ ក្រៅពីបង្ហាញសកម្មភាពបម្រើការងារសង្គម និងជួយជ្រោងជ្រែងលើកវិស័យកីឡាយ៉ាងសស្រាក់សស្រាំហើយនោះ លោកជំទាវក៏បានចូលរួមយ៉ាងសកម្មក្នុងការរៀបចំព្រឹត្តិការណ៍ផ្សេងៗដើម្បីផ្សព្វផ្សាយពីសិល្បៈវប្បធម៌ខ្មែរ ជាពិសេសទៅលើការជំរុញផ្សព្វផ្សាយអំពីតំបន់ទេចរណ៍នានា ប្រាសាទបុរាណ មានប្រាសាទ បន្ទាយឆ្មារ ដែលជាសម្បត្តិបេតិកភណ្ឌជាតិដ៏មានតម្លៃមិនអាចកាត់ថ្លៃបានផងដែរ៕
