ប៉េកាំង៖ ហ្វីលីពីន នៅថ្ងៃអង្គារ នេះ បានចោទប្រកាន់ឆ្មាំឆ្នេរសមុទ្ររបស់ប្រទេសចិន ពីការយាយី និងបំផ្លាញនាវាចម្បាំងមួយរបស់ខ្លួន នៅក្នុងតំបន់ជម្លោះនៃដែនសមុទ្រចិនខាងត្បូង ហើយបានច្រានចោលជំហររបស់ទីក្រុងប៉េកាំង ដែលថា ខ្លួនបានបណ្តេញនាវា ២គ្រឿងចេញពីច្រាំងសមុទ្រដែលមានជម្លោះយ៉ាងក្តៅគគុកនោះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី៣០ ខែមេសា ឆ្នាំ២០២៤។
ឆ្មាំឆ្នេរសមុទ្រហ្វីលីពីនបាននិយាយថា នាវាពីររបស់ខ្លួនបានឈរជើងនៅឆ្នេរ Scarborough Shoal ដែលជាសមរភូមិដ៏សំខាន់នៅក្នុងសមុទ្រចិនខាងត្បូង ប៉ុន្តែមួយគ្រឿងបានរងការខូចខាតដោយសារការប្រើប្រាស់កាណុងបាញ់ទឹកដោយនាវាឆ្មាំឆ្នេរសមុទ្រចិន ចំនួន ២គ្រឿង។
អ្នកនាំពាក្យឆ្មាំឆ្នេរសមុទ្រហ្វីលីពីនលោក Jay Tarriela បាននិយាយនៅក្នុងសេចក្តីថ្លែងការណ៍មួយថា «ការខូចខាតនេះ ដើរតួជាភស្តុតាងនៃសម្ពាធលើដែនទឹកដ៏ខ្លាំងក្លាដែលប្រើដោយឆ្មាំឆ្នេរសមុទ្រចិន ក្នុងការយាយីរបស់ពួកគេចំពោះនាវាហ្វីលីពីន»។
អ្នកនាំពាក្យឆ្មាំឆ្នេរសមុទ្រហ្វីលីពីន បន្ដថា គ្មានប្រទេសណាមានអធិបតេយ្យភាពលើតំបន់ Scarborough Shoal ដែលជាកន្លែងនេសាទដ៏សំខាន់ដែលប្រើដោយប្រទេសមួយចំនួនដែលនៅជិតផ្លូវដឹកជញ្ជូនធំៗនោះទេ។
ប្រទេសចិនបានកាន់កាប់តំបន់នេះអស់រយៈពេលជាងមួយទសវត្សរ៍ មកហើយ ដែលជាជម្រកសម្រាប់នាវាតាំងពីយូរយារណាស់មកហើយ ពេលមានព្យុះ បានក្លាយជាកន្លែងនៃការប្រឈមមុខគ្នាជាច្រើនក្នុងប៉ុន្មានឆ្នាំថ្មីៗនេះ។
យ៉ាងណាម៉ិញ ឆ្មាំឆ្នេរសមុទ្រចិនបាននិយាយថា នាវាទាំងនោះត្រូវបានបណ្តេញចេញ ប៉ុន្តែមិនបានផ្តល់ព័ត៌មានលម្អិតអំពីឧបទ្ទវហេតុនេះទេ។
ប្រទេសទាំង២ បានចោទប្រកាន់ពីបទប្រព្រឹត្តខុសច្បាប់នៅច្រាំងសមុទ្រ ហើយថ្មីៗនេះហ្វីលីពីន បានកោះហៅអ្នកការទូតចិនម្នាក់ ដើម្បីពន្យល់ពីអ្វីដែលខ្លួនហៅថាសមយុទ្ធឈ្លានពាន ដែលជាធម្មតា ចិនចោទហ្វីលីពីនថា បានទន្ទ្រានទឹកដីរបស់ខ្លួន។
ចិន និងហ្វីលីពីនពីមុន បាននិយាយថា ពួកគេនឹងស្វែងរកទំនាក់ទំនង និងការគ្រប់គ្រងកាន់តែប្រសើរឡើងជុំវិញការប៉ះទង្គិចគ្នានៅសមុទ្រចិនខាងត្បូងដ៏ធំ ប៉ុន្តែភាពតានតឹងបានកើនឡើងនាពេលថ្មីៗនេះ ដោយសារហ្វីលីពីន បង្កើតទំនាក់ទំនងការទូត និងយោធាកាន់តែខ្លាំងជាមួយសម្ព័ន្ធមិត្តរបស់សហរដ្ឋអាមេរិក។
ប្រទេសចិនទាមទារអធិបតេយ្យភាពលើស្ទើរតែសមុទ្រចិនខាងត្បូងទាំងមូល ដែលជាច្រកសម្រាប់ពាណិជ្ជកម្មប្រចាំឆ្នាំជាង ៣ពាន់ពាន់លានដុល្លារអាមេរិក រួមទាំងផ្នែកដែលទាមទារដោយហ្វីលីពីន វៀតណាម ឥណ្ឌូនេស៊ី ម៉ាឡេស៊ី និងប្រ៊ុយណេ។
យ៉ាងណាម៉ិញ តុលាការអាជ្ញាកណ្តាលអចិន្ត្រៃយ៍ក្នុងឆ្នាំ២០១៦ បាននិយាយថាការទាមទារពង្រីករបស់ប្រទេសចិន មិនមានមូលដ្ឋានផ្លូវច្បាប់នោះទេ ការសម្រេចចិត្តមួយរបស់ទីក្រុងប៉េកាំងបានច្រានចោល។
