អ្នកនាង ទេព បូព្រឹក្ស ត្បិតជាតារាចម្រៀងសម័យយេយេ តុបតែងខ្លួនទាន់សម័យទំនើប ប៉ុន្តែបេះដូងនិងខួរក្បាលរបស់តារារូបនេះ ពោរពេញទៅដោយការស្រលាញ់ និងចង់លើកស្ទួយសិល្បៈវប្បធម៌ជាតិ បើទោះជាដឹងថាបទចម្រៀងខ្លះរបស់នាង ដែលលើកតម្កើង និងបង្ហាញពីសិល្បៈវប្បធម៌របស់ខ្មែរ អាចនឹងធ្វើឱ្យអ្នកនាងបាត់ហ្វេនមួយចំនួនពីប្រទេសថៃក្ដី។
បទចម្រៀង «ទេវរាជ» ដែលជាបទចម្រៀងមួយលាយបញ្ចូលគ្រប់សព្វបែបយ៉ាងទាំងសិល្បៈ វប្បធម៌ អាគមគាថា យ័ន្តខ្មែរ គឺជាបទចម្រៀងមួយដែលអ្នកគាំទ្របានរងចាំយ៉ាងអន្ទះសារ ចង់ឃើញពីផ្ទាំងទស្សនីយភាពដែលនឹងបង្ហាញនៅក្នុងបទនោះ យ៉ាងណាមិញការរងចាំបានមកដល់ទីបញ្ចប់ហើយ ព្រោះម្ចាស់បទបានចេញមកបញ្ជាក់តាមរយៈទំព័រហ្វេសប៊ុកខ្លួនថានៅថ្ងៃទី២ ខែឧសភា នឹងបញ្ចេញ Teaser បទចម្រៀងនេះជាផ្លូវការ។
បើតាមការលើកឡើងរបស់អ្នកនាង ទេព បូព្រឹក្ស នៅលើបណ្ដាញសង្គម៖ «ការប្រមូលផ្តុំនូវចំណុចសំខាន់ៗនៃប្រវត្តិសាស្រ្តទាំងបីសម័យកាលនៃយុគសម័យមាសត្រូវបានបង្គុំឲ្យចេញជារូបរាងនៅក្នុងអត្ថន័យនៃអត្ថបទចម្រៀងមួយបទដោយប្រសិទ្ធនាមថា “ទេវរាជ” ។ សំណេរនៃអត្ថបទចម្រៀង “ទេវរាជ” នេះបានរួមបញ្ចូលនូវការលើកស្ទួយ សម្បត្តិវប្បធម៌ ប្រវត្តិសាស្រ្ត ទេវកថា កាលបរិច្ឆេទនៃសម័យកាលនីមួយៗ គាថា អថ័ន យ័ន្ត និងអក្សរសិល្ប៍ប្រតិស្ឋានពីអង្គអាទិទេពស្តេចនៃលោកហៅថា “អ ឧ ម” ដោយបានចំណាយនូវថេរវេលាយ៉ាងច្រើនដោយកម្លាំងញើសឈាម។ ក្នុងវេលានេះយើងអាចនិយាយដោយបើកចំហបានថា នាថ្ងៃព្រហស្បតិ៍ ៩ រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី ២ ខែឧសភា ឆ្នាំ២០២៤ ជាថ្ងៃដែល ពួកយើងសម្រេចនឹងបញ្ចេញនូវ Teaser នៃវីដេអូចម្រៀង “ទេវរាជ” ជូនបងប្អូនជនរួមជាតិទស្សនា។ សូមបង្កើតឱកាសមួយនេះ ជាការបំផុសគំនិតបង្កើតនូវវេទិកាសិល្បៈវប្បធម៌បុរាណ សម័យ សហសម័យ ដោយកំណត់បាននូវ “បុរាណមិនយឺត សម័យមិនបរទេស” ពោលគឺជារបស់ដែលយើងមានគំនិតបង្កើតឱ្យចេញជាចលនាសាច់ស្រស់ឈាមស្រស់ ពុំមែនជាការស្រមើស្រមៃនោះឡើយ។ ពួកយើងធ្វើបាន បងប្អូនជនរួមជាតិក៏អាចធ្វើបាន ការចូលរួមពួតដៃគ្នាក្នុងពេលវេលាជាចង្កឹះមួយបាច់បានមកដល់ហើយ។ ដោយក្តីគោរពដ៏ខ្ពង់ខ្ពស់ពីនាងខ្ញុំ ទេព បូព្រឹក្ស»
ក្នុងនាមជា សិល្បការិនី មួយរូប អ្នកនាង ទេព បូព្រឹក្ស និងក្រុមការងារ បានចូលរួមយ៉ាងសកម្ម ក្នុងការជំរុញផ្សព្វផ្សាយអ្វីដែលជារបស់ខ្មែរ ឱ្យកូនខ្មែរជំនាន់ក្រោយបានដឹង ជាពិសេសគឺជាឯកសារប្រវត្តិសាស្ត្រតជំនាន់ព្រោះយើងគ្រប់គ្នាសុទ្ធតែដឹងថា បរទេសជិតខាង តែងតែចិញ្ចឹមចង់លេបត្របាក់សិល្បៈវប្បធម៌ខ្មែររហូតមក៕