តារាសម្ដែងជួរមុខនិងជាអ្នកជំនួញឈានមុខរបស់ប្រទេសចិន ម្ចាស់រហស្សនាមត្រចៀកកាំ Vicky Zhao ឬ ចៅ វ៉ី បានរួមសហការបណ្ដាក់ទុនជាមួយនឹងក្រុមហ៊ុនអាលីបាប៉ា ភីចឈ័រ ហ្គ្រុប ក្រុមហ៊ុនផលិតភាពយន្ត ស្ថិតក្រោមក្រុមហ៊ុនធំ អាលីបាបា ដោយមាន Jack Ma ជាអ្នកបបួលឱ្យតារាស្រី រូបនេះចូលរួមបណ្ដាក់ទុនក្នុងធុរកិច្ចមួយនេះ។
ត្រចៀកកាំ តួឯកស្រីពីភាពយន្តភាគបុរាណចិន «ព្រះនាងយ៉េយ៉េ» ដ៏ល្បីល្បាញ បច្ចុប្បន្នបានអភិវឌ្ឍខ្លួនទៅជាអ្នកធុរកិច្ច អ្នកបណ្ដាក់ទុន និងមានអចលទ្រព្យតម្លៃរាប់រយលានយ៉ន់។
ត្រចៀកកាំ មិនត្រឹមតែបណ្ដាក់ទុនក្នុងប្រទេសនោះទេ សេដ្ឋីនីរូបនេះក៏បានឆ្លងទៅបណ្ដាក់ទុននៅក្រៅប្រទេស ដូចជាចំការទំពាំងបាយជូ ក្នុងប្រទេសបារាំង និងហាងគ្រឿងអលង្ការក្នុងប្រទេសសិង្ហបុរីផងដែរ។ មិនត្រឹមតែប៉ុណ្ណេះនោះទេ ត្រចៀកកាំនៅបានបណ្ដាក់ទុនអចលនទ្រព្យជាង ៥០លានយ៉ន់ (ជិត៨លានដុល្លារ) ក្នុងទីក្រុងសៀវហៃ ចាប់តាំងពីឆ្នាំ 2006 គិតមកដល់បច្ចុប្បន្ននេះតម្លៃអចលនទ្រព្យទាំងអស់នេះមានតម្លៃប្រមាណ ៣០០លានយ៉ន់ ឬជាង៤៦លានដុល្លារ។
នៅក្នុងទីក្រុងប៉េកាំងត្រឹមតែមួយ ត្រចៀកកាំជាម្ចាស់អចលនទ្រព្យរហូតដល់ទៅ៣កន្លែង រួមមានទីតាំងទីមួយ Palais De Fortune វីលឡាដែលមានតម្លៃប្រមាណ ៣០លានយ៉ន់ (ប្រមាណ៤លានដុល្លារ) ទីពីរ Apartment Landmark ដែលបានទិញតាំងពីឆ្នាំ ២០០៦ ដោយតម្លៃ ៦ លានយ៉ន់ (ប្រមាណជាង៩២ម៉ឺនដុល្លារ) និងទីបី វីលឡា Lakeside ស្ថិតនៅសៀងហៃ។
រំលឹកឡើងវិញ ត្រចៀកកាំបានរៀបអាពាហ៍ពិពាហ៍ជាមួយនឹងលោក ហួង យូឡុង ជាអ្នកធុរកិច្ច ជនជាតិចិនដ៏ល្បី កាលពីឆ្នាំ ២០០៨ និងមានកូនស្រីម្នាក់ជាចំណងដៃអាពាហ៍ពិពាហ៍៕