ក្រុងប៉េកាំង៖ ក្រុមមន្ត្រីក្នុងតំបន់បាននិយាយថា ផ្នែកមួយនៃផ្លូវហាយវេមួយកន្លែងបានដួលរលំកាលពីព្រឹកថ្ងៃពុធ នេះ នៅភាគខាងត្បូងប្រទេសចិន បណ្តាលឲ្យមនុស្សយ៉ាងតិច ១៩នាក់បានស្លាប់ បន្ទាប់ពីតំបន់នេះបានជួបប្រទះភ្លៀងធ្លាក់ខ្លាំងក្នុងរយៈពេលប៉ុន្មានថ្ងៃថ្មីៗនេះ។ នេះបើយោងតាមការចេញផ្សាយដោយសារព័ត៌មាន Times of India នាថ្ងៃពុធ ទី១ ខែឧសភា ឆ្នាំ២០២៤។
យោងតាមសេចក្តីថ្លែងការណ៍របស់អាជ្ញាធរក្នុងទីក្រុង Meizhou ក្នុងខេត្ត Guangdong បានឲ្យដឹងថា រថយន្តចំនួន ១៨គ្រឿង បានធ្លាក់ចុះ បន្ទាប់ពីផ្នែកនៃផ្លូវប្រវែង ១៧.៩ម៉ែត្រ នៃផ្លូវហាយវ៉េ បានបាក់។ ហេតុការណ៍នេះ បានកើតឡើងកាលពីវេលាម៉ោង២:១០នាទីទៀបភ្លឺ ថ្ងៃពុធ នេះ។
ទន្ទឹមនោះ ទូរទស្សន៍រដ្ឋ CCTV បានរាយការណ៍ថា ក្រុមអ្នកជួយសង្គ្រោះបានបញ្ជូនមនុស្ស ៣០នាក់ទៀតទៅកាន់មន្ទីរពេទ្យ ខណៈមនុស្ស ១៩នាក់ត្រូវបានបញ្ជាក់ថា បានស្លាប់។
សូមជម្រាបជូនថា មូលហេតុនៅពីក្រោយការបាក់ស្រុតកំណាត់ផ្លូវហាយវេ S12 នេះ នៅមិនទាន់ដឹងច្បាស់នៅឡើយទេ ខណៈអាជ្ញាធរមូលដ្ឋាន បានជូនដំណឹងឱ្យអ្នកដំណើរជ្រាបថា ចំណុចដែលរងការខូចខាតនោះ ត្រូវបានបិទមិនឱ្យធ្វើចរាចរណ៍ជាបណ្ដោះអាសន្នទាំងសងខាង។ ខណៈប៉ុន្មានសប្ដាហ៍នេះ ខេត្ត Guangdong ដែលគេស្គាល់ថា មានប្រជាជនរស់នៅច្រើន ត្រូវបានគេសង្កេតឃើញថា បានទទួលរងបាតុភូតអាកាសធាតុអាក្រក់ៗ ជាបន្ដបន្ទាប់រាប់ចាប់តាំងពីគ្រោះទឹកជំនន់ធ្ងន់ធ្ងរដោយសារភ្លៀងធ្លាក់ខ្លាំង រហូតដល់ខ្យល់ព្យុះកំបុតត្បូង Tornado បានវាយប្រហារខេត្ត Guangzhou កាលពីសប្ដាហ៍មុន៕