ដើម្បីប្រែក្លាយក្រសួងព័ត៌មានទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាល ប្រកបដោយបុរេសកម្ម សកម្ម និងអន្តរសកម្ម មានគុណភាព និងប្រសិទ្ធភាព ក្រសួងព័ត៌មានបានដាក់ចេញនូវការដ្ឋានកំណែទម្រង់ជាច្រើន ដែលក្នុងនោះផ្ដោតគោលដៅយុទ្ធសាស្ត្រសំខាន់ៗ៥ រួមមាន៖
ទី១ ពង្រឹងភាពជាអ្នកដឹកនាំរបស់ក្រសួង ដែលសំដៅទៅលើទំនើបកម្មស្ថាប័ន និងរដ្ឋបាលទំនើប នៅក្នុងក្របខ័ណ្ឌដែលធ្វើឲ្យក្រសួងនេះក្លាយទៅជាស្ថាប័នផ្ដល់សេវាសាធារណៈ ប្រកបដោយទំនួលខុសត្រូវ ជាពិសេសដើរតួនាទីសំខាន់លើការសម្របសម្រួលការផ្សព្វផ្សាយ និងបញ្ជ្រាបព័ត៌មានទៅកាន់សាធារណជន។ ទី២ ពង្រឹងវិជ្ជាជីវៈអ្នកសារព័ត៌មាន និងប្រសិទ្ធភាពស្ថាប័ន។ ទី៣ ពង្រឹងមូលធនមនុស្សក្នុងវិស័យសារព័ត៌មាន ដោយធ្វើការបណ្ដុះបណ្ដាល ពង្រឹងសមត្ថភាពបន្ថែមជូនអ្នកសារព័ត៌មាន។ ក្រសួងព័ត៌មានកំពុងសហការជាមួយសមាគមអ្នកសារព័ត៌មាននានា ដើម្បីផ្ដល់នូវវគ្គបណ្ដុះបណ្ដាលខ្លី និងបញ្ជូនវាគ្មិនជំនាញឲ្យទៅចូលរួមក្នុងកម្មវិធីទាំងនោះ។ ក្រសួងក៏ដាក់ឲ្យដំណើរការឡើងវិញនូវមជ្ឈមណ្ឌលបណ្ដុះបណ្ដាល វិក្រិតការ វិជ្ជាជីវៈអ្នកសារព័ត៌មាន ដែលអាក់ខានដំណើរការរាប់ទសវត្សរ៍មកហើយ និងដាក់គោលដៅប្រែក្លាយមជ្ឈមណ្ឌលមួយនេះទៅជាវិទ្យាស្ថានជាតិ ព័ត៌មាន និងទំនាក់ទំនងសាធារណៈ និងសោតទស្សន៍ ដើម្បីឆ្លើយតបទៅនឹងតម្រូវការអ្នកសារព័ត៌មានដែលមានគុណភាព។ ទី៤ ពង្រឹងការអនុវត្តច្បាប់ ដោយក្រសួងព័ត៌មានបានប្រមូលធាតុចូលសំខាន់ៗ និងធ្វើការសិក្សាលើការរៀបចំឡើងវិញនូវច្បាប់ស្ដីពីរបបសារព័ត៌មានថ្មីមួយទៀត ឲ្យស្របទៅតាមការវិវឌ្ឍរបស់សង្គម។ ការរៀបចំសេចក្ដីព្រាងច្បាប់ថ្មីឡើង ក៏ដោយសារច្បាប់ស្ដីពីរបបសារព័ត៌មានបច្ចុប្បន្ន ដែលអនុម័តឲ្យប្រើតាំងពីឆ្នាំ ១៩៩៥ ហាក់មិនមានសមត្ថភាពពេញលេញក្នុងការគ្រប់គ្រងរបបសារព័ត៌មាននាពេលបច្ចុប្បន្ន។ ជាមួយគ្នានេះ ច្បាប់ស្ដីពីការប្រឆាំងនឹងព័ត៌មានក្លែងក្លាយ ក៏កំពុងស្ថិតក្នុងការពិចារណាផងដែរ។ ដើម្បីជាមូលដ្ឋានគ្រឹះក្នុងការរៀបចំសណ្ដាប់ធ្នាប់សារព័ត៌មាន ក្រសួងព័ត៌មានបានផ្ដួចផ្ដើម និងកំពុងរៀបចំបង្កើតឲ្យមានធម្មនុញ្ញវិជ្ជាជីវៈអ្នកសារព័ត៌មាន ដែលវាអាចធានានូវសេចក្ដីថ្លៃថ្នូររបស់អ្នកសារព័ត៌មានដែលគោរពតាមក្រមសីលធម៌វិជ្ជាជីវៈ ពោលគឺធម្មនុញ្ញវិជ្ជាជីវៈនេះឯង។ ទី៥ ពង្រឹងសន្តិសុខព័ត៌មាន ដោយផ្ដោតទៅលើ៣ចំណុចជាសំខាន់ គឺ សិទ្ធិទទួលបានព័ត៌មានរបស់ប្រជាពលរដ្ឋ គុណភាពព័ត៌មាន និងសុវត្ថិភាពព័ត៌មាន។
ខ្លឹមសារខាងលើនេះ គឺជាការលើកឡើងរបស់ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន នៅក្នុងសន្និសីទសារព័ត៌មាន ស្ដីពី ស្ថានភាពសេរីភាពសារព័ត៌មាននៅកម្ពុជា នាថ្ងៃទី ៣០ ខែមេសា ឆ្នាំ២០២៤ នៅទីស្ដីការក្រសួងព័ត៌មាន។
នៅក្នុងសន្និសីទនេះ ក្រសួងព័ត៌មានក៏បានផ្សព្វផ្សាយពីសៀវភៅរបាយការណ៍ ស្ដីពី ស្ថានភាពសេរីភាពសារព័ត៌មាននៅកម្ពុជា ដែលជាការរៀបចំដំបូងបង្អស់ ដើម្បីអបអរសាទរទិវាសេរីភាពអ្នកសារព័ត៌មានផង និងជាសូចនាករសម្រាប់វាស់ស្ទង់ពីលំហសេរីភាពសារព័ត៌មាន ភាពល្អប្រសើរ និងចំណុចខ្វះខាត ដែលត្រូវកែតម្រូវ និងបន្តពង្រឹងបន្ថែមផង។
អត្ថបទ៖ ឈិន ធារ៉ាត់
