ចំនួនទឹកប្រាក់ប្រមាណជាង៥លានដុល្លារអាមេរិក ប្រមូលបានមកពីកម្មវិធីប្រកួតបាល់ទាត់សប្បុរសធម៌ នៅល្ងាចថ្ងៃទី១ ខែឧសភា ឆ្នាំ២០២៤ លើទីលានពហុកីឡដ្ឋានជាតិក្នុងរាជធានីភ្នំពេញ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន និងមន្រ្តីអ្នកមុខអ្នកការ រួមទាំងមហាជនប្រមាណជា៣ម៉ឺននាក់។
ការប្រកួតបាល់ទាត់សប្បុរសធម៌នេះមានចំនួន២គួ ដោយក្រុមបាល់ទះ S&E បានចាញ់ក្រុម Vlogger ២-១ ស្របពេលដែលក្រុមតារាកម្ពុជា ឈ្នះក្រុមគុនខ្មែរ All Start ដោយលទ្ធផល២-០។ ស្របពេលដែលសម្តេចតេជោ ហ៊ុន សែន ជាគ្រូបង្វឹកកិត្តិយស ឯកឧត្តម ឃួង ស្រេង ជាជំនួយការគ្រូបង្វឹកកិត្តិយស និងអតីតកីឡាករជម្រើសជាតិកម្ពុជា ឈិន ឈឿន ជាគ្រូបង្វឹកខាងក្រុមតារាកម្ពុជា។
ក្រោយចប់ការប្រកួតសម្តេចតេជោ ហ៊ុន សែន បានបង្ហោះសារនៅលើទំព័រហ្វេសប៊ុកផ្លូវការថា៖«បាល់ទាត់ល្ងាចនេះបង្ហាញនូវសមិទ្ធផលសន្តិភាព ស្ថិរភាព នយោបាយនិងការអភិវឌ្ឍពិសេស បង្ហាញនូវស្មារតីសាមគ្គីភាពក្នុង ចំណោមជនរួមជាតិយើង»។
សម្តេចប្រធានព្រឹទ្ធសភា បានថ្លែងអំណរគុណដល់ក្រុមបាល់ទាត់ទាំង៤ក្រុមដែលចូលរួមប្រកួត សិល្បករ សិល្បការិនី អ្នកចូលរួមរៀបចំបំរើ ការងារទាំងអស់ពិសេសសាលារាជធានីភ្នំពេញ និងកងកម្លាំងប្រដាប់គ្រប់ប្រភេទ អ្នកគាំទ្រដែលចូលរួមទស្សនាទាំងនៅពហុកីឡដ្ឋាន ទាំងមើលការផ្សាយផ្ទាល់។
សម្តេចបានបង្ហាញទិន្នន័យថវិកាប្រមូលបានក្នុងកម្មវិធីប្រកួតបាល់ទាត់សប្បុរសធម៌គិតត្រឹមថ្ងៃ ទី១ ខែឧសភា ឆ្នាំ២០២៤ មានប្រាក់រៀល ចំនួន ៦០៥,000,000រៀល និងប្រាក់ដុល្លារចំនួន៤,៨៥០,០០០ដុល្លារ។ សរុបទាំងអស់គិតជាប្រាក់ដុល្លារចំនួន (5,001,250)។
ក្នុងចំណោមប្រាក់ដែលប្រមូលបានក្នុងកម្មវិធីប្រកួតបាល់ទាត់សប្បុរសធម៌ នេះសម្តេចតេជោ នឹងបែងចែកសម្រាប់៖
- មន្ទីរពេទ្យកុមារអង្គរ 500,000$
- មជ្ឈមណ្ឌលព្យាបាលកុមារបេះដូងជប៉ុន 300,000$
- គ្រួសារយុទ្ធជនពលី២០គ្រួសារ 200,000$ សរុប 1,000,000$
- មន្ទីរពេទ្យគន្ធបុប្ផា ចំនួន 4,001,250$
សម្តេចតេជោ ហ៊ុន សែន បញ្ជាក់ថាទាំងនេះជាទិន្នន័យថវិកាបណ្តោះអាសន្នសម្រាប់បរិច្ចាគ ប្រសិនជាទទួលបានបន្ថែមទៀតក៏នឹងប្រគល់ជូនមន្ទីរពេទ្យគន្ធបុប្ផាទាំងអស់។ សម្តេចសង្កត់ធ្ងន់ថាលទ្ធផលចុងក្រោយរបស់យើងគឺជីវិត សុខភាពនិង ស្នាមញញឹមរបស់កុមារ៕