ប្រព្រឹត្តិទៅយ៉ាងរលូន និងបញ្ចប់ប្រកបដោយជោគជ័យសម្រាប់ការបោះឆ្នោតជ្រើសរើសបេក្ខភាពប្រធានសមាគមសិល្បករខ្មែរអាណត្តិទី៦ នាថ្ងៃទី២ ខែឧសភា ឆ្នាំ២០២៤ នេះ។ លទ្ធផលនៃការបោះឆ្នោតរកឃើញសំឡេងគាំទ្រច្រើនលើសលប់បានទៅលោកជំទាវឧកញ៉ា ម៉ៅ ចំណាន ដែលស្មើនឹង៩៣%។
ការបោះឆ្នោតដែលបានរៀបចំឡើងនាបណ្ឌិតសភាកម្ពុជា កាលពីព្រឹកមិញនេះ ក្រោមវត្តមានចូលរួមដ៏ច្រើនកុះកររបស់សមាជិកសមាគមសិល្បករខ្មែរ បានរកឃើញប្រធានសមាគមសិល្បករខ្មែរថ្មី នៅក្នុងចំណោមបេក្ខភាពទាំង៣រូបមានលោកជំទាវឧកញ៉ា ម៉ៅ ចំណាន លោក គួច ខេវិន និង លោក ផាត់ តារារដ្ឋ។
ប្រធានសមាគមថ្មីនេះទទួលបានសំឡេងបោះឆ្នោតគាំទ្រសរុប ៥២៧សំឡេង តាមពីក្រោយដោយលោក ផាត់ តារារដ្ឋ មានសំឡេងគាំទ្រ ២៩សំឡេង និងលោក គួច ខេវិន មានសំឡេងគាំទ្រ ១១សំឡេង។
ដូច្នេះនៅក្នុងអាណត្តិ៥ឆ្នាំ នៃការគ្រប់គ្រងរបស់ប្រធានសមាគមសិល្បករខ្មែរ ថ្មី គឺលោកជំទាវអ្នកឧកញ៉ា ម៉ៅ ចំណាន គេសង្ឃឹមថាសិល្បករ សិល្បការិនីខ្មែរ នឹងប្រែមុខមាត់ថ្មី ហើយបញ្ហាអសកម្មមួយចំនួននៅក្នុងរង្វង់អ្នកសិល្បៈ ជាពិសេសជម្លោះហែកហួរគ្នា អាចនឹងមានការកាត់បន្ថយឬរឹតបន្តឹងលែងឱ្យមាន ដើម្បីស្ដារឡើងវិញនូវកិត្តិយស និងសេចក្ដីថ្លៃថ្នូររបស់អ្នកសិល្បៈខ្មែរ៕
