ព្រះខ័នរាជស្វាយរៀង ឈ្នះបឹងកេត ខណ:ភ្នំពេញក្រោន ស្មើជាមួយវិសាខា នៃការប្រកួតពានរង្វាន់លីគកំពូលកម្ពុជា Cambodian Premire League រដូវកាល ២០២៣-២៤ តំបន់ TOP4 សប្តាហ៍ទី២៨ ។
សម្រាប់ជ័យជម្នះរបស់ព្រះខ័នរាជស្វាយរៀង លើកបឹងកេត និងវិសាខា លើភ្នំពេញក្រោន បានធ្វើអោយព្រះខ័នរាជស្វាយរៀង ក្លាយជាម្ចាស់ជើងឯកលីគកំពូលកម្ពុជា Cambodian Premire League រដូវកាល ២០២៣-២៤ បើទោះជានៅសល់ ២ប្រកួតទៀតក៏ដោយ។
លទ្ធផលប្រកួតថ្ងៃសៅរ៍ ទី៤ ខែឧសភា ឆ្នាំ២០២៤៖
- ព្រះខ័នរាជស្វាយរៀង ៤-១ បឹងកេត នៅកីឡដ្ឋានខេត្តស្វាយរៀង
- ភ្នំពេញក្រោន ០-២ វិសាខា នៅកីឡដ្ឋាន Smart RSN
ក្លាយជាម្ចាស់ជើងឯកនៅរដូវកាលនេះ ព្រះខ័នរាជស្វាយរៀងបានក្លាយជាក្រុមដំបូងគេក្នុងប្រវត្តិសាស្ត្របាល់ទាត់កម្ពុជារយៈពេល ១៦ឆ្នាំចុងក្រោយសម្រាប់ការឈ្នះពានរង្វាន់ធំ ២ក្នុងមួយរដូវកាល បន្ទាប់ពីបានឈ្នះជើងឯកពានរង្វាន់សម្តេចតេជោ ហ៊ុន សែន លើកទី១៧ រដូវកាល២០២៣-២៤ កាលពីថ្ងៃទី២៨ ខែមេសា រួមជាមួយជ័យជម្នះនៅថ្ងៃទី០៤ ឧសភា។
គួរដឹងថាការប្រកួត Top4 គឺលេងតែ១ជុំប៉ុណ្ណោះ មានរយ:ពេល៨ថ្ងៃ ពោលគឺចាប់ពីថ្ងៃទី៤ ខែឧសភា ដល់ថ្ងៃទី១២ ខែឧសភា ឆ្នាំ២០២៤ មានព្រះខ័នរាជស្វាយរៀង, ភ្នំពេញក្រោន, វិសាខា និងបឹងកេត។ ក្រុមលេខ១ ត្រូវ ប៉ះក្រុមលេខ៤ និង ក្រុមលេខ២ ត្រូវប៉ះលេខ៣ ហើយក្រុមណាដែលធ្លាប់បានធ្វើជាម្ចាស់ផ្ទះ២ដងមកគឺត្រូវប្ដូរទៅលេងក្រុមដែលធ្វើម្ចាស់ផ្ទះបានតែ១ដងវិញ។
គួរបញ្ជាក់ឱ្យដឹងផងដែរថាពានរង្វាន់លីគកំពូលកម្ពុជា Cambodian Premire League បានចាប់ផ្តើមការ ប្រកួតតាំងពីថ្ងៃទី៥ ខែសីហា ឆ្នាំ២០២៣ កន្លងទៅ ប្រើរយៈពេលចំនួន ៣០សប្តាហ៍ ខណៈជើងឯកឆ្នាំចាស់គឺបានលើក្រុមបាល់ទាត់ភ្នំពេញក្រោន៕
