សិល្បៈជាតិ៖ អ្នកគាំទ្រស្រឡាំងកាំង ពេលបានដឹងដំណឹង អ្នកច្នៃម៉ូដវ័យក្មេង គ្រីស ឌីវ៉ា ប្រកាសបែកពីសង្សារជាកំពូល DJ ល្បី Alex Matt កាលពីថ្ងៃអាទិត្យទី៥ ខែឧសភា វេលាម៉ោង៩យប់ ក្រោយពីបានទាក់ទងស្រលាញ់គ្នាអស់រយៈពេល ៨ឆ្នាំ។
យោងតាមការឱ្យដឹងលើសំណេរមួយដែលសាមីខ្លួន Chris Diva បានបង្ហោះចែករំលែកលើបណ្ដាញសង្គម បុគ្គលដ៏មានឥទ្ធិពលក្នុងចំណោមយុវវ័យរូបនេះ បានទម្លាយពីមូលហេតុពិតដេលធ្វើឱ្យអ្នកទាំងពីរសម្រេចចិត្តបញ្ចប់ឈ្មោះគូស្នេហ៍ ប្រែមកត្រឹមជាដៃគូសហការគ្នាវិញ។
«ជូនចំពោះអ្នកគាំទ្រជាទីគោរព! ខ្ញុំចង់ចែករំលែកព័ត៌មានផ្ទាល់ខ្លួនមួយចំនួនជាមួយអ្នកទាំងអស់គ្នា។ បន្ទាប់ពីការពិភាក្សាគ្នាមួយរយះធំមកនេះ DJ អេឡិច និងខ្ញុំបានសម្រេចចិត្ត។ [ ប្រកាសការបញ្ចប់ទំនាក់ទំនងស្នេហា ] រយះពេល ៨ឆ្នាំ របស់យើងទៅកាន់អ្នកគាំទ្រជាទីស្រលាញ់។ ចំពោះកាងារ និងការសម្ដែងនានាពួកយើងនៅទទួលធ្វើការជាមួយគ្នាធម្មតា ក្នុងនាមជាដៃគូសហការ។ ខណៈពេលដែលការសម្រេចចិត្តនេះមិនងាយស្រួលនោះទេ យើងទាំងពីរជឿថាវាជាជម្រើសដ៏ល្អបំផុតសម្រាប់ការលូតលាស់ និងសុភមង្គល របស់យើងម្នាក់ៗ។ យើងនឹងបន្តគាំទ្រគ្នាទៅវិញទៅមកក្នុងនាមជាមិត្តភក្តិល្អ និង ដៃគូសហការ។ ខ្ញុំចង់បង្ហាញពីការដឹងគុណដ៏ជ្រាលជ្រៅរបស់ខ្ញុំចំពោះ DJ Alex Matt សម្រាប់ក្ដីស្រឡាញ់ សំណើច និងការបំផុសគំនិតដែលបានចែករំលែកក្នុងអំឡុងពេលយើងទាក់ទងជាមួយគ្នា។ ទំនាក់ទំនងរបស់យើងគឺជាប្រភពនៃកម្លាំង និងការច្នៃប្រឌិត ហើយខ្ញុំពិតជាដឹងគុណជារៀងរហូតចំពោះការចងចាំដែលយើងបានបង្កើត។ ពួកយើងពិតជាមិនអាចមានថ្ងៃនេះបានទេ បើយើងទាំង២មិនបានស្គាល់គ្នា។ កំឡុងពេលនេះ ខ្ញុំសុំឱ្យអ្នកទាំងអស់គ្នាយល់ និងគោរពចំពោះភាពឯកជនរបស់យើង។ ការគាំទ្ររបស់អ្នកតែងតែមានន័យជ្រាលជ្រៅ ធំធេង ប្រៀបបាននឹងពិភពលោកសម្រាប់ខ្ញុំ ហើយខ្ញុំសង្ឃឹមថាអ្នកទាំងអស់គ្នានឹងបន្តឈរក្បែរពួកយើង និងគាំទ្រពួកយើងជាបន្តទៀត ។ អរគុណសម្រាប់ក្តីស្រលាញ់ និងការលើកទឹកចិត្តដែលមិនផ្លាស់ប្តូររបស់អ្នក។ ដោយក្តីស្រលាញ់ និងការដឹងគុណ។ គ្រីស ឌីវ៉ា – Christ Diva»
ត្បិតសោកស្ដាយដែលគូស្នេហ៍វ័យក្មេង ដែលសហការគ្នាផ្ដល់នូវស្នាមញញឹម ការសប្បាយរីករាយ ធ្វើឱ្យអ្នកគាំទ្របាត់ទុក្ខកង្វល់សម្រេចចិត្តបែកផ្លូវគ្នាដើររៀងខ្លួន លើវិថីស្នេហ៍ ប៉ុន្តែអ្នកគាំទ្រខ្លះអាចនៅញញឹមចេញព្រោះថាអ្នកទាំងពីរបែកគ្នាដោយសន្ដិវិធី បែកគ្នាដោយល្អ ហើយនៅបន្តរាប់អាន និងអាចរួមការងារជាមួយគ្នាបានធម្មតា ដូច្នេះបានសេចក្ដីថាអ្នកគាំទ្រនៅអាចបន្តបានឃើញវីដេអូឬស្នាដៃរួមគ្នារវាងអ្នកទាំងពីរជាបន្តទៀត៕