សិង្ហបុរី៖ បុរសវ័យ ៦០ឆ្នាំម្នាក់ ត្រូវបានគេប្រទះឃើញដេកស្លាប់ក្នុងបន្ទប់គេង នៃអគារផ្ទះល្វែងដែលកំពុងឆេះនៅសំណង់អគារ Whampoa កាលពីព្រឹកថ្ងៃចន្ទ ទី៦ ខែឧសភា នេះ។ នេះបើយោងតាមការចេញផ្សាយដោយសារព័ត៌មាន CNA។
កងកម្លាំងការពារជនស៊ីវិលសិង្ហបុរី (SCDF) និងប៉ូលិសបាននិយាយថា ពួកគេត្រូវបានជូនដំណឹងអគ្គីភ័យនៅប្លុក 76 Lorong Limau នៅម៉ោងប្រហែល ២:៣០នាទីព្រឹក (ម៉ោងក្នងុស្រុក)។ ពេលអ្នកជួយសង្គ្រោះដំបូងមកដល់កន្លែងកើតហេតុ ភ្លើងកំពុងឆាបឆេះយ៉ាងសន្ធោសន្ធៅចេញពីបន្ទប់មួយនៅជាន់ទី៦។
កងកម្លាំងការពារជនស៊ីវិលសិង្ហបុរី (SCDF) បាននិយាយក្នុងការបង្ហោះតាមហ្វេសប៊ុកថា អ្នកពន្លត់អគ្គិភ័យបានសម្រុកចូលក្នុងផ្ទះល្វែងខាងលើ ដោយបន្ថែមថា មនុស្ស ២នាក់ត្រូវបានជួយសង្គ្រោះចេញពីបន្ទប់ផ្ទះបាយ។ ប៉ូលិសបន្ដថា ជនរងគ្រោះទាំង២នាក់ មាន ស្ត្រីអាយុ ៦០ឆ្នាំ និង ៧៧ឆ្នាំម្នាក់ទៀតបានដឹងខ្លួនពេលបញ្ជូនទៅដល់មន្ទីរពេទ្យ។
ផ្អែកតាមការស៊ើបអង្កេតបឋម ប៉ូលិសបានមិនសង្ស័យថា មានការប្រព្រឹត្តខុសនោះទេ ប៉ុន្ដែការស៊ើបអង្កេតកំពុងបន្ត ខណៈមនុស្សប្រហែល ២០០នាក់ត្រូវជម្លៀសចេញពីផ្ទះសម្បែង ទៅកាន់កន្លែងសុវត្ថិភាព៕