ភ្នំពេញ៖ សម្ដេចមហាបវរធិបតី ហ៊ុន ម៉ាណែត នឹងផ្តល់ក្របខ័ណ្ឌជូនសាច់ញាតិបង្កើត របស់យោធិនពលីទាំង ២០នាក់ ក្នុងឧបទ្ទវហេតុផ្ទុះគ្រាប់នៅយោធភូមិភាគទី៣ កាលពីថ្ងៃទី២៧ ខែមេសា ឆ្នាំ ២០២៤ នៅខេត្តកំពង់ស្ពឺ។
តាមបណ្តាញទំនាក់ទំនងសង្គម របស់សម្ដេចមហាបវរធិបតី ហ៊ុន ម៉ាណែ បានឱ្យដឹងថា «ខ្ញុំបានឃើញសាររបស់ក្មួយ ជាសំណាង រស្មីសត្យា ជាកូនបង្កើតរបស់វរសេនីយ៍ទោ ជា សំណាង ជាយោធិនដែលបានពលីក្នុងឧបទ្ទវហេតុផ្ទុះគ្រាប់នៅយោធភូមិភាគទី៣ ដោយក្មួយបានស្នើសុំក្របខ័ណ្ឌ ចូលបម្រើក្នុងជួរកងយោធពលខេមរភូមិន្ទ ដើម្បីបានបន្តវេនតពីឪពុក។ ខ្ញុំឯកភាពតាមសំណើរបស់ក្មួយប្រុស រស្មីសត្យា។ មិនត្រឹមតែសម្រាប់ក្មួយប្រុស រស្មីសត្យា តែម្នាក់ទេ ខ្ញុំនឹងផ្តល់ក្របខ័ណ្ឌជូនដល់សាច់ញាតិបង្កើត របស់យោធិនពលីទាំង ២០នាក់ (អាចជាកូន ជាចៅ ឬជាបងប្អូនបង្កើត និងអាចជាស្រី ឬជាប្រុសក៏បាន) ដើម្បីអាចបានចូលបម្រើក្នុងជួរកងទ័ពបន្តវេនពីឪពុក ឬបងប្អូនរបស់គាត់»។
សូមបញ្ជាក់ថា កាលពីថ្ងៃទី០៤ ខែឧសភា ឆ្នាំ២០២៤ មានអាខោនហ្វេសប៊ុក ឈ្មោះ Pozz Zvet រៀបរាប់ថា ខ្ញុំបាទឈ្មោះ ជាសំណាង រស្មីសត្យា ភេទប្រុសអាយុ ២៣ឆ្នាំ ការសិក្សាចប់ថ្នាក់ទី១២ (សញ្ញាបត្រមធ្យមសិក្សាទុតិយភូមិ) បច្ចុប្បន្នមិនមានការងារអ្វីទេ សុខភាពល្អធម្មតា ដែលត្រូវជាកូនច្បង របស់លោកវរសេនីយ៍ទោ ជា សំណាង ដែលបានបាត់បង់ជីវិត ក្នុងហេតុការផ្ទុះគ្រាប់នៅយោធភូមិភាគទី៣។
សូមគោរពដល់សម្ដេចមហាបវរធិបតី ហ៊ុន ម៉ាណែត ជាទីគោរព ខ្ញុំបាទមានបំណងបន្តវេនពីឪពុកចូលបម្រើការងារយោធានៅខេត្តកោះកុងបន្ដទៀត ដើម្បីបានប្រាក់ខែចិញ្ចឹមម្ដាយ ប្អូនៗនិងជីដូនចាស់ជរា ព្រោះសព្វថ្ងៃក្រុមគ្រួសារខ្ញុំ គ្មានអ្វីទីពឹង សូមសម្ដេច ហ៊ុន ម៉ាណែត សម្ដេចតា មេត្តាជួយសម្រេចបំណងខ្ញុំបាទផង ខ្ញុំបាទសូមគោរពនិងថ្លែងអំណគុណ៕
