ព្រឹត្តិការណ៍ប្រកួតបាល់ទាត់ Soccer League លើកទី៧ ឆ្នាំ២០២៤ មាន ៦១ក្រុមចូលរួមប្រកួត ក្នុងនោះមានក្រុមនារី ចំនួន ១៣ក្រុម ដែលនឹងផ្តើមបើកការប្រកួតជាផ្លូវការនៅអំឡុងពាកកណ្ដាលខែមិថុនា គ្រោងនឹងបញ្ចប់នៅអំឡុងខែកក្កដាឆ្នាំ២០២៤ ខាងមុន។
ឯកឧត្តម ខៀវ ភារិទ្ធ រដ្ឋលេខាធិការក្រសួងមហាផ្ទៃ និងជាប្រធានគណៈកម្មការប្រតិបត្តិរៀបចំការប្រកួត បាល់ទាត់ពានរង្វាន់ បាល់ទាត់ពានរង្វាន់ Soccer League បានមានប្រសាសន៍ថា ការប្រកួតកីឡាបាល់ទាត់ពានរង្វាន់ Soccer League គឺជាផ្នែកដ៏សំខាន់មួយស្ថិត ក្នុងបេសកកម្ម ដ៏ចម្បងរបស់ ស.ស.យ.ក. ក្រោមគំនិតផ្តួចផ្តើមរបស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និង ឯកឧត្តម ស សុខា អនុប្រធាន និងទទួលបន្ទុកក្តាប់រួម Soccer League។
ការលើកដូចនេះធ្វើឡើងក្នុងពិធីចុះអនុស្សារណៈយោគយល់គ្នា រវាងសហភាពសហព័ន្ធយុវជនកម្ពុជា (ស.ស.យ.ក) និងភេសជ្ជៈប៉ូវកម្លាំង M-150 លើការគាំទ្រព្រឹត្តិការណ៍ការប្រកួតបាល់ទាត់ពានរង្វាន់ Soccer Leauge រយៈពេល3ឆ្នាំ 2024-2026។ ពិធីចុះអនុស្សារណៈយោគយល់គ្នានេះ ធ្វើឡើងក្រោមអធិបតីភាពរបស់ ឯកឧត្តម ខៀវ ភារិទ្ធ រដ្ឋលេខាធិការក្រសួង មហាផ្ទៃ និងជាប្រធានគណៈកម្មការប្រតិបត្តិរៀបចំការប្រកួត បាល់ទាត់ពានរង្វាន់ Soccer League និងលោក សុខ ចេមី នាយកគ្រប់គ្រងក្រុមហ៊ុនអេច អេស ស៊ី ត្រេឌីង ដែលជាក្រុមហ៊ុននាំចូល និងចែកចាយផ្តាច់មុខភេសជ្ជៈប៉ូវកម្លាំង M-150 ដែលបានធ្វើឡើងនារសៀលថ្ងៃទី០៦ ខែឧសភា ឆ្នាំ២០២៤ នៅអគារ The Kampus។
ឯកឧត្តមបាន បន្តថាការប្រកួត បាល់ទាត់ពានរង្វាន់ Soccer League មិនត្រឹមជាវេទិកាផ្តល់ឱកាសដល់កីឡាករគ្រប់រូប មកពីគ្រប់ស្ថាប័ន រដ្ឋ និងឯកជន ជុំវិញរាជធានី ខេត្ត ដើម្បីមានឱកាសបញ្ចេញសមត្ថភាពនៅលើទីលានវាលស្មៅពណ៌បៃតងកប្រកបដោយ តម្លាភាព នោះទេតែ Soccer League ក៏ព្រឹត្តិការណ៍មួយដែលបានចូលរួមចំណែកជាមួយរាជរដ្ឋាភិបាល ក្នុងការ បំផុសចលនាសាមគ្គីភាព រឹតចំណងមិត្តភាព របស់យុវជននៅទូទាំងប្រទេស ជាពិសេសដើម្បីបង្កើត ធនធានមនុស្សក្នុងវិស័យកីឡាបាល់ទាត់នៅកម្ពុជា ឲ្យកាន់តែមានភាពរីកចម្រើន និងរឹងមាំ ដើម្បីជាថ្នាល ឆ្ពោះទៅកាន់ថ្នាក់ជាតិ និងអន្តរជាតិ ក្រោមពាក្យស្លោកមួយ គឺ ស្មារតីសាមគ្គី។
ព្រឹត្តិការណ៍ការប្រកួតបាល់ទាត់ពានរង្វាន់ Soccer League ត្រូវបានរៀបចំឡើងចំនួន ០៦លើក រួចមកហើយ គិតចាប់ពីឆ្នាំ២០១២ មកម្លេះ ដែលឆ្នាំ២០២៤នេះ គឺជាលើកទី៧ហើយ ក្នុងនោះរួមមាន៖
- លើកទី១ ឆ្នាំ២០១២ មាន ៣២ក្រុមចូលរួម
- លើកទី២ ឆ្នាំ២០១៣ មាន ៤០ក្រុមចូលរួម
- លើកទី៤ ឆ្នាំ២០១៥ មាន ៤៩ក្រុមចូលរួម
- លើកទី៥ ឆ្នាំ២០១៦ មាន ៦០ក្រុមចូលរួម
- លើកទី៥ ឆ្នាំ២០១៩ មាន ៦០ក្រុមចូលរួម
- លើកទី៦ ឆ្នាំ២០២៣ មាន ៧៤ក្រុម ក្រុមនារី មានចំនួន ១០ក្រុមចូលរួម
- លើកទី៧ ឆ្នាំ២០២៤ មាន ៦១ក្រុម ក្រុមនារី មានចំនួន ១៣ក្រុមចូលរួម
ស្របពេលនៅក្នុងឆ្នាំ២០២៤នេះ ក្រុមហ៊ុន HSC និង ភេសជ្ជៈប៉ូវកម្លាំង M-150 បានសម្រេចចិត្តបន្តផ្ដល់ការឧបត្ថម្ភគាំទ្រក្នុងព្រឹត្តិការណ៍ប្រកួតពានរង្វាន់ Soccer League ដែលមានរយៈពេល ០៣ ឆ្នាំ(២០២៤-២០២៦) ។ នេះជាសក្ខីភាព បង្ហាញអំពីគោល ជំហរយ៉ាងមុតមាំរបស់ក្រុមហ៊ុន HSC Group និងភេជ្ជៈប៉ូវកម្លាំង M-150 ដើម្បីចូលរួមចំណែកជាមួយរាជរ ដ្ឋាភិបាល ក៏ដូចជា សហភាពសហព័ន្ធយុវជនកម្ពុជា ក្នុងការលើកកម្ពស់វិស័យកីឡាបាល់ទាត់នៅកម្ពុជាឲ្យ កាន់តែមានភាពរីកចម្រើន ស្មើមុខ ស្មើមាត់ នៅលើឆាកអន្តរជាតិ។
ឯកឧត្តម ខៀវ ភារិទ្ធ ក៏បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុនអេច អេស ស៊ី និងភេសជ្ជៈប៉ូវកម្លាំងM-150 ដែលតែងតែចូលរួមឧបត្ថម្ភក្នុងព្រឹត្តិការណ៍កីឡានានា នាពេលកន្លងមក ទាំងព្រឹត្តិការណ៍ប្រកួតបាល់ពានរង្វាន់ Soccer Leagueលើកទី៦ឆ្នាំ២០២៣ និងបន្តគាំទ្ររយៈពេល៣ឆ្នាំ ២០២៤ – ២០២៦ បន្ថែមទៀត ដែលការចូលរួមយ៉ាងសកម្មនេះពិតជាមានសារសំខាន់ណាស់ក្នុងការជួយអោយការរៀបចំព្រឹត្តិការប្រកួតបាល់ពានរង្វាន់ Soccer League ដំណើរការរបានលូន និងជោគជ័យតាមការគ្រោងទុក ក៏ដូចជាសក្ខីភាពបង្ហាញពីគោលជំហរយ៉ាងមុតមាំរបស់ក្រុមហ៊ុន អេច អេស ស៊ី និងM-150 ដើម្បីចូលរួមចំណែកជាមួយរាជរដ្ឋាភិបាល ក៏ដូចជាសហភាពសហព័ន្ធយុវជនកម្ពុជាក្នុងការលើកកម្ពស់វិស័យកីឡានៅកម្ពុជាអោយកាន់តែរឹងមាំ រីកចម្រើន និងស្មើមុខ ស្មើមាត់នៅលើឆាកអន្តរជាតិ។
គួរបញ្ជាក់ផងដែរថា សម្រាប់ការប្រកួត ព្រឹត្តិការប្រកួតបាល់ពានរង្វាន់ Soccer League លើកទី៦ ឆ្នាំ២០២៣ ក្រុមបាល់ទាត់ស.ស.យ.ក. ខេត្តកណ្ដាល បានក្លាយជាម្ចាស់ជើងឯក ក្រោយពីបានយកឈ្នះលើក្រុមហនុមានអគ្គលេខាធិការដ្ឋានក្រសួងការពារជាតិនៅវគ្គផ្ដាច់ព្រ័ត្រក្នុងលទ្ធផល ២-០ នៅលើទីលានស្មាត RSN ស្របពេលដែលក្រុមសុភីណាអេហ្វស៊ី ក៏បានក្លាយជាជើងឯកនារីក្នុងពានរង្វាន់តែមួយនេះផងដែរ៕
រូបភាព៖ UYFC Soccer League