Don Lee ឬ Ma Dong-seok តារាសម្ដែងកូរ៉េ-អាមេរិកដ៏មានប្រជាប្រិយភាពបំផុតនៅប្រទេសកូរ៉េ ជាពិសេសតាមរយៈតួអង្គពូម៉ាប់នៅក្នុងរឿង «Train To Busan» ដែលធ្វើឱ្យអ្នកទស្សនាស្រក់ទឹកភ្នែក នៅពេលដែលតួអង្គរបស់លោកបានលះបង់ជីវិតដើម្បីការពារអាយុជីវិតប្រពន្ធនិងកូនក្នុងផ្ទៃ។
ងាកមកមើលភាពយន្តខ្នាតធំលំដាប់ហូលីវូដ «Eternals» របស់ផលិតកម្ម Marvel ឯណោះវិញ Don Lee ក៏មានវត្តមានសម្ដែងនៅក្នុងរឿងនេះដែរ ដោយតួអង្គដែលលោកសម្ដែងគឺដកស្រង់ចេញពីសៀវភៅគំនូរតុក្កតា ឈ្មោះហៅថា Gilgamesh ជាតួអង្គមួយដែលត្រូវបានគេបំភ្លេច និងត្រូវបានគេនិរទេសដោយសារអំពើល្អរបស់លោក ដោយ Zuras ព្រោះតែតួអង្គ Gilgamesh បានចំណាយពេលវេលាច្រើននៅជាមួយនឹងមនុស្ស។
ព្រោះតែចំណុចខាងលើនេះ តួអង្គ Gilgamesh ត្រូវបានគេស្គាល់ថាជាអ្នកក្លាហានដែលរួមសហការជាមួយនឹងតួអង្គសំខាន់ៗដូចជា Hercules, Beowulf ដោយតួអង្គលោកក៏បានចូលរួមជាមួយនឹង Avengers ផងដែរនៅក្នុងសៀវភៅ។
លោក Ma Dong Seok កើតនៅថ្ងៃទី១ ខែមីនា ឆ្នាំ ១៩៧១ បច្ចុប្បន្នវ័យ ៥០ឆ្នាំ គឺជាតារាសម្ដែងកូរ៉េ-អាមេរិក ដែលផ្ទុះបានការគាំទ្រតាមរយៈភាពយន្ត Train To Busan និងតួអង្គសំខាន់ៗ ជាច្រើនទៀតនៅក្នុងប្រទេសកូរ៉េ។ តារារូបនេះទទួលពានរង្វាន់ Gallup Korea’s Film ប្រចាំឆ្នាំ២០១៨។