លោកអ្នកអាចធ្លាប់ដឹងពី CBC, ប៉ុន្តែលោកអ្នកដឹងពី ប្រព័ន្ធចែករំលែកព័ត៌មានឥណទាន ឬទេ?
ប្រព័ន្ធចែករំលែកព័ត៌មានឥណទាន ជាប្រព័ន្ធមួយដែលអនុញ្ញាតឲ្យមានលំហូរព័ត៌មានពាក់ព័ន្ធនឹងការសម្រេចចិត្តលើហានិភ័យនៃកិច្ចព្រមព្រៀងឥណទាន។ ប្រព័ន្ធនេះស្ថិតក្រោមច្បាប់មួយ ដែលបង្កើតបានជាលក្ខខណ្ឌតម្រូវឲ្យអ្នកផ្ដល់ និងអ្នកទទួលសេវាឥណទានបញ្ជូនព័ត៌មានឥណទានរបស់ខ្លួនទៅកាន់ស្ថានីយផ្ទុកទិន្នន័យ ហើយព័ត៌មានទាំងនោះនឹងត្រូវចែករំលែកទៅឲ្យអ្នកផ្ដល់ និងស្នើសុំ ឬទទួលសេវាឥណទាន នៅពេលដែលត្រូវការចាំបាច់ ដោយធ្វើឡើងទៅតាមនីតិវិធីដែលបានកំណត់។ ដំណើរការនេះមានការចូលរួមពីប្រព័ន្ធបច្ចេកវិទ្យាដែលត្រូវតែធានាបាននូវសុវត្ថិភាព រក្សាការសម្ងាត់ ឆាប់រហ័ស និងប្រកបដោយបរិយាបន្ន។
សមភាពសំខាន់ៗ ក្នុងប្រព័ន្ធចែករំលែកព័ត៌មានឥណទានរួមមាន៖ កម្មវត្ថុនៃទិន្នន័យ សំដៅដល់បុគ្គលម្នាក់ៗ និងស្ថាប័ន ឬក្រុមហ៊ុន (រូបវន្តបុគ្គល និងនីតិបុគ្គល)។ អ្នកផ្ដល់ទិន្នន័យ សំដៅដល់អ្នកផ្ដល់ឥណទាន (ប្រាក់កម្ចី), អ្នកដែលមិនបានផ្ដល់ឥណទាន ប៉ុន្តែមានកាតព្វកិច្ចបញ្ជូនទិន្នន័យ (ឧ. សែកគ្មានប្រាក់), ភ្នាក់ងារសាធារណៈ និងអ្នកពាក់ព័ន្ធផ្សេងៗទៀត។ អ្នកផ្ដល់សេវា ចែករំលែកព័ត៌មានឥណទាន មានការិយាល័យព័ត៌មានឥណទានរបស់រដ្ឋ ឬឯកជន។ អ្នកប្រើប្រាស់ទិន្នន័យ សំដៅដល់អ្នកផ្ដល់ឥណទាន (ប្រាក់កម្ចី), រដ្ឋាភិបាល, បុគ្គលម្នាក់ៗ និងស្ថាប័ន ឬក្រុមហ៊ុន និងអ្នកដែលមិនផ្ដល់ប្រាក់កម្ចី។
ការចែករំលែកព័ត៌មានឥណទានមានសារសំខាន់ណាស់ដល់ប្រជាពលរដ្ឋ ស្ថាប័ន ក្រុមហ៊ុន ធនាគារ និងមីក្រូហិរញ្ញវត្ថុ៖
សម្រាប់ប្រជាពលរដ្ឋ និងស្ថាប័ន ក្រុមហ៊ុន ការចែករំលែកព័ត៌មានឥណទានជួយឲ្យពួកគាត់កសាងកេរ្តិ៍ឈ្មោះល្អរបស់ខ្លួន, ជួយសម្រួលឲ្យពួកគាត់មានលទ្ធភាពទទួលបានសេវាហិរញ្ញវត្ថុទាំងក្នុង និងក្រៅប្រទេស, មានអំណាចចរចាខ្ពស់លើទំហំឥណទាន និងការប្រាក់, ទទួលបានឥណទានលឿនជាងមុន, កាត់បន្ថយកំហុសដោយអចេតនា និងកែតម្រូវទាន់ពេលវេលា។
សម្រាប់ធនាគារ និងមីក្រូហិរញ្ញវត្ថុវិញ ការចែករំលែកព័ត៌មានឥណទាន ជួយឲ្យដំណើរការនៃការសម្រេចឥណទានបានលឿនជាងមុន, កាត់បន្ថយចំណាយប្រតិបត្តិការដែលមិនចាំបាច់, ជួយដល់ការប្រឆាំងនឹងការក្លែងបន្លំ, កាត់បន្ថយហានិភ័យឥណទាន និងការពារបំណុលច្រើនលើសលប់ (វ័ណ្ឌ-ក)។
បច្ចុប្បន្ននេះមានប្រព័ន្ធចែករំលែកព័ត៌មានឥណទាន២ គឺនាយកដ្ឋានចែករំលែកព័ត៌មានឥណទាន ដែលគ្រប់គ្រងដោយរដ្ឋាភិបាល និងការិយាល័យចែករំលែកព័ត៌មានឥណទានគ្រប់គ្រងដោយផ្នែកឯកជន។ ចំណែកនៅប្រទេសកម្ពុជា ប្រព័ន្ធចែករំលែកព័ត៌មានឥណទានគ្រប់គ្រងដោយផ្នែកឯកជន គឺក្រុមហ៊ុន Credit Bureau Cambodia ដែលគេស្គាល់ជាទូទៅថា CBC។
សូមបញ្ជាក់ថា ខ្លឹមសារខាងលើនេះ គឺជាការពន្យល់របស់ក្រុមការងារនៃក្រុមហ៊ុន CBC នៅក្នុងវគ្គបណ្ដុះបណ្ដាល ស្ដីពី ប្រតិបត្តិការប្រព័ន្ធចែករំលែកព័ត៌មានឥណទាន ដែលរៀបចំឡើងដោយក្លឹបអ្នកកាសែតកម្ពុជា និង CBC។
នៅអត្ថបទក្រោយ ត្រយងនឹងពន្យល់អំពី៖ CBC ជាក្រុមហ៊ុនផ្ដល់សេវាឆែកព័ត៌មានឥណទានតែមួយគត់នៅកម្ពុជា, តើអ្នកណាខ្លះដែលមានសិទ្ធិឆែកព័ត៌មានឥណទានរបស់អ្នកបាន? តើព័ត៌មានឥណទានវិជ្ជមាន អវិជ្ជមាន ត្រូវរក្សាទុកប៉ុន្មានឆ្នាំ?, គន្លឹះក្នុងការកសាងប្រវត្តិឥណទានល្អ និងអត្ថប្រយោជន៍។
អត្ថបទ៖ ឈិន ធារ៉ាត់