ប៉េកាំង៖ យោងតាមប្រព័ន្ធផ្សព្វផ្សាយរដ្ឋ ដែលមិនបានបញ្ជាក់ពីលក្ខណៈនៃការវាយប្រហារនោះ បានឱ្យដឹងថា ការវាយប្រហារនៅមន្ទីរពេទ្យមួយនៅភាគនិរតីនៃប្រទេសចិន បានបណ្តាលឲ្យមនុស្សជាង ១០នាក់ស្លាប់ ឬរងរបួសនាថ្ងៃអង្គារ នេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី៧ ខែឧសភា ឆ្នាំ២០២៤។
ទីភ្នាក់ងារព័ត៌មានរដ្ឋចិន Xinhua បាននិយាយថា «ឧបទ្ទវហេតុនេះ បានកើតឡើងនៅមន្ទីរពេទ្យក្នុងស្រុកមួយកន្លែង ហើយគិតត្រឹមម៉ោង ១:២០នាទីរសៀល (ម៉ោងក្នុងស្រុក) មានមនុស្សជាង ១០នាក់ហើយ ត្រូវបានបញ្ជាក់ថា បានរងរបួស ឬបាត់បង់ជីវិត។
សារព័ត៌មានរដ្ឋចិន បានបន្ថែមថា ការវាយប្រហារនេះបានកើតឡើងនៅក្នុងស្រុក Zhenxiong ក្នុងខេត្ត Yunnan ភាគនិរតីប្រទេសចិន ហើយអាជ្ញាធរកំពុងស៊ើបអង្កេតករណីនេះ។
រូបភាពដែលចុះផ្សាយដោយគេហទំព័រព័ត៌មានរដ្ឋ The Paper បានបង្ហាញឱ្យឃើញបុរសម្នាក់កំពុងចង្អុលកាំបិតទៅកាន់បុរសម្នាក់ទៀតដែលកាន់ដំបងនៅក្នុងបន្ទប់រង់ចាំរបស់មន្ទីរពេទ្យ ក៏ដូចជាមន្រ្តីប៉ូលីសដែលមកដល់កន្លែងកើតហេតុ។
ឧក្រិដ្ឋកម្មហិង្សាទ្រង់ទ្រាយធំ គឺកម្រមាននៅក្នុងប្រទេសចិន ដែលហាមប្រាមពលរដ្ឋយ៉ាងតឹងរ៉ឹងពីការកាន់អាវុធ ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ មានការចាក់សម្លាប់ជាបន្ដបន្ទាប់។
ខណៈកាលពីខែមុន មនុស្ស ៦នាក់បានស្លាប់ និងម្នាក់ទៀតរងរបួសក្នុងការចាក់សម្លាប់នៅសាលាមត្តេយ្យមួយកន្លែងក្នុងខេត្ត Guangdong ភាគខាងត្បូងប្រទេសចិន។
កាលពីខែសីហាឆ្នាំមុន នៅក្នុងខេត្តយូណាន មនុស្ស ២នាក់បានស្លាប់ និង ៧នាក់ផ្សេងទៀតបានរងរបួស បន្ទាប់ពីបុរសម្នាក់ដែលមានប្រវត្តិជំងឺផ្លូវចិត្តបានវាយប្រហារមនុស្សដោយប្រើកាំបិត។ ហើយនៅក្នុងខែសីហា ឆ្នាំ២០២២ មនុស្ស ៣នាក់ត្រូវបានសម្លាប់ និង៦នាក់រងរបួសនៅក្នុងការវាយប្រហារដោយកាំបិតនៅសាលាមត្តេយ្យមួយកន្លែង ក្នុងខេត្ត Jiangxi ភាគអាគ្នេយ៍នៃប្រទេសចិន៕