គូឡាឡាំពួរ៖ បុរសម្នាក់បានស្លាប់ និងបុរសម្នាក់ទៀតបានរងរបួសយ៉ាងធ្ងន់ធ្ងរ បន្ទាប់ពីដើមឈើដ៏ធំមួយបានបាក់រលំសង្កត់លើរថយន្តចំនួន ១៧គ្រឿងក្នុងទីក្រុងគូឡាឡាំពួ អំឡុងពេលមានផ្គររន្ទះ និងភ្លៀងធ្លាក់ខ្លាំងកាលពីថ្ងៃអង្គារ សប្ដាហ៍នេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃពុធ ទី៨ ខែឧសភា ឆ្នាំ២០២៤។
ទីភ្នាក់ងារសារព័ត៌មានក្នុងស្រុក Bernama របស់ប្រទេសម៉ាឡេស៊ី បានរាយការណ៍ថា ឧប្បត្តិហេតុនេះបានកើតឡើងនៅតាមបណ្តោយផ្លូវ Jalan Sultan Ismail នៅខាងក្រៅសណ្ឋាគារ Concorde នៅម៉ោងប្រហែល ២:២០នាទីរសៀល។
ក្រៅពីការខូចខាតយានយន្តដែលធ្វើដំណើរឆ្លងកាត់ ដើមឈើដែលដួលរលំក៏បានធ្វើឱ្យខូចខាតដល់ចំណតរថយន្តក្រុង និងផ្លូវរថភ្លើងមួយខ្សែនៅក្នុងតំបន់ផងដែរ។ការខូចខាតផ្លូវរថភ្លើង បានបង្កឱ្យមានការរំខានចំពោះសេវាផ្លូវរថភ្លើងជាបណ្ដោះអាសន្នផងដែរ។
នាយកដ្ឋានពន្លត់អគ្គីភ័យ និងជួយសង្គ្រោះម៉ាឡេស៊ី បាននិយាយថា ពួកគេទទួលបានការជូនដំណឹងពីឧបទ្ទវហេតុនេះនៅម៉ោង ២:១៩នាទីរសៀល ហើយបានបញ្ជូនមន្ត្រីរបស់ខ្លួនចំនួន ២៧នាក់ទៅកាន់កន្លែងកើតហេតុ។
នាយកដ្ឋានបានបន្តថា៖ «ពេលទៅដល់ទីតាំងក្រុមការងាររាយការណ៍ថា មានដើមឈើធំមួយដើមបានរលំលើផ្លូវ ហើយបានសង្កត់លើរថយន្ត១៧គ្រឿង និងខូចខាតផ្លូវរថភ្លើងលើអាកាសនៅទីតាំងនោះ ហើយដើមឈើរលំក៏បណ្តាលឱ្យខូចខាតសម្ភារលើដងផ្លូវសាធារណៈ រួមទាំងចំណតរថយន្តក្រុងផងដែរ។ នេះបើតាមការបញ្ជាក់របស់មជ្ឈមណ្ឌលប្រតិបត្តិការទីក្រុងគូឡាឡាំពួរ»។
ក្នុងប្រិតបត្តិការនោះ ជនរងគ្រោះ ២នាក់ ត្រូវបានយកចេញពីរថយន្តដែលរងការខូចខាតក្នុងឧបទ្ទវហេតុខាងលើ ដោយជនរងគ្រោះទី១ មានអាយុ ៤៧ឆ្នាំ ក្រោយមកត្រូវបានមន្ត្រីក្រសួងសុខាភិបាលបញ្ជាក់ថា បានបាត់បង់ជីវិត ចំណែកជនរងគ្រោះទី២ អាយុ ២៦ឆ្នាំ បញ្ជូនទៅព្យាបាលនៅមន្ទីរពេទ្យ៕
