នៅក្នុងវគ្គបណ្ដុះបណ្ដាលស្ដីពី ប្រតិបត្តិការប្រព័ន្ធចែករំលែកព័ត៌មានឥណទាន ដែលរៀបចំឡើងដោយក្លឹបអ្នកកាសែតកម្ពុជា និង CBC អ្នកជំនាញរបស់ CBC បានពន្យល់អំពីគន្លឹះសំខាន់ក្នុងការកសាងប្រវត្តិឥណទានល្អ ដើម្បីជាប្រយោជន៍ក្នុងការដាក់ស្នើកម្ចីទៅកាន់ធនាគារ ឬមីក្រូហិរញ្ញវត្ថុ នៅពេលអ្នកត្រូវការប្រាក់។ គន្លឹះសំខាន់ៗទាំងនោះរួមមាន៖
១. ស្នើសុំត្រួតពិនិត្យរបាយការឥណទានជាប្រចាំ
យោងតាមប្រកាសរបស់ធនាគារជាតិ អតិថិជនមានសិទ្ធិស្នើសុំរបាយការណ៍ព័ត៌មានរបស់ខ្លួន ១ច្បាប់ម្ដង ក្នុង ១ឆ្នាំ ដោយត្រូវបង្ហាញអត្តសញ្ញាណរបស់ខ្លួនឱ្យបានច្បាស់លាស់។ អ្នកផ្ដល់សេវាប្រព័ន្ធចែករំលែកព័ត៌មានឥណទានត្រូវផ្ដល់របាយការណ៍ជូនអតិថិជន ដោយឥតគិតថ្លៃក្នុងរយៈពេលយ៉ាងយូរ ៥ថ្ងៃ នៃថ្ងៃធ្វើការ គិតចាប់ពីថ្ងៃទទួលសំណើ។ នៅកម្ពុជាក្រុមហ៊ុនដែលធ្វើអាជីវកម្មលើការចែករំលែកព័ត៌មានឥណទានមានតែ CBC មួយគត់។ ដូច្នេះអ្នកត្រូវប្រើកម្មវិធីទូរស័ព្ទ (Mobile App) CBC Mobile ដើម្បីស្នើសុំរបាយការណ៍ឥណទានពីក្រុមហ៊ុននេះបានម្ដងក្នុងមួយឆ្នាំដោយមិនគិតថ្លៃ។
អ្នកជំនាញរបស់ CBC ថា បើទោះបីជាអ្នកអាចបង់ប្រាក់ ដើម្បីទាញរបាយការណ៍ឥណទានបានក៏ដោយ ក៏មិនគួរឆែកញឹកញាប់ពេកនោះទេ ព្រោះវាអាចជាប់ព័ត៌មានមិនសូវល្អ។ ល្អបំផុត ២ដងក្នុងមួយឆ្នាំ។
២. ពិនិត្យមើលភាពត្រឹមត្រូវលើរបាយការណ៍ឥណទានរបស់ខ្លួន
ត្រូវពិនិត្យផ្ទៀងផ្ទាត់លើរបាយការណ៍ឥណទានរបស់ខ្លួន ដើម្បីធានាថាព័ត៌មានដែលបានបញ្ជូនទៅឲ្យអ្នកផ្ដល់សេវាចែករំលែកព័ត៌មានឥណទាន ដូចជា CBC ជាដើម ត្រឹមត្រូវ។ អ្វីដែលត្រូវពិនិត្យមើលមាន៖ ចំនួនកាតឥណទាន ចំនួនឥណទាន និងចំនួនប្រាក់កម្ចី, ព័ត៌មានលម្អិតនៃការបង់សងទាន់ពេលវេលា, ប្រវត្តិនៃការបង់សង, តុល្យភាពដែលត្រូវបង់សង, គណនីដែលបានបិទ និងព័ត៌មានផ្ទាល់ខ្លួន។
៣. ប្រសិនបើមានភាពមិនត្រឹមត្រូវ ត្រូវដាក់ពាក់ស្នើសុំកែតម្រូវ
នៅពេលអ្នកពិនិត្យមើលឃើញមានព័ត៌មានមិនត្រឹមត្រូវ ឬភាពមិនប្រក្រតីណាមួយ នៅលើរបាយការណ៍ឥណទានរបស់ខ្លួន អ្នកត្រូវដាក់ពាក្យស្នើសុំកែតម្រូវទៅកាន់អ្នកផ្ដល់សេវាចែករំលែកព័ត៌មានឥណទាន (CBC)។
៤. គួរបង្កើតប្រវត្តិឥណទាន
អ្នកជំនាញ CBC ថា គួរតែបង្កើតប្រវត្តិឥណទាន ពោលគឺខ្ចីប្រាក់ពីធនាគារក្នុងចំនួនសមស្រប និងគោលដៅណាមួយ ហើយបង់សងវិញឲ្យបានទៀងទាត់ល្អ។ ប្រសិនបើអ្នកមិនមានប្រវត្តិឥណទានសោះ នៅពេលដាក់ស្នើកម្ចីនោះគ្រឹះស្ថានហិរញ្ញវត្ថុមានការលំបាកក្នុងការវាយតម្លៃលើកម្រិតហានិភ័យណាស់។
៥. ខ្ចីតាមលទ្ធភាព
អ្នកគួរសម្រេចចិត្តខ្ចីតាមលទ្ធភាព ដែលអ្នកអាចបង់សងវិញបាន ហើយត្រូវគិតថា តើកម្ចីនោះចាំបាច់ដែរ ឬទេ? ទោះបីជាអ្នកផ្ដល់កម្ចីប្រាប់ថា អ្នកមានលទ្ធភាពខ្ចីបានច្រើនជាងតម្រូវការរបស់អ្នកក៏ដោយ។
៦. អាយុកាលឥណទាន
ប្រវត្តិឥណទានកាន់តែយូរ និងនៅតែបន្តប្រើ វាកាន់តែល្អសម្រាប់ពិន្ទុឥណទាន។ និយាយបែបនេះ គឺហាក់ដូចជាជំរុញឲ្យអ្នកជាប់បំណុល និងបន្តជំពាក់បំណុលកាន់តែយូរ។ ប្រាកដណាស់ហើយថាវាបែបហ្នឹង ប៉ុន្តែវាក៏មានផលវិជ្ជមានផងដែរ ព្រោះថា កាលណាអ្នកមានប្រវត្តិបំណុលយូរ និងល្អ គឺជាព័ត៌មានល្អសម្រាប់ការសម្រេចឲ្យខ្ចីប្រាក់ពីធនាគារ នៅពេលណាដែលអ្នកត្រូវការប្រាក់ធំៗ ដើម្បីធ្វើដើមទុន ឬអភិវឌ្ឍទ្រព្យរបស់ខ្លួនជាដើម។
៧. ត្រូវមើលតុល្យភាពខ្លួនឯង
ត្រង់នេះមានន័យថា អ្នកមិនត្រូវមានឥណទានច្រើនលើសលប់ពេកទេ ព្រោះអ្នកផ្ដល់ប្រាក់កម្ចីគេនឹងមើលលើលទ្ធភាពបង់សងរបស់អ្នក។
៨. បង់សងឲ្យទាន់ពេល
ចំណុចនេះសំខាន់ណាស់ក្នុងការកសាងប្រវត្តិល្អនៃឥណទានរបស់អ្នក។ អ្នកគួរតែព្យាយាមបង់សងឲ្យបានមុនថ្ងៃកំណត់ ឬនៅត្រឹមថ្ងៃកំណត់ ហើយផ្ទៀងផ្ទាត់ផងថា អ្នកផ្ដល់ប្រាក់កម្ចីបញ្ចូលព័ត៌មានឥណទានរបស់អ្នកទៅក្នុងប្រព័ន្ធចែករំលែកឥណទានទាន់ពេលវេលាដូចគ្នា។ បើកាលណាបញ្ចូលយឺតយ៉ាវ នោះព័ត៌មានរបស់អ្នកក៏ស្ថិតក្នុងភាពអវិជ្ជមានដែរ(គឺបង់សងយឺត)។
៩. ប្រសិនបើមានកាតឥណទានចូរប្រើឲ្យបានត្រឹមត្រូវ
ប្រសិនបើអ្នកកំពុងប្រើប្រាស់កាតឥណទាន (កាតចាយមុនបង់លុយតាមក្រោយ) អ្នកត្រូវបង់សងឲ្យទាន់ពេលវេលា និងគ្រប់ចំនួនដែលបានចាយ ឬត្រឹមកម្រិតអប្បបរមាណាមួយ បើមិនដូច្នោះទេ ប្រវត្តិឥណទានរបស់អ្នក នឹងបង្ហាញថាយឺត (ព័ត៌មានអវិជ្ជមាន)។ អ្នកក៏ពុំគួរប្រើកាតឥណទានច្រើនពេកនោះដែរ ព្រោះវាជាបន្ទុកបំណុល៕
អត្ថបទ៖ ឈិន ធារ៉ាត់