សិល្បៈជាតិ៖ តាមសមាគមសិល្បករខ្មែរបានឱ្យដឹងថា លោកជំទាវអ្នកឧកញ៉ា ម៉ៅ ចំណាន បានដឹកនាំក្រមការងារអញ្ជើញទៅសួរសុខទុក្ខលោកព្រឹទ្ធាចារ្យកោសល្យវោហារ គង់ ណៃ វីរសិល្បករចាប៉ីដងវែង នារសៀលថ្ងៃទី០៩ ខែឧសភា ឆ្នាំ២០២៤ ដែលលោកកំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត(ពេទ្យរុស្ស៊ី) ប្រកបដោយសេចក្ដីព្រួយបារម្ភជាទីបំផុត។
នៅក្នុងឱកាសនោះលោកជំទាវអ្នកឧកញ៉ាប្រធានសមាគមសិល្បករខ្មែរ បានសាកសួរអំពីស្ថានភាពនានារបស់លោកព្រឹទ្ធាចារ្យ គង់ ណៃ ពីសំណាក់ក្រុមគ្រួសារដែលកំពុងមើថែលោកព្រឹទ្ធាចារ្យនៅមន្ទីរពេទ្យ ព្រមទាំងបាននាំយកនូវថវិការបស់សមាគមសិល្បករខ្មែរ និងថវិការបស់លោកជំទាវឧកញ៉ាផ្ទាល់ប្រគល់ជូនដល់ក្រុមគ្រួសារលោកព្រឹទ្ធាចារ្យ ដើម្បីសម្រាលបន្ទុកចំណាយមួយផ្នែកផងដែរ។
លោកជំទាវបានគោរពជូនពរដល់ព្រឹទ្ធាចារ្យកោសល្យវោហារ គង់ ណៃ ដោយសង្ឃឹមថា សុខភាពរបស់លោកព្រឹទ្ធាចារ្យនឹងបានល្អប្រសើរឡើងវិញ ហើយបានជួបលោកតាព្រឹទ្ធាចារ្យសារជាថ្មីម្ដងទៀតនាពេលឆាប់ៗខាងមុខនេះ ខណៈសមាគមក៏កំពុងត្រៀមរៀបចំកម្មវិធីដ៏ធំមួយសម្រាប់ជួយដល់សិល្បកររៀមច្បង ហើយលោកជំទាវអ្នកឧកញ៉ាពិតជាចង់ឃើញព្រឹទ្ធាចារ្យ គង់ ណៃ បង្ហាញវត្តមាននាឱកាសនោះផងដែរ។
លោកព្រឹទ្ធាចារ្យកោសល្យវោហារ គង់ ណៃ បានបង្ហាញអារម្មណ៍រីករាយដោយបានដឹងថា វត្តមានរបស់អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរមានការយកចិត្តទុកដាក់ពីសុខទុក្ខរបស់លោក ព្រមទាំងបានអញ្ជើញទៅសាកសួរសុខទុក្ខដោយផ្ទាល់ដូច្នេះ។ នេះជាការលើកទឹកចិត្តយ៉ាងធំធេងដល់លោកព្រឹទ្ធាចារ្យ និងក្រុមគ្រួសារ។
