ដាកា៖ យន្តហោះ Boeing 737 ដឹកមនុស្ស ៨៥ នាក់ បានរអិលចេញពីផ្លូវរត់ មុនពេលហោះឡើងនៅអាកាសយានដ្ឋានក្នុងទីក្រុង Dakar រដ្ឋធានីសេណេហ្គាល់ បណ្តាលឲ្យមនុស្ស ១០នាក់រងរបួស នេះបើតាមសេចក្តីប្រកាសរបស់រដ្ឋមន្ត្រីដឹកជញ្ជូនរបស់ប្រទេសនេះបាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ទី ៩ ឧសភា។ នេះបើយោងតាមការចេញផ្សាយដោយសារព័ត៌មាន CNA នាថ្ងៃសុក្រ ទី១០ ខែឧសភា ឆ្នាំ២០២៤។
លោក El Malick Ndiaye រដ្ឋមន្ត្រីដឹកជញ្ជូន បាននិយាយថា ជើងហោះហើរ Air Sénégal ដំណើរការដោយក្រុមហ៊ុន Groupe TransAir បានធ្វើដំណើរទៅកាន់ទីក្រុង Bamako របស់ប្រទេសម៉ាលី កាលពីល្ងាចថ្ងៃពុធ ដោយដឹកអ្នកដំណើរ ៧៩នាក់ អាកាសយានិក ២នាក់ និងបុគ្គលិកកាប៊ីន ៤នាក់។
អ្នករបួសកំពុងសម្រាកព្យាបាលនៅមន្ទីរពេទ្យ ចំណែកអ្នកនៅដំណើរនៅសេសសល់ផ្សេងទៀតត្រូវបានដឹកយកទៅសណ្ឋាគារដើម្បីសម្រាក។
វីដេអូពេលយប់ដែលត្រូវបានចែករំលែកនៅលើប្រព័ន្ធផ្សព្វផ្សាយសង្គមបានបង្ហាញពីអ្នកដំណើរដែលកំពុងរត់ចេញពីយន្តហោះ ដែលស្លាបខាងឆ្វេងរបស់យន្ដហោះហាក់ដូចជា កំពុងឆាបឆេះ។
បន្ទាប់ពីឧបទ្ទវហេតុនេះ អាកាសយានដ្ឋានសេណេហ្គាល់បានផ្អាកប្រតិបត្តិការផ្សេងៗ ភ្លាមៗ ប៉ុន្តែបានបើកដំណើរឡើងវិញនៅម៉ោងប្រហែល ១១:០០នាទីយប់ (ម៉ោងក្នុងស្រុក) នេះបើយោងតាមការឱ្យដឹងពីអាកាសយានដ្ឋាន ដែលបានក្នុងការបង្ហោះតាមអ៊ីនធឺណិត។
ទាក់ទិននឹងបញ្ហានេះ ក្រសួងបានណែនាំការិយាល័យស៊ើបអង្កេត និងវិភាគរបស់ប្រទេស ឱ្យបើកការស៉ើបអង្កេត ដើម្បីកំណត់មូលហេតុនៃគ្រោះថ្នាក់នេះ៕