មុនជួបគ្នានៅក្នុងការប្រកួតវគ្គជម្រុះនៃពានរង្វាន់ AFC Asian Cup Saudi Arabia 2027 សារព័ត៌មានត្រយង សូមជម្រាបជូនប្រិយមិត្តអំពីប្រវត្តិជួបគ្នា៣លើកចុងក្រោយរវាងក្រុមគោរព្រៃកម្ពុជា ទល់នឹងក្រុមស្រីលង្កា មុនក្រុមទាំងពីរប៉ះគ្នានៅដើមខែកញ្ញា ឆ្នាំ២០២៤ ខាងមុខ។
- នៅថ្ងៃទី២២ ខែសីហា ឆ្នាំ១៩៧២ កម្ពុជា ៦-១ស្រីលង្កា ក្នុងបានរង្វាន់ Merdeka Tournament វគ្គសន្សំពិន្ទុក្នុងពូល
- នៅថ្ងៃទី២៨ ខែមីនា ឆ្នាំ២០០១ កម្ពុជា ០-១ ស្រីលង្កា ក្នុងការប្រកួតមិត្តភាពអន្តជាតិ
- នៅថ្ងៃទី៩ ខែតុលា ឆ្នាំ២០១៦ កម្ពុជា ៤-០ ស្រីលង្កា ក្នុងការប្រកួតមិត្តភាពអន្តជាតិ
សូមជម្រាបថាកាលពីថ្ងៃទី៩ ទីឧសភា ឆ្នាំ២០២៤ នៅក្នុងកម្មវិធីចាប់ឆ្នោតនៅប្រទេសម៉ាឡេស៊ី សម្រាប់ការប្រកួតវគ្គជម្រុះ AFC Asian Cup Saudi Arabia 2027 ឃើញថាក្រុមបាល់ទាត់ជម្រើសជាតិកម្ពុជា ដែលមាន FIFA ranking ចំណាត់ថ្នាក់លេខ១៧៩ នឹងប្រកួតជាមួយក្រុមជម្រើសជាតិស្រីលង្កា FIFA ranking ចំណាត់ថ្នាក់លេខ២០៤ ពិភពលោក។
នេះជាការប្រកួតនេះទាំងពីរជើងនឹងធ្វើឡើងនៅខែកញ្ញាខាងមុខ៖
- ជើងទី១ នៅថ្ងៃទី៥ ខែកញ្ញា ឆ្នាំ២០២៤ ស្រីលង្កា ប៉ះកម្ពុជា នៅកីឡដ្ឋាន Sugathadasa នៅស្រីលង្កា
- ជើងទី២ នៅថ្ងៃទី១០ ខែកញ្ញា ឆ្នាំ២០២៤ កម្ពុជា ប៉ះស្រីលង្កា នៅពហុកីឡដា្ឋនជាតិ រាជធានីភ្នំពេញ។
ជាមួយគ្នានេះក្រុមជម្រើសជាតិម៉ុងហ្គោលី ប៉ះទីម័រខាងកើត ខណៈម៉ាកាវ ប៉ះប្រ៊ុយណេ។ ក្រុមចំនួន៣ដែលទទួលបានជ័យជម្នះនឹងឡើងទៅជម្រុះជុំទី៣ (វគ្គជម្រុះក្នុងពូល) ដែលមាន១៩ប្រទេសដើម្បីប្រកួតប្រជែងគ្នាយក៦ក្រុមឡើងទៅជុំផ្តាច់ព្រ័ត្រ 2027 AFC Asian Cup នៅប្រទេសអារ៉ាប៊ីសាអ៊ូឌីតជាម្ចាស់ផ្ទះ។
សម្រាប់ក្រុមជម្រើសជាតិកម្ពុជា នឹងត្រូវប្រកួតមិត្តភាពទល់នឹងក្រុមជម្រើសជាតិម៉ុងហ្គោលី ចំនួនពីរជើងសិន មុខប៉ះក្រុមស្រីលង្កា ដោយការប្រកួតលើកទី១នឹងធ្វើឡើងនៅថ្ងៃទី៧ ខែមិថុនា នៅក្នុងពហុកីឡដ្ឋានជាតិ និងការប្រកួតលើកទី២ នឹងធ្វើឡើងនៅថ្ងៃទី១១ ខែមិថុនា ខាងមុខ នៅក្នុងកីឡដ្ឋាន Ulaanbaatar ប្រទេសម៉ុងហ្គោលី៕
