មួយរយៈក្រោយមកនេះ កញ្ញា គឹម ឌីណា បានងាកមកផ្ដោតលើការតែងនិពន្ធសៀវភៅ ដែលជាចំណង់ចំណូលចិត្តរបស់ខ្លួនខ្លាំង ព្រមទាំងមានការទទួលស្គាល់ និងពេញនិយមក្នុងស្រទាប់អ្នកអាន ធ្វើឱ្យអ្នកគាំទ្រការអត្ថាធិប្បាយព័ត៌មានរបស់កញ្ញាមានការសោកស្ដាយយ៉ាងខ្លាំង។ យ៉ាងណាមិញក្នុងពេលឆាប់ៗនេះ កញ្ញានឹងត្រលប់មកអត្ថាធិប្បាយព័ត៌មានសារជាថ្មីឡើងវិញ។
អ្នកនិពន្ធរូបស្រស់ ពេញដោយសមត្ថភាពនិងទេពកោលស្យ កញ្ញា គីម ឌីណា នឹងបង្ហាញវត្តមានជាអ្នកអត្ថាធិប្បាយព័ត៌មានថ្មី នៅក្នុងកម្មវិធីត្រយង Top NEWS របស់សារព័ត៌មានត្រយង។
កញ្ញា បានបញ្ជាក់ឱ្យដឹងពីមូលហេតុដែលកញ្ញាត្រលប់មកអត្ថាធិប្បាយព័ត៌មានថាគឺដោយសារតែកញ្ញានៅស្រលាញ់ការងារនេះ ម្យ៉ាងវិញទៀតកញ្ញាមើលឃើញ ថាការងារនេះអាចជួយដល់សង្គមតាមរយៈការជំរាបជូនព័ត៌មាន ទាន់ហេតុការណ៍ និងថ្មីៗ រឿងរ៉ាវកើតឡើងក្នុងសង្គមជូនដល់បងប្អូនប្រជាពលរដ្ឋ។
កញ្ញាក៏បានបញ្ជាក់ដែរថានៅត្រយងកញ្ញាអាចបន្តក្ដីស្រលាញ់ជាអ្នកអត្ថាធិប្បាយព័ត៌មានផង ហើយអាចធ្វើជាអ្នកនិពន្ធបានផង ដូច្នេះនេះជាឱកាសដ៏ល្អមួយសម្រាប់កញ្ញាអាចធ្វើកិច្ចការដែលកញ្ញាស្រលាញ់បានទាំងពីរស្របគ្នា។
ម្ចាស់ស្នាដៃសៀវភៅទើបចេញថ្មី «ផ្ការីកវិញទេ?» រូបនេះក៏បានបញ្ជាក់ដែរថា ថ្វីត្បិតតែកញ្ញាបានឈប់ធ្វើជាអ្នកអត្ថាធិប្បាយតែកញ្ញានៅតែបន្តធ្វើវីដេអូចែករំលែកចំណេះដឹង និងអ្វីៗដែលមានប្រយោជន៍ ទៅកាន់យុវវ័យ និងយុវជន តាមរយៈរឿងរ៉ាវស្នេហា ការងារ ឬបញ្ហាផ្លូវចិត្ត នៅលើឆាណែលយូធូបដដែល។
អ្នកនិពន្ធរូបនេះ ក៏បានឆ្លៀតឱកាសអរគុណចំពោះអ្នកគាំទ្រ ហើយសង្ឃឹមថាបងប្អូនដែលតែងតែសាកសួរនិងទន្ទឹងរង់ចាំការវិលត្រលប់មកអត្ថាធិប្បាយរបស់កញ្ញានឹងបន្តគាំទ្រការអត្ថាធិប្បាយកញ្ញាតាមរយៈកម្មវិធី Troryorng Top News ដើម្បីទទួលបានព័ត៌មានថ្មីៗទាន់ហេតុការណ៍និងរឿងរ៉ាវកើតឡើងនៅក្នុងសង្គម។
កញ្ញាបានផ្ដាំផ្ញើដែរថាប្រសិនបើអ្នកមានក្ដីស្រមៃ កុំខ្លាចនឹងជំនះឧបសគ្គនានា ព្រោះរឿងខ្លះត្រូវការពេលវេលា ប្រៀបដូចជាករណីកញ្ញា ទោះជាឃ្លាតឆ្ងាយពីការអត្ថាធិប្បាយច្រើនឆ្នាំ តែកញ្ញានៅតែអាចត្រលប់មកចាប់អាជីពមួយនេះឡើងវិញ ដូច្នេះសូមកុំខ្លាចនឹងមានក្ដីសុបិន ហើយត្រូវមានភាពក្លាហាន តស៊ូ អំណត់ និងជំនះដើម្បីសម្រេចក្ដីសុបិនរបស់ខ្លួន។
កញ្ញា គឹម ឌីណា គឺជាអ្នកនិពន្ធដែលមានស្នាដៃសៀវភៅប្រលោមលោកល្បីៗជាច្រើនរឿងដូចជា ភរិយាខ្ញុំអាយុ ១៨ឆ្នាំ ស្នេហ៍អស់ពីហឬទ័យ ផ្ការីកវិញទេ? និង មានសៀវភៅខ្លីបែបលើកទឹកចិត្ត «មនុស្សបាក់ទឹកចិត្ត» ក៏ដូចជាស្នាដៃចម្រៀងចំនួន ៤ បទ មនុស្សបាក់ទឹកចិត្ត ស្រលាញ់ អរគុណដែលស្រលាញ់អូន និងបទ ផ្ការីកវិញទេ?៕
ទស្សនាព័ត៌មានជាវីដេអូ៖
