Britney Spears ត្រូវបានគេចោទប្រកាន់ថាបានប៉ះទង្គិចសម្ដីមេផ្ទះដែលធ្វើការជាមួយរាប់ឆ្នាំដោយសារតែប្រកែកគ្នារឿងសត្វឆ្កែកាលពីសប្ដាហ៍មុន ដោយរឿងនេះមើលទៅកាន់តែមានភាពធ្ងន់ធ្ងរព្រោះករណីប្រមាថរបស់តារាស្រីរូបនេះត្រូវបានប្រគល់ដល់ដៃរដ្ឋអាជ្ញារួចហើយ។
តារាចម្រៀងដែលជានិមិត្តសញ្ញានៃសិល្បៈចម្រៀងរូបនេះបានបដិសេធរាល់ការចោទប្រកាន់ ខណៈករណីដែលបានកើតឡើងនៅផ្ទះរបស់អ្នកនាងកាលពីសប្ដាហ៍មុនកំពុងស្ថិតក្នុងការស៊ើបអង្កេត។
ការិយាល័យមេធាវី Ventura County District នៅខណៈនេះមិនទាន់សម្រេចចិត្តនៅឡើយទេថានឹងធ្វើការផាកពិន័យ Britney ចំពោះករណីខាងលើនេះឬក៏យ៉ាងណា។
តារាចម្រៀងវ័យ ៣៩ឆ្នាំ ត្រូវបានចោទប្រកាន់ថាបានទះទូរសព្ទចេញពីដៃមេផ្ទះឱ្យផុតពីមុខខ្លួន ក្រោយពីស្ត្រីមេផ្ទះរូបនោះបានយកឆ្កែទៅពេទ្យសត្វ។
ស្ត្រីជាមេផ្ទះបានប្រាប់អាជ្ញាធរមានសមត្ថកិច្ចថា គាត់បានយកសត្វឆ្កែរបស់តារាចម្រៀងល្បីរូបនេះទៅពិនិត្យសុខភាពដោយសារតែម្ចាស់ខ្លួនមិនសប្បាយបារម្ភពីសុខភាពសត្វចិញ្ចឹម។ ប៉ុន្តែក្រោយពីត្រលប់មកផ្ទះវិញ កើតមានទំនាស់ពាក្យសម្ដីពាក់ព័ន្ធនឹងរឿងសុខភាពរបស់សត្វឆ្កែធ្វើឱ្យ Britney Spears ទះទូរស័ព្ទចេញពីដៃរបស់មេផ្ទះខ្លួន។
មេធាវីរបស់ Britney លោក Mathew Rosengart បានច្រានចោករាល់ការចោទប្រកាន់និងអះអាងថាការលើកឡើងនេះគឺហួសពីការពិតខ្លាំងពេក។ ដំណឹងខាងលើនេះបានបែកធ្លាយចេញមកក្រោយ Britney បង្ហាញក្ដីពេញចិត្តចំពោះមិត្តប្រុស Sam Asghari ដែលតែងតែនៅមក្បែរខ្លួនគ្រប់ពេលវេលានិងឆ្លងកាត់ឧបសគ្គជាមួយគ្នាពីរបីឆ្នាំកន្លងមកនេះ។
ថ្មីៗនេះ Britney Spears ទើបតែទម្លាក់គ្រាប់បែកដ៏ធំមួយនៅក្នុងសវនាការតុលាការដោយស្នើសុំឲ្យបញ្ចប់សិទ្ធិត្រួតត្រាពីសំណាក់ឪពុករបស់នាងលោក Jamie Spears ក្នុងឋានៈជាសហគ្រប់គ្រងសិទ្ធិត្រួតត្រាលើអាជីពរបស់ខ្លួន៕
