សមត្ថកិច្ចនាំបញ្ជូនមេខ្យល់បុរសចំនួន ០៣នាក់ទៅកាន់តុលាកា បន្ទាប់ពីបានប្រព្រឹត្តសកម្មភាពល្មើសច្បាប់នាំពលករជាច្រើននាក់ឆ្លងដែនចូលក្នុងទឹកដីថៃ។
នគរបាលបានប្រាប់ឲ្យដឹងថា ក្រោយការអនុវត្តច្បាប់ក្រោមការសម្របសម្រួលនីតិវិធីរបស់ លោក កែវ សុជាតិ ព្រះព្រះរាជអាជ្ញាអមសាលាដំបូងខេត្តបាត់ដំបង នៅចុងសប្តាហ៍កន្លងមកនេះកម្លាំងនគរបាលជំនាញបញ្ចប់ការកសាងសំណុំរឿងតាមការគ្រោងទុក ហើយរៀបចំបញ្ជូនជនសង្ស័យជាមេខ្យល់ចំនួន ០៣នាក់ទៅកាន់តុលាកាខេត្តពីបទលួចឆ្លងដែនដោយមិនស្របច្បាប់ ក្នុងបទល្មើសជាក់ស្ដែងដែលប្រព្រឹត្តកាលពីថ្ងៃទី ០៣ ខែកញ្ញា ឆ្នាំ២០២១ កន្លងទៅនេះ។
មេខ្យល់ប្រុសទាំង ០៣នាក់មានឈ្មោះកិល យាំង ភេទប្រុស អាយុ ៣១ឆ្នាំ , ឈ្មោះគឹម សុខហេង ហៅ ឆែប ភេទប្រុស អាយុ២៩ឆ្នាំ និងឈ្មោះឡាំ ភារុណ ភេទប្រុស អាយុ ៤៣ឆ្នាំ ទាំង ៣នាក់រស់នៅក្នុងឃុំពេជ្រចិន្តា ស្រុកភ្នំព្រឹក ខេត្តបាត់ដំបង ក្នុងនោះសមត្ថកិច្ចដកហូតបាននូវរថយន្ត ០១គ្រឿង ម៉ាក នីសាន់ ពណ៌សំបកឪឡឹក ពាក់ស្លាកលេខ ភព-០២៥០។
ប្រភពពីសមត្ថកិច្ចដដែលបញ្ជាក់ថា ការអនុវត្តតាមច្បាប់ខាងលើនេះអនុវត្តតែចំពោះតែក្រុមមេខ្យល់ប៉ុណ្ណោះតាមនីតិវិធី ចំណែកឯពលករខ្មែរចំនួន ៧នាក់ផ្សេងទៀតត្រូវបាននគរបាលជំនាញប្រគល់ទៅឲ្យក្រុមគ្រូពេទ្យដើម្បីនាំទៅធ្វើចត្តាឡីស័កនៅមណ្ឌលព្យាបាលស្រុកកំរៀង៕
អត្ថបទ៖ ដំបងក្រញូង