មនុស្សគ្រប់គ្នាតែងតែចង់អភិវឌ្ឍខ្លួនឯង ដើម្បីឲ្យមានការផ្លាស់ប្តូរជោគវាសនា និងអាចដឹកនាំជីវិតទៅរកភាពជោគជ័យ។ ប៉ុន្តែមនុស្សភាគច្រើនបានត្រឹមតែចង់អភិវឌ្ឍន៍ខ្លួនឯង តែមិនបានដឹងពីគន្លឹះ នៃការអភិវឌ្ឍខ្លួនឯងនោះទេ។ ការអភិវឌ្ឍខ្លួនឯងឲ្យមានភាពជោគជ័យបាន លុះត្រាតែអ្នកចេះកំណត់គោលដៅ រឺចំណុចសំខាន់សម្រាប់ខ្លួនឯងឲ្យបានជាក់លាក់។ ថ្ងៃនេះសារព័ត៌មានត្រយងនឹងបង្ហាញអំពីគន្លឹះជោគជ័យក្នុងជីវិតខ្លះៗ៖
តើយើងអាចកំណត់ភាពជោគជ័យយ៉ាងដូចម្ដេច?
១. ស្គាល់ខ្លួនឯង៖ ត្រូវតែស្វែងយល់ពីខ្លួនឯងឲ្យបានច្បាស់ដូចជា ដឹងពីចំណង់ចំណូលចិត្ត ទេព្យកោសល្យ ចំណុចខ្លាំង និង ចំណុចខ្សោយរបស់ខ្លួនជាដើម។ ប្រសិនបើអ្នកដឹងចំណុចខ្សោយខ្លួនឯងច្បាស់ហើយ អ្នកត្រូវចាប់ផ្តើមពង្រឹងចំណុចខ្សោយនោះបន្តិចម្តងៗឡើងវិញ រហូតឲ្យវាក្លាយជាចំណុចខ្លាំងរបស់អ្នកវិញ។
២. កំណត់គោលដៅជីវិត៖ កំណត់គោលដៅជីវិតរបស់អ្នកដោយចោតជាសំណួរសួរខ្លួនឯងអំពី គោលបំណងចង់បានអ្វី, ចង់ធ្វើអ្វី, សម្រេចគោលបំណងក្នុងរយៈពេលប៉ុន្មានឆ្នាំ, ហើយគោលបំណងដែលត្រូវកំណត់ត្រូវជាមួយនឹងចំណង់ចំណួលចិត្តដែររឺទេ?
៣. រំលឹកគោលដៅជីវិតប្រចាំថ្ងៃ៖ មិនមែនគ្រាន់តែស្គាល់ខ្លួនឯង និងកំណត់គោលដៅហើយ អ្នកពិតជាអាចសម្រេចគោលដៅនោះឡើយ។ អ្នកគួរតែគិតថា នៅថ្ងៃអនាគតអ្នកអាចជួបឧបសគ្គអ្វីខ្លះ ក្រោយពេលដែលអ្នកសម្រេចចិត្តថា និង ត្រូវបន្តគោលដៅដែលអ្នកចង់បាន។
៤. គ្រប់គ្រងពេលវេលា៖ ពេលវេលាគឺពិតជាសំខាន់ណាស់ សម្រាប់ការកំណត់ភាពជោគជ័យ ព្រោះភាពជោគជ័យតែងតែដើរទៅមុខរហូត ប្រៀបដូចជា ទ្រនិចនាឡិកាដែលដើរទៅមុខរហូតអីចឹងដែរ។ ដូច្នេះសូមបែងចែកថា តើការងារណាអ្នកគួរតែអនុវត្តន៍មុនគេ?
៥. ផ្លូវអារម្មណ៍៖ ភាពរឹងមាំខាងផ្លូវចិត្តសំដៅលើភាពអត់ធន់ និងបន្តការព្យាយាមទោះបីជានៅខាងមុខអ្នកនឹងជួបឧបសគ្គក៏ដោយ។ ចូលគិតថា បញ្ហា គឺជាឱកាសក្នុងការដោះស្រាយ កុំខ្លាចបញ្ហា នៅពេលជួបបញ្ហាច្រើនអ្នកនឹងកាន់តែរឹងមាំ។ នៅពេលដែលអ្នកគ្រប់គ្រងផ្លូវអារម្មណ៍បានល្អ អ្នកនឹងក្លាយជាមនុស្សដែលពោរពេញទៅដោយទំនុកចិត្ត ការជឿជាក់លើសមត្ថភាពខ្លួនឯង។
៦. អនុវត្តន៍តាមផែនការជានិច្ច៖ អ្នកត្រូវអនុវត្តន៍ទៅតាមផែនការដែលអ្នកបានកំណត់ពីមួយជំហានទៅមួយជំហាន ប្រកបដោយការតាំងចិត្ត ការពង្រឹងសមត្ថភាព និងមានភាពជឿជាក់លើខ្លួនឯង ថាអ្នកប្រាកដជាអាចធ្វើវាបានសម្រេច និងជោគជ័យក្នុងជីវិតរបស់អ្នក៕
ប្រភព៖ Verywell mind
