មិនខុសពីអ្នកគាំទ្រទូទាំងពិភពលោក អ្នកគាំទ្រជនជាតិប៉ាគីស្ថានរបស់ « Jongkook » សមាជិកក្នុងក្រុម BTS បានបញ្ចេញប្រាក់ទិញផ្ទាំងឃោសនាពាណិជ្ជកម្មដើម្បីអបអរសាទរថ្ងៃកំណើតរបស់តារាចម្រៀងរូបនេះកាលពីថ្ងៃទី១ ខែកញ្ញា ឆ្នាំ២០២១ កន្លងមក ប៉ុន្តែផ្ទាំង Billboard ដ៏ធំអបអរថ្ងៃកំណើតសំណព្វចិត្តត្រូវបញ្ជាឱ្យទម្លាក់ចេញ ព្រោះក្រុមអ្នកសាសនានិយមប៉ាគីស្ថានមើលឃើញថាផ្ទាំងឃោសនានេះផ្សព្វផ្សាយការស្រលាញ់ភេទដូចគ្នា។
នៅថ្ងៃទី១ ខែកញ្ញា Billboard អបអរសាទរថ្ងៃកំណើតអាយដលល្បីឈ្មោះនៅក្រុង Gujranwala (កុដច្រាន់វ៉ាឡា) ក្រុងឧស្សាហកម្មមួយរបស់ប្រទេសប៉ាគីស្ថាន តែទីបំផុតផ្ទាំងឃោសនានោះត្រូវបានទម្លាក់ចុះ ក្រោយមានការស្នើសុំពីអ្នកនយោបាយប្រចាំតំបន់និងក្រុមអ្នកងប់នឹងសាសនា។
យោងតាមប្រសាសន៍របស់អ្នកនយោបាយប្រចាំតំបន់បានឱ្យដឹងថានេះមិនមែនជាគំនិតផ្ទាល់របស់អ្នកនយោបាយប៉ុណ្ណោះទេ តែមានប្រជាជនប៉ាគីស្ថានជាច្រើននាក់បានស្នើសុំឱ្យទម្លាក់ចុះ ផ្ទាំងឃោសនាដែលកំពុងផ្សព្វផ្សាយឱ្យយុវជនប៉ាគីស្ថានប្រព្រឹត្តិអំពើមិនស័ក្ដិសម។
«ក្នុងក្រុងនេះមានចំនួនយុវជនទាំងប្រុសទាំងស្រីច្រើននាក់ ខណៈដែលក្រុមចម្រៀង BTS បានបង្កើតឥទ្ធិពលក្នុងផ្លូវអវិជ្ជមាន ឱ្យដល់កំលោះក្រមុំ ពួកគេផ្សព្វផ្សាយឱ្យយុវវ័យធ្វើរឿងដែលមិនត្រឹមត្រូវ ជាពិសេសផ្សព្វផ្សាយការស្រលាញ់ភេទដូចគ្នា។» នេះគឺជាការលើកឡើងរបស់អ្នកនយោបាយខាងលើ។
លោកបានបន្តនិយាយដល់រឿង ការដែលអ្នកគាំទ្រក្រុមនេះហៅខ្លួនឯងថា ARMY ថា ក្នុងប្រទេសនេះមានកងទ័ព (ARMY) ត្រឹមតែមួយប៉ុណ្ណោះ នោះគឺកងទ័ពប៉ាគីស្ថាន។
រឿងទម្លាក់ផ្ទាំងឃោសនានេះបានធ្វើឱ្យអ្នកគាំទ្រ BTS ក្នុងប្រទេសប៉ាគីស្ថានយ៉ាងខ្លាំងដោយក្នុងនោះមានអ្នកខ្លះបានបញ្ចេញចំណាប់អារម្មណ៍តាមបណ្ដាញសង្គមថា៖ « មនុស្សចាស់អស់នេះក្បាលរឹងខ្លាំងណាស់ ហើយកាត់សេចក្ដីមនុស្សដោយគ្មានហេតុផល គ្រាន់តែរូបរាងខាងក្រៅរបស់ពួកគេសោះ» ខណៈដែលខ្លះទៀតបានលើកឡើងដែរថា «នេះគ្រាន់តែជាផ្ទាំងឃោសនា អត់ឃើញមានបញ្ហាអ្វីសោះ»។
BTS គឺជាក្រុមចម្រៀងបុរសដែលមានសមាជិកចំនួន៧រូប ក្រុមនេះមានភាពល្បីល្បាញនិងមានចំនួនអ្នកគាំទ្រ (ARMY) នៅពាសពេញពិភពលោក សូម្បីតែក្នុងព្រះរាជាណាចក្រកម្ពុជាក៏មានក្រុមអ្នកគាំទ្រ BTS ដែលបានហៅខ្លួនថា ARMY យ៉ាងច្រើនសន្ធឹកសន្ធាប់ ជាពិសេសយុវវ័យ៕