ខ្សែជីវិតរបស់ Georgina Rodriguez មិត្តស្រីតារាបាល់ទាត់លំដាប់ពិភពលោកដ៏ល្បីល្បាញសញ្ជាតិព័រទុយហ្គាល់ Christiana Ronaldo ប្រៀបដូចជាព្រះនាងក្នុងរឿងនិទាន ព្រោះនារីម្នាក់នេះបានអភិវឌ្ឍខ្លួនតាំងពីជាភ្នាក់ងារលក់ខោអាវក្នុងហាងធម្មតាម្នាក់មានប្រាក់ខែមួយអាទិត្យជាង៣០០ដុល្លារ មកក្លាយជាតារាម៉ូដែលល្បីល្បាញ។
មុនពេលបានជួបស្គាល់ជាមួយនឹងកំពូលតារាបាល់ទាត់ល្បី Christiana Ronaldo អ្នកនាង Georgina Rodriguez មិនមែនជាតារាល្បីមានគេចាប់អារម្មណ៍ច្រើននោះទេ អ្នកនាងគ្រាន់តែជាមនុស្សស្រីដ៏សាមញ្ញម្នាក់ មានជីវភាពលំបាករស់នៅក្នុងផ្ទះសែនតូចចង្អៀត។
Georgina កើតនៅឆ្នាំ១៩៩៤ នៅប្រទេសអាហ្សង់ទីន មានឪពុកជាជនជាតិអាហ្សង់ទីន ជាអតីតកីឡាករបាល់ទាត់ មានម្ដាយជាជនជាតិអេស្បាញ នៅអាយុ៤ឆ្នាំ គ្រួសាររបស់នាងបានប្ដូរទៅរស់នៅប្រទេសអេស្ប៉ាញ តាមបំណងរបស់ម្ដាយអ្នកនាង នៅខណៈនោះ ប្រទេសអេស្ប៉ាញរងវិបត្តិធ្ងន់ធ្ងរធ្វើឱ្យជីវភាពគ្រួសាររបស់អ្នកនាងលំបាកយ៉ាងខ្លាំង។ ឪពុកបង្កើតនាងបានជាប់ពន្ធនាគារជិត១០ឆ្នាំនៅប្រទេសអេស្ប៉ាញ ហើយថែមទាំងត្រូវអាជ្ញាធរបណ្ដេញចេញពីប្រទេសនេះទៅកាន់ស្រុកកំណើតវិញនៅវ័យ ៦៩ឆ្នាំ ដោយលោកបានស្លាប់នៅប្រទេសអាហ្សង់ទីនជាប្រទេសកំណើតដោយជំងឺ។
កាលពីក្មេង Georgina មានក្ដីស្រមៃចង់ក្លាយជាអ្នករាំរបាំបាល់ឡេប៉ុន្តែដោយសារតែជីវភាពគ្រួសារមានការលំបាកធ្វើឱ្យអ្នកនាងត្រូវបោះបង់ក្ដីសុបិននេះចោល ពេលចំរើនវ័យធំបន្តិច Georgina បានផ្លាស់ប្ដូរកន្លែងរស់នៅហើយបានធ្វើការងារជាអ្នកបំរើ ប៉ុន្តែក្រោយមកនៅអាយុ ១៧ឆ្នាំ នាឆ្នាំ២០១២ អ្នកនាងបានទៅធ្វើជាមេដោះនៅប្រទេសអង់គ្លេស បន្ទាប់ពីបង្វឹកភាសាអង់គ្លេសរបស់ខ្លួនបានល្អហើយនោះ Georgina ក៏ត្រលប់មកអេស្ប៉ាញវិញដើម្បីចាប់យកក្ដីសុបិនរបស់ខ្លួនធ្វើជាបុគ្គលិកលក់នៅទីក្រុង Madrid។ ទីបំផុតនៅឆ្នាំ២០១៦ ម្ចាស់ចិត្តតារាបាល់ទាត់ដ៏ល្បីរូបនេះបានក្លាយជា បុគ្គលិកលក់នៅក្នុងហាង Gucci ដែលជាទីកំណើតស្នេហ៍រវាងអ្នកនាងនិងតារាបាល់ទាត់ល្បី។
ជីវិតជាមិត្តស្រីរបស់តារាបាល់ទាត់ល្បីមិនបានធ្វើឱ្យអ្នកនាងមានភាពសុខស្រួលខ្លាំងនោះទេ ព្រោះក្រោយដំណឹងស្នេហារបស់អ្នកទាំងពីរបែកធ្លាយចេញមកខាងក្រៅ អ្នកគាំទ្របានសំរុកទៅកាន់ហាងដែលអ្នកម្ដាយកូន៤រូបនេះធ្វើការ ហើយសកម្មភាពនេះធ្វើឱ្យម្ចាស់ហាងសម្រេចចិត្តដកអ្នកនាងចេញពីការងារក្នុងក្ដីសុបិនត្រឹមរយៈពេល៨ខែដែលបានបំពេញក្នុងហាងព្រោះខ្លាចប៉ះពាល់ដល់អារម្មណ៍របស់អតិថិជនដែលសុទ្ធសឹងជាអ្នកមានទ្រព្យធន។
ក្រោយមករ៉ូណាល់ដូបានជួយឱ្យអ្នកនាងធ្វើការងារនៅក្នុងហាងដ៏ធំមួយទៀតប៉ុន្តែការងារដែលបានមកដោយសារខ្សែរ៉ូណាល់ដូនេះបានធ្វើឱ្យហ្វេនបន្តតាមទៅកាន់ទីនោះព្រោះចង់សង្ឃឹមថានឹងបានជួបមុខរ៉ូណាល់ដូ រហូតទីបំផុតម្ចាស់ហាងសុំជួបជាមួយ Georgina ហើយក៏ស្រុះស្រួលគ្នាតាមរយៈការលាឈប់ពីការងាររបស់អ្នកនាង។យ៉ាងណាមិញបច្ចុប្បន្ន Georgina គឺជាស្ត្រីដ៏មានឥទ្ធិពលបំផុតព្រោះមិនត្រឹមតែជាមិត្តស្រីនិងជាម្ដាយរបស់កូនៗ រ៉ូណាល់ដូ ប៉ុណ្ណោះទេ ប៉ុន្តែអ្នកនាងក៏បានក្លាយជាតារាម៉ូឌែលដ៏ល្បីល្បាញ ដែលមាន Brand ផលិតផលល្បីចង់រួមសហការជាមួយខ្លាំងថែមទៀតផង។
គួរបញ្ជាក់ថា អ្នកនាង Georgina និង កីឡាករបាល់ទាត់ល្បី រ៉ូណាល់ដូ ទោះជាមិនទាន់បានរៀបអាពាហ៍ពិពាហ៍ជាមួយគ្នាក្ដីប៉ុន្តែអ្នកទាំងពីរបានរស់នៅជាមួយគ្នាប្រៀបដូចជាប្ដីប្រពន្ធថែមទាំងមានកូនប្រុសស្រីចំនួន៤នាក់នៅក្នុងបន្ទុក ដោយកូនប្រុសច្បងគឺជាកូនរបស់រ៉ូណាល់ដូនិងអតីតមិត្តស្រី៕