ការប្រកួតប្រចាំសប្តាហ៍ទី១៣ នៃពានរង្វាន់លីគកំពូលកម្ពុជា រវាងក្លិបម្ចាស់ផ្ទះបឹងកេត ជាមួយក្រុមវិសាខា នៅវេលាម៉ោង៣:៣០នាទីរសៀល ថ្ងៃសៅរ៍ ទី១១ ខែកញ្ញា ឆ្នាំ២០២១ ខាងមុខនេះលើទីលានកីឡដ្ឋានខេមបូឌាអែរវ៉េ ស្ថិតក្នុងភាពស្រពិចស្រពិលនៅឡើយនោះទេ ដោយសារមានពាក់ព័ន្ធនឹងជំងឺកូវីដ-១៩។
បើតាមការបញ្ជាក់របស់គណៈកម្មការប្រកួតបាល់ទាត់ជាតិកម្ពុជា (CNCC) លើកឡើងនៅរសៀលថ្ងៃព្រហស្បត្តិ៍ ទី៩ ខែកញ្ញា ឆ្នាំ២០២១ នេះថា៖«តាមនិតិវិធីវិធានសុវត្ថិភាព ក្លិបទាំងអស់តម្រូវត្រូវធ្វើតេស្តរហ័សរាល់មុនគ្រប់ការប្រកួត ហើយកាលពីថ្ងៃ០៨ ខែកញ្ញា ឆ្នាំ២០២១ ពេលក្លិបបឹងកេត ធ្វើតេស្តនោះរកឃើញ កីឡាករ ១រូប និងមន្រ្តីក្លិប ១រូប របស់ខ្លូនមានលទ្ធផល វិជ្ជមានជំងឺកូវីដ-១៩ ជាមួយគ្នានេះផងដែរសំណាករបស់កីឡាករ និងមន្រ្តីខាងលើនេះត្រូវបានបន្តយកទៅធ្វើតេស្ត PCR។ ដូច្នេះមន្ត្រី និងកីឡាករដ៏ទៃទៀតដែល (អវិជ្ជមាន) និងការប្រកួតថ្ងៃទី១១ ខែកញ្ញា ឆ្នាំ២០២១ ខាងមុខនេះ ត្រូវរង់ចាំលទ្ធផលវិភាគបញ្ជាក់របស់កីឡាករ និងមន្រ្តីខាងលើនេះ»។
