បទចម្រៀងទោលរបស់តារាចម្រៀង K-pop សញ្ជាតិថៃកញ្ញា LISA សមាជិកមួយរូបរបស់ក្រុម Blackpink កំពុងតែធ្វើឱ្យហ្វេនជជែកវែកញែកគ្នាបែកខ្ទិះពេញលើបណ្ដាញសង្គម ដោយមានអ្នកខ្លះលើកឡើងថាខកបំណង ហ្វេនខ្លះបង្ហាញអារម្មណ៍ខឹងសម្បារ តែក៏មានហ្វេនខ្លះបានចេញមុខការពារអាយដលរូបនេះផងដែរ។
បទចម្រៀងដែលមានចំណងជើងថា «Lalisa» គឺជាបទចម្រៀងទោលរបស់សមាជិក Blackpink ដែលទើបតែបញ្ចេញឱ្យអ្នកគាំទ្រ (Fan) បានស្ដាប់និងទស្សនាកាលពី៤ម៉ោងមុន ហើយផ្ទុះបាននូវការគាំទ្រយ៉ាងខ្លាំង។ បទចម្រៀងទោលទើបចេញថ្មីនេះ LISA បានលើកឡើងថាមានការបញ្ចូលតន្ត្រី និង សិល្បៈវប្បធម៌របស់ប្រទេសថៃចូលទៅក្នុងនោះផងដែរ។
យ៉ាងណាមិញទន្ទឹមនឹងជោគជ័យដ៏ធំរបស់តារាចម្រៀងជនជាតិថៃរូបនេះ ហ្វេនៗនៅកម្ពុជាកំពុងតែជជែកវែកញែកគ្នាបែកខ្ទិះចំពោះរូបខ្លោងទ្វារប្រាសាទដែលមនុស្សមួយចំនួនលើកឡើងថាជារចនាបទរបស់ខ្មែរ ខណៈដែលមានអ្នកខ្លះទៀតបានចេញមកការពារនិងលើកឡើងថាប្រាសាទដែលបានឃើញនៅក្នុង MV នោះជាខ្លោងទ្វារប្រាសាទនៅក្នុងខេត្តបុរីរ៉ាំ ប្រទេសថៃ ជាខេត្តស្រុកកំណើតរបស់ LISA ហើយប្រាសាទនោះក៏ធ្លាប់បានយកមកថតភាពយន្តភាគថៃរឿង «ព្រះម៉ែនាគី» ផងដែរ។
ដោយសារតែមានមតិនិងទស្សនៈផ្ទុយគ្នារវាងហ្វេននិងហ្វេនឆ្លងឆ្លើយគ្នានៅលើផេកមួយមានឈ្មោះថា K-Pop World ជាផេកគាំទ្រតារាចម្រៀងកូរ៉េ និងតែងតែផុសរឿងរ៉ាវ ក៏ដូចជាព័ត៌មានថ្មីៗរបស់តារាកូរ៉េ បណ្ដាលឱ្យកើតមានសង្គ្រាមសម្ដីផ្លោងដាក់គ្នាទៅវិញទៅមក។
ក្នុងចំណោមនោះក៏មានមតិខ្លះបានចូលមកដាស់តឿនចំពោះម្ចាស់ទស្សនៈខ្វែងគ្នាពាក់ព័ន្ធនឹងការលើកឡើងខាងលើ ដោយឱ្យគ្រប់គ្នាតំកល់ចិត្តឱ្យធ្ងន់ ហើយបញ្ឈប់ការឈ្លោះប្រកែកជាតិសាសន៍គ្នាឯងទៀត ព្រោះការបាត់បង់សាមគ្គីមិនមានចំណេញនោះទេ មានតែខាតបង់ប៉ុណ្ណោះ ម្យ៉ាងធ្វើឱ្យប្រទេសជិតខាងសើចចំអកទៀតផង។
គួរដឹងថាបទចម្រៀង «Lalisa» ដែលជាបទចម្រៀងទោលរបស់តារារូបនេះបានចេញបង្ហោះឱ្យអ្នកគាំទ្របានស្ដាប់និងទស្សនានៅលើឆាណែលយូធូប BLACKPINK កាលពី៤ម៉ោងមុនមកដល់វេលាម៉ោង៤រសៀលថ្ងៃទី១០ ខែកញ្ញានេះ មានចំនួនទស្សនារហូតដល់ ២៥,២២៨,៦៦៦ ដង៕
ចូលអាន Comment ប្រកែកវែកញែកគ្នារវាងហ្វេននិងហ្វេនខាងក្រោមនេះ៖