ការរីករាលដាលនៃជំងឺកូវីដ-១៩ មួយរយៈកន្លងមកនេះ បានសម្លាប់វិស័យទេសចរណ៍ឱ្យដេកដួលស្ងៀមស្ដូកស្ដឹង វិស័យសិល្បៈ តន្ត្រី ភាពយន្ត ចម្រៀង ហាក់នៅទ្រឹង និងដំណើរការដោយយឺតយ៉ាវ ប៉ុន្តែកាលពីពេលថ្មីៗនេះ ហាក់មានសញ្ញាណល្អ ព្រោះមាន ចាងហ្វាងផលិតកម្ម ផលិតករ អ្នកដឹកនាំរឿង បានផ្ដើមក្រុងពាលី ថតរឿងថ្មី បណ្ដើរៗឡើងវិញ។
ថ្មីៗនេះ ចាងហ្វាងផលិតកម្មលោក ជា ឈីម អ្នកដឹកនាំល្បី លោក ខាំ ភូរិ ក៏ដូចជាអ្នកដឹកនាំរឿងប្រចាំផលិតកម្មហង្សមាស លោក កៅ សីហា បានបង្ហាញរូបភាពប្រារព្ធពិធីក្រុងពាលីថតរឿងភាគថ្មីជាបន្តបន្ទាប់គ្នានៅលើបណ្ដាញសង្គម។
នៅថ្ងៃទី ៦ ខែ កញ្ញា លោក កៅ សីហា ម្ចាស់ស្នាដៃភាពយន្តភាគល្បីរឿង «រាជិនីភូមិគ្រឹះ» បានរៀបចំពិធីក្រុងពាលីនៅឯខេត្តសៀមរាម ដើម្បីសុំអនុញ្ញាតម្ចាស់ទឹកដីកសាងស្នាដៃរឿងបុរាណ និទានអំពីសម័យលង្វែក ដើម្បីចងក្រងទុកជាឯកសារ និងជាផ្ទាំងទស្សនីយភាពចំណីចក្ខុនៃបងប្អូនមហាជនអ្នកទស្សនា។ រឿងភាគខ្នាតធំដែលជាស្នាដៃបុរាណលើកដំបូងរបស់លោក កៅ សីហា និពន្ថអត្ថភាពយន្តដោយ លោក សាស្ត្រាចារ្យ យូ សុភា ប្រមូលផ្ដុំដោយតារាថ្មីចាស់ជាច្រើនរូប មានដូចជាលោក សួន ពិសិដ្ឋ អ្នកនាង សឿ សុធារ៉ា លោក ទ្រី ដារ៉ាវុធ និងកញ្ញា កែវ ឡាវីញ។
នៅថ្ងៃទី៩ ខែកញ្ញា ឆ្នាំ២០២១ ចាងហ្វាងផលិតកម្ម ជា ឈីម មីឌៀរ ដែលជាអ្នកគ្រប់គ្រងការផលិត លោក ជា ឈីម បានរៀបចំពិធីក្រុងពាលី ថតរឿងភាគខ្មែរថ្មី «ពូជមួយត្រួយបី» ដែលរឿងនេះគឺជាការជួបគ្នារវាងតួឯកប្រុសលោក ឈឹម សក្កដា និង កញ្ញា យ៉ែម ស្រីពេជ្រ។ សម្រាប់រឿងនេះក្រៅពីវត្តមានតួឯកប្រុសស្រីខាងលើក៏មានតួអង្គសំខាន់ៗដូចជា តារាសម្ដែងជើងចាស់ លោក ទេព រិនដារ៉ូ លោក លឹម រដ្ឋា លោក ម៉ា វីន និងតារាសម្ដែងប្រុសស្រីជាច្រើនរូបទៀត។
នៅថ្ងៃទី ១៣ អ្នកដឹកនាំល្បីដែលធ្លាប់សាងស្នាដៃដឹកនាំរឿងភាគមនោសញ្ចេតនាស្នេហាលំនាំដើមកូរ៉េ «សិសិរដូវក្នុងបេះដូង» លោក ខាំ ភូរិ ក៏បានរៀបចំពិធីក្រុងពាលីខ្នាតតូច ដោយមានក្រុមការងារ និងមានតារាល្បីដែលជាតួអង្គឯកក្នុងរឿងមកចូលរួមក្នុងពិធីនោះដូចជាតារាចម្រៀងប្រចាំផលិតកម្ម ហង្សមាស លោក ឆន សុវណ្ណរាជ លោក ហ្សូណូ និងតារាសម្ដែង កញ្ញា មាន សូនីតា និង កញ្ញា ឆាយ នីតា។
ការដែលផលិតករ អ្នកដឹកនាំ និងតារាល្បីៗ បានចាប់ផ្ដើមថតរឿងភាគខ្មែរថ្មីៗឡើងវិញនេះ គឺជាសញ្ញាណមួយយ៉ាងល្អ បង្ហាញពីការងើបឡើងវិញជាបណ្ដើរៗនៃវិស័យភាពយន្តភាគខ្មែរ ទោះជាស្ថិតក្នុងបរិបទនៃការរីករាលដាលជំងឺកូវីដ-១៩ក្ដី៕
ទស្សនាវីដេអូព័ត៌មានខាងក្រោមនេះ៖
