ពានរង្វាន់បាល់ទះ Special Volleyball Challenge 2021 បានរៀបចំសន្និសិទសារព័ត៌មាន នៅព្រឹកថ្ងៃសៅរ៍ ទី១៨ ខែកញ្ញា ឆ្នាំ២០២១ នេះនៅទីលានបាល់ទះកីឡដ្ឋានព្រីនស៍ ម្ដុំហ្គេ្រនភ្នំពេញ ដើម្បីបញ្ជាក់ពីគោលបំណងនៃការរៀបចំក៏ដូចជាការដំណើរការនៃការប្រកួត។
ជាមួយគ្នានេះដែរលោកបណ្ឌិត អាំង សេរីពិសិដ្ឋ ប្រធានគណៈកម្មការរៀបចំការប្រកួតបានលើកឡើងថា៖«យើងទទួលបានការអនុញ្ញាតពីសហព័ន្ធកីឡាបាល់ទះកម្ពុជា ឱ្យរៀបចំការប្រកួតនេះឡើង ក្នុងគោលបំណងដកស្រង់បច្ចេកទេសថ្មីៗ និងផ្ដល់ឱកាសឱ្យកីឡាករបានហ្វឹកហាត់កន្លងមកបានបង្ហាញសមត្ថភាពរៀងៗខ្លួន។ មួយវិញទៀតចង់បំផុតការគាំទ្រពីមហាជន ព្រោះការប្រកួតក្រៅប្រព័ន្ធកន្លងមកមិនទាន់មានការរៀបចំស្តង់ដារត្រឹមត្រូវ។ ដូច្នេះហើយទើបយើងកំណត់ជាគោលការណ៍និងស្តង់ដារមួយឱ្យសមស្របតាមលក្ខណៈបច្ចេកទេសត្រឹមត្រូវវិញ។ ជាមួយគ្នានេះការរៀបចំការប្រកួតនេះគឺដើម្បីរិតចំណងមិត្តភាព សាមគ្គីភាព រវាងកីឡាករ គ្រូបង្វឹកនិងថ្នាក់ដឹកនាំក្រុមនានា»។
គណៈកម្មការរៀបចំការប្រកួតបន្ថែមថា៖«មានគេសួរថាម៉េចបានមិនរៀបចំ៦ទល់៦។ ខ្ញុំសួរត្រឡប់វិញថាម៉េចមិនអាចរៀបចំលក្ខណៈ៤ទល់៣ បាន? ជាឧទាហរណ៍ ការប្រកួតបាល់ទះឆ្នេរមានការប្រកួត១ទល់១ តែក្រោយមកមានការប្រែប្រួល២ទល់២ និងមកទល់បច្ចុប្បន្នមានការប្រកួត៤ទល់៤ហើយ។ អីចឹងហេតុបាល់ទះក្នុងសាលយើងមិនអាចប្រែប្រួលបានពី៦ទល់៦ មក៤ទល់៤ បើយើងរៀបចំក្នុងលក្ខណៈបច្ចេកទេសសុទ្ធសាធ មានក្រិត្យក្រមត្រឹមត្រូវ»។
«យើងបានដឹងហើយ កូវីដ-១៩ ជារឿងសំខាន់ ដូចដែរប្រមុខរាជរដ្ឋាភិបាល បានដុតដៃដុតជើងក្នុងការបង្ការជំងឺមួយនេះ។ តែចំពោះវិស័យកីឡាយើង បើសិនយកកូវីដ-១៩ ជាឈ្នាននោះយើងមិនអាចទៅមុខបាននោះទេ។ ទន្ទឹមនឹងនេះគណៈកម្មការរបស់យើងបានរៀបចំតាមបច្ចេកទេសខ្ពស់បំផុត ហើយអាចជាចំណែកមួយដែរ ដែលយើងរៀបចំការប្រកួតលក្ខណៈ៤ទល់៤ នេះឡើង ហើយអាចកាត់បន្ថយចំនួនកីឡានៅក្នុងទីលានប្រកួត។ ម្ខាងលេខបាន៤នាក់ បូកគ្រូបង្វឹក១រូប កីឡាករបម្រុង២រូបទៀត និងគណៈកម្មការបច្ចេកទេសខ្លះគឺស្របតាមការកំណត់របស់វិធានសុខាភិបាល»។លោកបណ្ឌិត អាំង សេរីពិសិដ្ឋ បញ្ជាក់។
លោកថា៖«គ្រប់ក្រុមដែលដាក់ពាក្យគឺតម្រូវឱ្យតេស្តរកកូវីដ-១៩ ជាមុនសិន បន្ទាប់មកមុនការប្រកួត២ថ្ងៃគឺយើងធ្វើតេស្តម្តងទៀត ចុងក្រោយនៅថ្ងៃប្រកួតពេលកីឡាករនិងប្រតិភូមកដល់គឺយើងធ្វើតេស្តម្តងទៀត។ ទោះបីជាមិនល្អឥតខ្ចោះ តែយើងបានរៀបចំក្នុងការការពារខ្ពស់»។
ដោយឡែក ឯកឧត្តម រ៉ា នូវិបុត្រ នាយកក្រុមហ៊ុន Forward ដែលអ្នកឧបត្ថម្ភធំក្នុងព្រឹត្តិការណ៍នេះបានលើកឡើងថា៖«យើងសូមអរគុណដែលខាងគណៈកម្មការរៀបចំការប្រកួតដែលបានផ្ដល់ឱកាសឱ្យក្រុមហ៊ុនយើងបានចូលរួមចំណែកក្នុងការលើកស្ទួយវិស័យកីឡា។ ក្រុមហ៊ុនយើងជាក្រុមហ៊ុនផលិតសម្លៀកបំពាក់កីឡាក្នុងស្រុក ពួកយើងនឹងធ្វើការសហការជាមួយក្រុមកីឡាជាតិទាំងអស់ និងព្រឹត្តិការណ៍កីឡា ក្នុងការឆ្ពោះទៅកាន់កីឡាស៊ីហ្គេមឆ្នាំ២០២៣ ខាងមុខទាំងអស់គ្នា»។
លោក ទែន ឡន នាយកបច្ចេកទេស បានបញ្ជាក់ថា៖«យើងសង្ឃឹមថាកីឡាករលេងត្រូវតាមបច្ចេកទេសកីឡាបាល់ទះឡើងវិញ ព្រោះកន្លងមកមានការចាប់បោះ ដែលធ្វើឱ្យខុសស្តង់ដារ។ ការលេង៤ស្មើនេះ ក្នុងការអភិវឌ្ឍន៍បច្ចេកទេស យើងរំពឹងថាតួរនាទីកីឡាករដែលលេងប្រយុទ្ធ គាត់បន្ថែមការងារមួយទៀតជាអ្នកទទួលសេវា។ បើលេង៦ស្មើ ពេលខ្លះគាត់មិនទាន់ទទួលសេវាម្តងផង»។
ចំណែកការប្រកួតពានរង្វាន់បាល់ទះ Special Volleyball Challenge 2021 គ្រោងដំណើរការពីថ្ងៃទី២៤ ខែកញ្ញា ដល់ថ្ងៃទី១០ ខែតុលា ឆ្នាំ២០២១ នៅទីលានកីឡដ្ឋានព្រីនស៍។ ក្រុមដែលឈ្នះជើងឯកនឹងទទួលបានពាន ចំនួនមួយ និងថវិកាចំនួន ១០លានរៀល ហើយក្រុមជើងឯករងទទួលបានថវិកា៨លានរៀល និងក្រុមចំណាត់ថ្នាក់លេខ៣ ទទួលបាន៦លានរៀល។ ជាមួយគ្នានេះដែរក៏មានពានរង្វាន់ឯកត្តជនផងដែរ ដូចជាកីឡាករវាយប្រយុទ្ធល្អជាងគេ, កីឡាករធ្វើរនាំងល្អជាងគេ, កីឡាករវាយសេវាល្អជាងគេ និងកីឡាករលើកបាល់ល្អជាងគេ ទទួលរង្វាន់ជាថវិកាម្នាក់ ចំនួន ៤សែនរៀល។
ចំណែកការប្រកួតបែងចែកជាវគ្គជម្រុះតាមពូល វគ្គ៨ក្រុមចុងក្រោយ វគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រ។ សម្រាប់ក្រុមដែលចង់ចូលរួមប្រកួតប្រជែងអាចចុះឈ្មោះតាមរយៈលេខ 098 229 192 / 077 910 009 (លោកគ្រូ ទែន ឡន)៕